კალათბურთი / NBA /
NBA დაიჯესტი - სენსაცია ოკლენდში, თაუნზმა ოკლაჰომა არ დაინდო
03/06/2019 12:07
702

ნაციონალური საკალათბურთო ასოციაციის ბოლო კვირები ლიდერებისთვის რთულად წარიმართა. ასეთი გახლდათ გუშინდელი ღამეც. გოლდენ სტეიტ უორიორზმა შინ ბოსტონ სელტიკსი მიიღო და მოულოდნელად დიდი ანგარიშით, 95-128 დამარცხდა. სტეფ კარის 23-ქულიან პერფომანსს სტუმართაგან გორდონ ჰეივარდმა (30ქ/7მ) უპასუხა, ხოლო კაირი ირვინგმა ორმაგი დუბლი 19 ქულითა და 11 შედეგიანი გადაცემით გაიფორმა.

ოკლაჰომა სიტი თანდერს პოლ ჯორჯის გარეშე ძალიან უჭირს. რასელ ვესტბრუკის (38ქ/13მ/6პ) შესანიშნავი თამაშის მიუხედავად მინესოტა ტიმბერვულვზმა ოკლა დიდი ანგარიშით, 131-120 დაამარცხა. გამორჩეული გახლდათ კარლ ენტონი თაუნზი, რომელიც ავარიის შემდეგ საოცრად თამაშობს. "მგლების" ახალგაზრდა ვარსკვლავმა ორმაგი დუბლი 41 ქულითა და 14 მოხსნით შეასრულა.

შთამბეჭდავი გამარჯვება მოიპოვა ჰიუსტონ როკეტსმაც. ჯეიმს ჰარდენის (35ქ) ლიდერობით "რაკეტებმა" კანადაში 107-95 მოიგეს. მასპინძელთაგან 26 ქულით კავაი ლეონარდი გამოირჩა, თუმცა ტორონტომ გადამწყვეტ მეოთხედში დიდი ანგარიშით წააგო.

მაიკ კონლიმ შინ პორტლენდ ტრეილ-ბლეიზერსი დაამარცხა. მემფისის ლიდერმა 40-ქულიანი პერფომანსი შემოგვთავაზა და გრიზლისმა ღამის ერთ-ერთი მთავარი სენსაცია დააფიქსირეს. დემიენ ლილარდის (24ქ/8პ) და სი ჯეი მაკკალუმის (27ქ) კარგ თამაშს თანაგუნდელებმა მხარი ვერ აუბეს და პორტლენდი 111-120 დამარცხდა. 

ფილადელფია სიქსერსი ჯოელ ემბიდის გარეშე მოგებებს განაგრძობს. გასული კვირის საუკეთესო მოთამაშემ, ბენ სიმონსმა 16 ქულა, 13 მოხსნა და 8 შედეგიანი გადაცემა შეასრულა და "უელს ფარგო ცენტრში" მასპინძლებმა 114-106 იმარჯვეს. თამაშის საუკეთესო 26-ით ჯეი ჯეი რედიკი გახდა, ხოლო სტუმართაგან ევან ფურნიე (25ქ) გამოირჩა.

ბოიან ბოგდანოვიჩმა ოლადიპოს არყოფნაში ინდიანა პეისერსის ლიდერობა თავის თავზე აიღო. 27-ქულიანი მატჩის წყალობით ინდიანაპოლისში მასპინძლებმა ჩიკაგო ბულსი 105-96 დაამარცხეს. ზაკ ლავინის (27ქ) კარგი თამაშის მიღმა ბულსს არაფერი შემოუთავაზებია და პეისერსი ოთხეულის განაღდებას განაგრძობს.

 

#Flashscore