რაგბი / 6 ერი /
პიშო: "ექვსი ერის ქვეყნები, რაგბის განვითარებას აფერხებენ"
05/20/2020 17:32
166
  • აუგუსტინ პიშომ დუმილი დაარღვია
  • არგენტინელი ექვსი ერის წევრებს ადანაშაულებს

მოგეხსენებათ, რომ მსოფლიო რაგბის საპრეზიდენტო არჩევნებში, მოქმედი პრეზიდენტის, ბილ ბომონტის კონკურენტი აწ.უკვე ყოფილი ვიცე–პრეზიდენტი, აუგუსტინ პიშო გახლდათ.

საბოლოო შედეგები, დაახლოებით ათი დღით ადრე გახდა ცნობილი და გაირკვა, რომ ინგლისელმა პოსტი შეინარჩუნა და ის მომდევნო ოთხი წლის განმავლობაშიც უხელმძღვანელებს მსოფლიო რაგბის. 

ბომონტმა 28 ხმა მიიღო, ხოლო პიშომ 23. როგორც უკვე მოგახსენეთ, საქართველომ მხარი არგენტინელ კანდიდატს დაუჭირა, რადგან მიიჩნეოდა, რომ მისი პრეზიდენტობის შემთხვევაში, "ბორჯღალოსნებს" ექვსი ერის გათამაშებაში მოხვედრის მეტი შანსი ექნებოდათ.

მარცხის შემდეგ, პიშომ ბილს გამარჯვება სოციალური ქსელის მეშვეობით მიულოცა, წარმატებები უსურვა და დასძინა, რომ ამჯერად მას არ გაუმართლა. არგენტინულ რადიოსთამ მიცემულ ინტერვიუში კი აუგუსტინმა ექვსი ერი გააკრიტიკა.

"განვლილმა არჩევნებმა გვანახა, რომ მსოფლიო რაგბის 70% მხარს ჩვენ გვიჭერს, თუმცა ეს საკმარისი არ აღმოჩნდა, რადგან ექვსი ერის წევრ ევროპულ ქვეყნებს, დიდი გავლენა აქვთ. ისინი ყველაფერს აკონტროლებენ და საერთოდ არ ფიქრობენ სპორტის ამ სახეობის წინსვლაზე.

ექვსი ერის ქვეყნები, რაგბის განვითარებას აფერხებენ. გამოგიტყდებით და გეტყვით, რომ ჩემთვის გასაკვირი იყო აფრიკის არჩევანიც. სამხრეთ ამერიკა და რაგბი არგენტინა ამაყები ვართ, რომ მხარი ისეთმა ქვეყნებმა დაგვიჭირეს, როგორებიც არიან აშშ, ახალი ზელანდია, ავსტრალია და სამხრეთ აფრიკა.

ახლა კი ისღა დაგვრჩენია, რომ დაველოდოთ და ვნახოთ, როგორ უხელმძღვანელებს მსოფლიო რაგბის ინგლისურ–ფრანგული დომინაცია. იმ შემთხვევაში თუ სათანადო ცვლილებები არ მოხდება, ჩვენ ბრძოლას კვლავ გავაგრძელებთ", – აცხადებს აუგუსტინ პიშო.

არჩევნებში კი ხმები შემდეგნაირად გადანაწილდა.

ბომონტი – 28 ხმა: ინგლისი (3), საფრანგეთი (3), იტალია (3), ირლანდია (3), უელსი (3), შოტლანდია (3)
რაგბი ევროპა (2), იაპონია (2), რაგბი აფრიკა (2), რაგბი ჩრდილოეთ ამერიკა (1)
კანადა (1), ფიჯი (1), სამოა (1)

პიშო – 23 ხმა: ავსტრალია (3), სამხრეთ აფრიკა (3), ახალი ზელანდია (3), არგენტინა (3), სუდამერიკანა რაგბი (2), რაგბი აზია (2), ოკეანეთის რაგბი (2), რაგბი ჩრდილოეთ ამერიკა (1), რუმინეთი (1), ურუგვაი (1), აშშ (1), საქართველო (1).

ასევე იხილეთ: ბომონტი იაპონიისთვის მიცემულ პირობას შეასრულებს

 

#Flashscore