კალინიჩის დიდი მოგზაურობა გრძელდება. ინგლისისა და იტალიის შემდეგ, ხორვატმა ფეხბურთელმა შემდეგ გაჩერებად ესპანეთის ჩემპიონატი, კერძოდ კი მადრიდის "ატლეტიკო" აირჩია. კალინიჩს მძიმე დროება ედგა "როსონერიში", ტრანსფერმა არ გაამართლა, შემდეგ მსოფლიო ჩემპიონატიც იყო და ახლა ცდილობს თავისი თამაში დიეგო სიმეონესთან დაიბრუნოს:

"ახლა ძალიან ბედნიერი ვარ. აქამდე ესპანეთში არასდროს მითამაშია და უკეთესი მომავლისთვის მოვედი. იტალიისგან განსხვავებით, აქ ყველა მიმზიდველ ფეხბურთს თამაშობს, ფეხბურთი უყვართ, ყველას თამაში და გამარჯვება სწყურია. როდესაც ჩოლომ დამირეკა, ბევრი არ მიფიქრია, მას ვჭირდებოდი, მე კი სათამაშო პრაქტიკა მინდოდა. ,,ატლეტიკო“ ძალიან დიდი კლუბია - საფიქრალი რაღა დამრჩენოდა? ეს ნებისმიერი ფეხბურთელისთვის დიდი შესაძლებლობა იყო. როდესაც ასეთ კლუბში მოდიხარ იცი რომ არ იქნება ადვილი ძირითადში მოხვედრა, აქეთ გრიზმანია, იქით - კოშტა. ვრსალკო და მანჯუკიჩი მესაუბრნენ ამ გუნდის ძალაზე, არა მხოლოდ იმიტომ რომ ფეხბურთელები არიან მაგრები, ფანები და მათი შექმნილი ატმოსფეროც საოცრად მოქმედებს შენზე. აქ ყოველდღე უნდა იშრომო, სხვა შანსი არ არის, ეს კი მოტივაციას მაძლევს."

ხორვატის "მილანური" გამოცდილება მის კარიერაში ძალიან რთული გამოდგა, ადვილი როგორ იქნებოდა, თუნდაც ისეთი ცნობილი ფიგურის გამო, როგორიც გატუზოა:

"ძალინ გამიჭირდა მილანში: წინასასასეზონო მომზადება გუნდთან ერთად ვერ გავიარე, ხორვატიაში ჩემთვის ვვარჯიშობდი და ველოდებოდი ტრანსფერს. შეიძლება ამის გამოც, სეზონის განმავლობაში ბევრი ფიზიკური პრობლემა შემექმნა. მილანი ძალიან დიდი კლუბია, მიჩვეული რომ გამარჯვებები მოიპოვოს, ტიტულები მოიგოს. ასეთ გრანდში შედეგს სწრაფად ითხოვენ. ჩვენთან 11 ახალი ფეხბურთელი იყო, ასეთ დროს კი ძნელია შედეგის დადება, რაღაც დრო გჭირდება რომ რაიმე ახალი ააშენო. მილანს საუკეთესოს ვუსურვებ, ისინი იმსახურებენ რომ ჩემპიონთა ლიგისთვის იბრძოლონ. ბედნიერებაა, "როსონერის" რომ ჯენარო გატუზო ჰყავს, ის დაუჯერებელი კაცია. მოედნის გარეთ ის გეხუმრება და ბევრს იცინს, მასთან ერთად ყოფნა ერთი სიამოვნებაა. მაგრამ როდესაც სავარჯიშოდ გადიხარ ან თამაში გაქვს... ის ყველაფერს გაძლევს და ამას მოითხოვს შენგანაც. მაგრად გწურავს. ის გიჟია, ოღონდ კარგი გაგებით, დიდებული კაცია. ვფიქრობ, რომ გატუზოსთან ერთად "მილანი" ძველ დიდებას დაიბრუნებს."

დასასრულს, კალინიჩმა ისაუბრა ჩინურ ვარიანტზე, როდესაც ჯერ კიდევ "ფიორენტინაში" აგორებდა ბურთს:

"როდესაც ფლორენციაში ვთამაშობდი, მაშინ მივიღე ძალიან საყურადღებო წინადადება ჩინეთიდან, სადაც დიდ ფულზე იყო ლაპარაკი. მაგრამ ფეხბურთის სიყვარული კიდევ სხვაა, ყველაფერი ფული ხომ არ არის?! თუ ოდესმე ჩინეთში წასვლა გადავწყვიტე, ეს კარიერის ბოლოს იქნება. ჯერ გადაწყვეტილი მაქვს უმაღლეს დონეზე გავაგრძელო თამში. ჩინეთში ბედნიერი არ ვიქნებოდი, ოჯახიც არ მეყოლებოდა იქ კარგად."

ხორვატიის ნაკრებმა მისი არსებობის ისტორიაში რუსეთში საუკეთესო შედეგი დააფიქსირა. კალინიჩიც ამ ისტორიის ნაწილი უნდა ყოფილიყო, თუმცა შეცვლაზე შესვლა იუარა ფეხბურთელმა და, როგორც ჩანს, ამას ახლა ძალიან ნანობს:

"რა მოხდა მსოფლიო ჩემპიონატზე? ამაზე ხალხი ბევრს ლაპარაკობს. ეს უკვე წარსულია, ლაპარაკს რაღა აზრი აქვს?! რაც მოხდა მოსაყოლად დიდი ისტორიაა. ძალიან მინდა დავბრუნდე ნაკრებში, ჩემი მხრიდან გახსნილი ვარ, ხოლო რაც მოხდა - მეტისმეტად მძიმე გამოცდილებაა."

ნიკოლა კალინიჩის ისტორია: სიყვარული ფულზე ძვირფასია

უახლესი ამბები