სხვა / კრივი /
პორშეს ყოფილი ტოპ მენეჯერი ტაისონთან ბრძოლას ითხოვს
05/20/2020 21:30
186
  • პორშეს ყოფილი ტოპ მენეჯერი და გერმანელი პოლიტიკოსი ტაისონთან ბრძოლას ითხოვს
  • უვე ჰუკი საქმის მოგვარებას უკვე შეუდგა

BNN–ის ცნობით, მას შემდეგ, რაც გერმანელმა მაიკ ტაისონის სენსაციური დაბრუნების შესახებ შეიტყო, გადაწყვიტა, რომ ამერიკელს რინგზე თავად დაუპირისპირდეს და როგორც ირკვევა, შესაბამის პირებს, ამ საკითხის მოგვარება უკვე დაავალა.

უვე ჰუკი აპირებს, რომ "რკინის მაიკთან" შეხვედრამდე, მოსამზადებელ პერიოდში არნოლდ შვარცნეგერი და ვლადიმირ კლიჩკო დაიხმაროს. მოგეხსენებათ, რომ პორშეს ყოფილ ტოპ მენეჯერს ერთი ბრძოლა პროფესიონალ მოკრივესთან უკვე გამართული აქვს. ის წარსულში სამხრეთ აფრიკელ ფრანსუა ბოტას დაუპირისპირდა.

"მე ამერიკაში ნამდვილად მყავს ისეთი მეგობრები, რომლებიც ახლავე დაიწყებენ მაიკ ტაისონთან მოლაპარაკებებს. მე დაგეგმილი მაქვს, რომ შევხვდე არნოლდ შვარცნეგერსაც. რომ არა პანდემია, ყველაფერი გაცილებით მარტივად იქნებოდა და მოვლენები უფრო სწრაფად განვითარდებოდა.

ვესაუბრე ვლადიმირ კლიჩკოს, რომელმაც პირობა მომცა, რომ თუ ტაისონი ჩემთან შეხვედრას დათანხმდება, ის ჩემი მწვრთნელი იქნება. მან კარგად იცის, როგორ შეიძლება მაიკისთან ბრძოლა. მე მესმის, რომ დისტანცია რეგულარულად უნდა ვაკონტროლო. წინააღმდეგ შემთხვევაში, მას შეუძლია რამდენიმე ძლიერი დარტყმით უბრალოდ მომკლას, რაც ნამდვილად არ მსურს, თუმცა ლეგენდარულ ამერიკელთან შეხვედრა ჩემთვის საინტერესო გამოწვევაა", – ამბობს უვე ჰუკი.

როგორც უკვე მოგახსენეთ, ტაისონი რამდენიმე საჩვენებელი ბრძოლის გამართვას გეგმავს და ის ამ ყველაფერს საქველმოქმედო მიზნით აკეთბს. მაიკთან ბრძოლის სურვილი უკვე გამოთვა ევანდერ ჰოლიფილდმაც, რომელიც ტრილოგიისთვის მზად არის.

რამდენიმე დღის წინ კი შენონ ბრიგსმა განაცხადა, რომ მაიკ ტაისონი მასთან ბრძოლას დათანხმდა და ახლა ისინი მხოლოდ ფინანსურ საკითხებს აგვარებენ, რის შემდეგაც შოუს თარიღი ცნობილი გახდება.

ასევე იხილეთ: ტაისონმა მოჰამედ ალისთან სავარაუდო ბრძოლის შედეგზე ისაუბრა

 

#Flashscore