კალათბურთი / NBA /
NBA დაიჯესტი - დეროუზანის შინ დაბრუნება, სეზონის მატჩი ოკლაჰომაში
02/23/2019 11:44
626

დემარ დეროუზანი ჩრდილოეთში დაბრუნდა. ტორონტო რაპტორსმა სან ანტონიო სპურსს უმასპინძლა და ბოლო წამებზე, დაძაბულ ბრძოლაში დაამარცხა. სპურსის რიგებში გამორჩეული სწორედ დემარი გახლდათ. სან ანტონიოს მცველმა 23 ქულა და 8 შედეგიანი გადაცემა მიითვალა, თუმცა ბოლო წამებზე მოედნის ცენტრში ბურთი დაკარგა და ტორონტომ სწორედ ამის ხარჯზე იმარჯვა. კავაი ლეონარდმა სწრაფი გარღვევით ორი ქულა მიითვალა, ჯამში 25 დააგროვა და თავის გუნდს 120-117 მოაგებინა.

ნამდვილი დრამა ვიხილეთ ოკლაჰომაში. იუტა ჯაზმა ვესტის ერთ-ერთ ლიდერს დიდი ბრძოლა გაუწია, თუმცა ორი ოვერტაიმის შემდეგ პოლ ჯორჯის (15ქ/9მ/7პ) გეიმ ვინერს ვერაფერი მოუხერხა. რასელ ვესტბრუკმა 43 ქულა, 15 მოხსნა და 8 შედეგიანი გადაცემა მიითვალა. სტუმრებისგან დონოვან მიჩელი (38ქ/5პ) და რუდი გობერი (26ქ/16მ) გამოირჩნენ. ოკლამ ჯაზი 148-147 დაამარცხა.

დაძაბული შეხვედრა მოიგო ზაზა ფაჩულიას დეტროიტმა. მიჩიგანელები ატლანტას ესტუმრნენ და გუნდის ახალწვეულის, ტონ მეიკერის სამქულიანი გეიმ ვინერით იმარჯვეს. პისტონსის შემადგენლობაში საუკეთსო ანდრე დრამონდი (26ქ/21მ/5ჩ) გახლდათ, ხოლო რეჯი ჯეკსონმა 32 ქულა და 8 შედეგიანი გადაცემა მიითვალა. ტრეი იანგის (30ქ/10პ) ორმაგი დუბლი ჰოუქსისთვის საკმარისი არ აღმოჩნდა, დეტროიტმა 125-122 იმარჯვა.

ლორი მარკანენმა (25ქ/11მ) ჩიკაგოს მოაგებინა. ბოლო წამზე შესრულებული ორი ზუსტი საჯარიმო ორლანდოში 110-109 მოსაგებად საკმარისი აღმოჩნდა. ზაკ ლავინმა 22 ქულა მიითვალა, ხოლო მასპინძელთაგან ევან ფურნიე (22ქ/5პ) და ნიკოლა ვუჩევიჩი (19ქ/13მ) გამოირჩნენ. 

ლოს ანჯელეს კლიპერსი პლეიოფისთვის ბრძოლას განაგრძობს. დოკ რივერსის შეგირდები მემფისს ეწვივნენ და მონტრეზ ჰარელის ლიდერობის (30ქ) 112-106 იმარჯვეს. გრიზლისის შემადგენლობაში მაიკ კონლიმ (25ქ/10პ) და იოაკიმ ნოამ (22ქ/11მ) ორმაგი დუბლები შეასრულეს, თუმცა ეს გამარჯვებისთვის საკმარისი არ აღმოჩნდა.

დენვერ ნაგეთსი გოლდენ სტეიტს არ ეშვება. კოლორადოელებმა სტუმრად დალას მავერიკსი დაამარცხეს და პირველი ადგილისთვის ბრძოლას განაგრძობენ. ნიკოლა იოკიჩის (19ქ/13მ/8პ) ლიდერობით, ნაგეთსმა ტექსასში 114-104 იმარჯვა და სეზონში უკვე 40 მოგება დააგროვა.

დიდი ანგარიშით მოიგო ინდიანა პეისერსმა. როგორ ჩანს ნიუ ორლეანსს ლიგის მიერ დაწესებული ჯარიმა დიდად არ ადარდებს, ენტონი დევისმა გუშინდელ შეხვედრაში მხოლოდ 19 წუთი ითამაშა. ინდიანას რიგებში ახალწვეული ვესლი მეთიუზი გამოირჩა, რომელმაც 24 ქულა მიითვალა, ხოლო დომანტას საბონისმა უკვე ტრადიციულად მორიგი ორმაგი დუბლი 18 ქულითა და 13 მოხსნით შეასრულა. პეისერსმა პელიკანსს 126-111 მოუგო.

ბრედლი ბილის ვაშინგტონში ყურება ნამდვილი ტანჯვაა. ვიზარდსის მცველმა გუშინ ფენომენალური მატჩი ჩაატარა, 47 ქულა, 6 მოხსნა და 7 შედეგიანი გადაცემა შეასრულა, თუმცა დედაქალაქელებმა 110-123 წააგეს. მასპინძელთაგან ორმაგი დუბლით კემბა უოლკერი (27ქ/11) გამოირჩა და შარლოტი პლეიოფისთვის იბრვის.

მინესოტამ ნიუ იორკში კარლ ენტონი თაუნზის გარეშე მოიგო. დერიკ როუზის (20ქ) და ტაჯ გიბსონის (19ქ/10მ) ლიდერობით მინეაპოლისელებმა "მედისონ სქუეარ გარდენში" 115-104 მოიგეს. 

 

#Flashscore