ქართული სპორტი / ქართული რაგბი /
გურამ გოგიჩაშვილს გულშემატკივრების დახმარება სჭირდება!
05/16/2020 19:25
142
  • ქართველი ბურჯი გამოკითხვაში მონაწილეობს
  • მას გულშემატკივრების მხარდაჭერა სჭირდება

ფრანგული გამოცემა RugbyRama.fr აქვეყნებს საინტერესო სტატიას, რომელიც ახალგაზრდა მარცხენა ბურჯებს შეეხება. საუბარია იმ მოთამაშეებზე, რომლებიც ამ პოზიციაზე მსოფლიო რაგბის მომავალს წარმოადგენენ.

სასიხარულია, რომ ამ გამორჩეულ მორაგბეთა შორის ქართველიც მოხვდა – გურამ გოგიჩაშვილი. ჩვენებური მაშკო ვივასის, დანილო ფისკეტის, ანგუს ბელისა და რის კარესის გვერდით არის მოხსენიებული.

"გოგიჩაშვილის გუნდის სპორტულმა დირექტორმა, იანიკ ნიანგამ მასზე თქვა, რომ მოხიბლულია იმით, რასაც ის 20 წლის ასაკში აკეთებს და თუ მოინდომებს, რომ მსოფლიოს საუკეთესო მარცხენა ბურჯი გახდეს, ამ მიზანს აუცილებლად მიაღწევს.

ის მსოფლიო რაგბის მომავალია და ეს სიტყვები გადაჭარბებული სულაც არ არის. ქართველი მორაგბე რასინგ 92–ში 2018 წლიდან ასპარეზობს და აღსანიშნავია, რომ ადაპტაცია უმოკლეს დროში გაიარა. მან პირველივე სეზონში 23 შეხვედრა ჩაატარა და ნაკრების მაისური ხუთჯერ მოირგო.

ის სრულყოფილი მოთამაშეა, რომელიც ძლიერია შერკინებაში და ძალიან აქტიურია დაცვით თამაშში. შეუძლებელია ხაზი არ გავუსვათ მის მრავალფეროვან თამაშის სტილს. ჩემპიონატის შეწყვეტის გამო, მისი დაბრუნება ტოპ 14–ში არ მომხდარა და სულაც არ იქნება გასაკვირი თუ სექტემბრიდან კიდევ უფრო ძლიერი გახდება", – ნათქვამია სტატიაში გურამ გოგიჩაშვილის შესახებ.

გამოკითხვაში ხმის მიცემა ნებისმიერ გულშემატკივარს შეუძლია. ამისთვის მხოლოდ ლინკზე გადასვლაა საჭირო. ამ მომენტისთვის 3576 ადამიანმა მიიღო მონაწილეობა და ჩვენებური 51%–ით დამაჯერებლად ლიდერობს. მისი უახლოესი მდევარი 18%–ით ანგუს ბელი გახლავთ.

ასევე იხილეთ: გადაწყვეტილება მიღებულია! - ისტორიული ტურნე ვერ შედგება

 

#Flashscore