ჩოგბურთი / ATP /
მარსელო რიოსი: "კარანტინის დამრღვევთა დახვრეტის იდეას მხარს ვუჭერ"
05/17/2020 11:40
113
  • მარსელო რიოსი მედიის ყურადღების ცენტრში მოექცა
  • ჩილელი დახვრეტის იდეას მხარს უჭერს

მსოფლიოს ყოფილი პირველი ჩოგანი, მარსელო რიოსი ფილიპინებში კორონავირუსის პანდემიის გამო შექმნილ სიტუაციას ეხმაურება და აღნიშნავს, რომ მთავრობამ უმკაცრესი ზომები უნდა მიიღოს, რათა სიტუაცია უკეთესობისკენ შეიცვალოს.

როგორც ირკვევა, რიოსი მხარს უჭერს იდეას, რომლის თანახმადაც, კარანტინის პირობების დარღვევისთვის ხალხი შესაძლოა დახვრიტონ. ამ ყველაფერმა კი საზოგადოების დანარჩენ წევრებში შიში უნდა ჩანერგოს, რათა შემდგომ წესები მათ აღარ დაარღვიონ.

გავრცელებული ინფორმაციის თანახმად, ფილიპინების პრეზიდენტის, როდრიგო დუტერტეს გადაწყვეტილებით, პოლიციელებს უფლება აქვთ, რომ კარანტინის დარღვევის შემთხვევაში, ნებისმიერ მოქალაქეს ესროლონ.

"მე ნამდვილად არ ვიცი, როგორი მთავრობა ჰყავს ამ ქვეყანას, თუმცა ზოგჯერ იქმნება ისეთი სიტუაცია, რომ იძულებული ხარ უმკაცრეს ზომებს მიმართო, რათა სხვები გადაარჩინო.

დარწმუნებული ვარ, რომ თუ ორ–სამ ადამიანს ესვრიან, რომლებიც კარანტინის წესებს დაარღვევენ, სხვები ამ ყველაფერს კარგად გაითავისებენ და აუცილებლად დაიცავენ წესებს, რათა შემდგომში მათ ადგილას თავად არ აღმოჩდნენ.

როცა სიტუაცია კონტროლს აღარ ექვემდებარება, ნებისმიერმა სახელმწიფომ უნდა გამოიყენოს ძალაუფლების მსგავსი ფორმები. სხვა გამოსავალი ზოგჯერ არ არსებობს. კარანტინის დამრღვევთა დახვრეტის იდეას მხარს ვუჭერ. ეს ჩემი პირადი აზრია", – აცხადებს მარსელო რიოსი სოციალური ქსელის მეშვეობით.

მიუხედავად იმისა, რომ ჩილელ ჩოგბურთელს დიდი სლემის ტურნირი არასოდეს მოუგია და მისი საუკეთესო შედეგი 1998 წელს, ავსტრალიის ღიას ფინალში გასვლა გახლდათ, ის ამ წელს გარკვეული პერიოდის განმავლობაში რეიტინგს სათავეში ედგა.

ასევე იხილეთ: ფედერერი ქველმოქმედებას განაგრძობს

 

#Flashscore