საქრთველოს ნაკრებმა D ლიგაში საუკეთსო მაჩვენებელი დააფიქსირა: 4-დან 4 მატჩი მოიგო, 12 ქულას მოუყარა თავი, გაიტანა 9 გოლი და საკუთარ კარში არცერთი(!) არ მიუღია. D ლიგაში მხოლოდ ვლადიმერ ვაისის შეგირდებმა მოახერხეს ქულათა მაქსიმუმის მოპოვება.

ქართველები ამჯერად ლატვიელებს დაუპირისპირდნენ და მარტივად შეძლეს მეტოქის დამარცხება. თბილისური მატჩისგან განსხვავებით, ბალტიისპირელებმა ,,ავტობუსი“ აღარ ჩააყენეს საჯარიმოში და შეტევა სცადეს - მეტი გზა არც ჰქონდათ, მხოლოდ გამარჯვება თუ დაუტოვებდათ ჯგუფში გამარჯვების შანსს - რითაც კარგად ისარგებლეს ,,ჯვაროსნებმა“ და სამი უპასუხო გოლი გაიტანეს.

ქართველმა ფეხბურთელებმა აქტიურად დაიწყეს. უკვე მეოთხე წუთზე, მერებაშვილმა მოიპოვა ჩვენი ნაკრებისთვის პენალტის დარტყმის უფლება - მის მიერ საჯარიმოში გაგზავნილი ბურთი ხელით შეაჩერა ლატვიელთა მცველმა. თერთმეტმეტრიანის ნიშნულთან ვაკო ყაზაიშვილი მივიდა, თუმცა ქართველთა შემტევმა ამჯერად გოლის გატანა ვერ მოახერხა. ჩვენი ბიჭები ამაზე არ გაჩერდნენ, შეტევებს შეტევები მიაყოლეს და უკვე მეათე წუთზე გახსნეს ანგარიში: საჯარიმოდან გადმოვარდნილი ბურთი ჯაბა კანკავამ ერთი შეხებით გადაგზავნა მეტოქის ცხრიანში და ანგარიში გახსნა.

მატჩის მიმდინარეობისას ნათლად ჩანდა კლასში ჩვენი ფეხბურთელების უპირატესობა. ქართველები კარნახობდნენ მეტოქეს თამაშს, უტევდნენ მაშინ როდესაც მოესურვებოდათ და თავსაც ხეირიანად იცავდნენ. განსაკუთრებული აღნიშვნის ღირსია გიორგი ჩაკვეტაძე. ვლადიმერ ვაისმა ქართველი ტალანტი ამჯერად გამთამაშებლად ათამაშა და მას დაავალა ჩვენი ნაკრების შეტევებისთვის ეხელმძღვანელა. 29-ე წუთზე გიორგიმ ელეგანტური მოძრაობებით გზიდან სამი მეტოქე ჩამოიცილა, მეკარესთან პირისპირ დატოვა ვაკო გვილია, რომელსაც ანგარიშის ორამდე გაზრდა აღარ გასჭირვებია.

მესამე გოლი მატჩის მშვენება გამოვიდა: ქართველთა კონტრ-შეტევისას ჩაკვეტაძემ მარცხენა ფლანგზე მიიღო ბურთი, მოატყუა ორი ფეხბურთელი, ცრუ მოძრაობით დააწვინა მეკარეც და საბოლოო ანგარიში (3:0) დააფიქსირა. ამ ეპიზოდმა გაგვახსენა ბეილის მიერ გატანილი გოლი ,,ბარსელონას“ კარში, როდესაც უელსელმა ფეხბურთელმა მარცხენა ფლანგზე მარკ ბარტრას ჩამოცილება მოახერხა.

ამ გამარჯვებით საქართველოს ნაკრებმა პირველი ადგილი გაინაღდა ჯგუფში, რაც იმას ნიშნავს, რომ წინ play-off-ის ორი თამაში მოგველის, სადაც D ლიგის სხვა ჯგუფების გამარჯვებულებთან მოგვიწევს საუკეთესოს გამოვლენა. იქაც თუ გავიმარჯვეთ, ევროპის ჩემპიონატზე გავემგზავრებით.

,,ევროპამდე" Play-off დარჩა!

ასევე იხილეთ

უახლესი ამბები