კალათბურთი / ნაკრებები /
საქართველოს ნაკრების კალათბურთელები კარიერას საფრანგეთში გააგრძელებენ
05/21/2020 10:15
94
  • ორივემ კონტრაქტი უკვე გააფორმა
  • თსუ-მ ლიდერები დაკარგა

საქართველოს ეროვნული ნაკრების ახალგაზრდა წევრები – 21 წლის გიორგი კორსანტია და 22 წლის გიორგი ტურძილაძე კარიერას საფრანგეთში გააგრძელებენ. ნაკრებთან ერთად თსუ-შიც თანაგუნდელმა პერსპექტიულმა კალათბურთელებმა კონტრაქტი საფრანგეთის MN 1 დივიზიონის გუნდებთან გააფორმეს. გიორგი ტურძილაძემ კლუბ რუეილის მაისური მოირგო, ხოლო გიორგი კორსანტიამ – კაენის.

ორივე გუნდი საფრანგეთის რანგით მე-3 დივიზიონში თამაშობს და ამბიციიდან გამომდინარე, საფეხურით მაღლა მდგომ, PRO B-ში გადასვლას უმიზნებენ. შეგახსენებთ, რომ ორივე კალათბურთელს საქართველოს ეროვნულ ნაკრებში დებიუტი გასულ თებერვალს, ევროპის ჩემპიონატის შესარჩევი ტურნირის მატჩში, შვეიცარიასთან ჰქონდა. ტურძილაძე სუპერლიგის ჩემპიონობის ერთ-ერთ კანდიდატ თსუ-ს ქულებში (16.8) ლიდერობდა , ხოლო კორსანტია – მოხსნებში (11.5). ორივე მათგანს წარმატებული სეზონი ჰქონდა და ცხადია, როგორც ქართული, ისე უცხოური კლუბებისგანაც არაერთი შემოთავაზება მიიღო.

ორივე მათგანს საკუთარ კლუბში არაერთი ლეგიონერი დახვდება. კორსანტიას გუნდში 2 ლიეტუველი და 5 აფრიკელი კალათბურთელია, ხოლო ტურძილაძის რუეილში ამერიკელი, ბოსნიელი და შვეიცარიელი კალათბურთელები არიან. 

გიორგი კორსანტია:

“წლევანდელმა კარგად ჩატარებულმა სეზონმა და ეროვნული ნაკრების შემადგენლობაში გამოჩენამ ევროპის სხვადასხვა გუნდის დაინტერესება განაპირობა, ამ ეტაპზე არჩევანი ფრანგულ გუნდ კაენზე შევაჩერე, რომელთანაც კონტრაქტი უკვე გავაფორმე და შემდეგ სეზონში მის ღირსებას დავიცავ, მადლობა მინდა გადავუხადო გუნდ თსუ-ს და საქართველოს ეროვნულ ნაკრებს, რომლებსაც ჩემს კარიერულ წინსვლაში დიდი წვლილი მიუძღვით”.

გიორგი ტურძილაძე:

“2 კვირის წინ დამიკავშირდა ფრანგული კლუბი, რომელთანაც ხელშეკრულება 2 დღის წინ გავაფორმე. რა თქმა უნდა, ნაკრებში გამოვლილმა პერიოდმა დიდი როლი ითამაშა. იმ ორმა თამაშმა, სადაც, ასე ვთქვათ, უფრო გამოვჩნდი. ეს გუნდი არ არის პირველი დივიზიონის და მე მქონდა სხვა, უფრო ძლიერი დივიზიონებიდან შემოთავაზება, მაგრამ ამჯერად ვარჩიე ეს ლიგა, რომელიც საფრანგეთში რანგით მესამეა. ეს არ არის სუსტი დივიზიონი. ჩემთვის, ასე ვთქვათ, მნიშვნელოვანი ეტაპია გასავლელი იქ, რის შემდეგაც, უფრო რეალური შემოთავაზება მექნება ტოპ-ლიგებიდან”. 

ასევე იხილეთ: სანდრო მამუკელაშვილი გასულ სეზონზე, მომავალ დრაფტზე და ეროვნულ ნაკრებზე

 

მომზადებულია GBF.GE-ს მიხედვით

 
#Flashscore