ფეხბურთი / ქართული ფეხბურთი /
ვაისი: "კვერკველიას ყველანაირი მონაცემი აქვს იმისთვის, რომ ინგლისში ითამაშოს"
03/16/2019 16:50
535

საქართველოს ფეხბურთელთა ეროვნული ნაკრების მთავარმა მწვრთნელმა, ვლადიმირ ვაისმა რუსულ გამოცემა Известия-სთან ისაუბრა.

ვაისმა რუსულ გამოცემასთან საქართველოს ეროვნულ ნაკრებსა და რუსეთის პრემიერ ლიგაში მოასპარეზე ქართველ ფეხბურთელებზეც ისაუბრა.

სლოვაკი სპეციალისტის აზრით, ეროვნული ნაკრებისა და მოსკოვის ლოკომოტივის ცენტრალურ მცველს, სოლომონ კვერკველია ყველანაირი მონაცემი აქვს იმისთვის, რომ ინგლისის პრემიერ ლიგაში ითამაშოს.

"ვიცი, რომ სოლომონ კვერკველიას ლესტერიდან შემოთავაზება ჰქონდა. მასთან ამ თემაზე ვისაუბრე კიდეც. რა თქმა უნდა, ბევრ ფეხბურთელს ინგლისისა და ესპანეთის ჩემპიონატებში თამაში სურთ, თუმცა ზოგიერთი მათგანი რუსეთში თამაშზე ოცნებობს. ერთ-ერთი მათგანია სოლომონი. მან რთული გზა გამოიარა: იყო მძიმე პერიოდი რუბინში, სადაც სათამაშო დრო ხშირად არ ეძლეოდა. ახლა ის ლოკომოტივის ღირსებას იცავს და ჩემის აზრით, რუსეთის პრემიერ ლიგის გასული სეზონში საუკეთესო ცენტრალური მცველი იყო. მისით კმაყოფილი ვარ, ის კარგი ბიჭი და შესანიშნავი ფეხბურთელია. მან მითხრა, რომ კლუბი მას ახალ კონტრაქტს სთავაზობს, რაც იმას ნიშნავს, რომ ლოკომოტივი კვერკველიას აფასებს და პატივს სცემს. ის, რომ ლესტერი მას კონტრაქტს სთავაზობდა, სოლომონისთვის კარგი რეკლამაა.

ვფიქრობ, რომ კვერკველიას ყველანაირი მონაცემი აქვს იმისთვის, რომ ინგლისის პრემიერ ლიგაში ითამაშოს. ის თავით კარგად თამაშობს და მისი აღნაგობის მიუხედავად, სისწრაფეც აქვს. 2018 წლის მსოფლიო ჩემპიონატის საკვალიფიკაციო ეტაპზე უელსის წინააღმდეგ ვითამაშეთ. გარეტ ბეილმა კი კვერკველიას ვერაფრით აჯობა. ასეთი მომენტები ცხოვრების მანძილზე გვამახსოვრდება და ბევრ რამეზე საუბრობს", - განაცხადა ვაისმა.

"ყატარში რუსეთის თასს დავესწარი, რისი ერთ-ერთი მიზეზიც ჯანო ანანიძე იყო, თუმცა მან სპარტაკი დატოვა. მასთან ამ საკითხზე დიდი ხანი ვსაუბრობდი. ცხადია, რომ მას მეტი სათამაშო დრო სჭირდება და კრილია ამის შესაძლებლობას იძლევა. სამარელებს ჩემი კარგი მეგობარი, მიოდგარ ბოჟოვიჩი წვრთნის, რომელმაც ჯანოს ძლიერი მხარეები შესანიშნავად იცის. იმედი მაქვს, მას კრილია სოვეტოვში ბევრი სათამაშო დრო ექნება. ეს მისთვისაც კარგი იქნება და საქართველოს ეროვნული ნაკრებისთვისაც", - აღნიშნა ვაისმა.

საქართველოს ეროვნული ნაკრების მთავარ მწვრთნელს ასევე თორნიკე ოქრიაშვილის შესახებაც ჰკითხეს, რომელმაც მიმდინარე სეზონში კრასნოდარი დატოვა და ახლა თავისუფალი აგენტია.

"თორნიკე ფანტასტიკური ფეხბურთელია. მას შეუძლია რუსეთის ჩემპიონატის წამყვან კლუბებში ითამაშოს. ამავდროულად, ვფიქრობ, რომ ოქრიაშვილი სათამაშო სტილით ესპანეთის ჩემპიონატსაც მოუხდებოდა. თუმცა მას არასასოამოვნო ტრავმები ჰქონდა. საბოლოო ჯამში კი მან თავად გადაწყვიტა კრასნოდარი დაეტოვებინა, თუმცა ზუსტი მიზეზები არ ვიცი. მას ვესაუბრე, თორნიკე კლუბს ეძებს, თუმცა ეს არც ისე მარტივია, მითუმეტეს ასეთი ტრავმების შემდეგ", - განაცხადა ვაისმა.

ინტერვიუს ბოლოს ვლადიმირ ვაისი საქართველოს ეროვნულ ნაკრებს, ერთა ლიგასა და ევროპის ჩემპიონატის საკვალიფიკაციო ეტაპსაც შეეხო.

"პირველ რიგში, ძალიან კარგია, რომ ერთა ლიგაზე ჩვენი ჯგუფი მოვიგეთ. ეს ევროპის ჩემპიონატის ფინალურ ეტაპზე თამაშის დამატებითი შანსი იქნება. საკვალიფიკაციო ეტაპზე საკმაოდ ძლიერ ჯგუფში მოვხვდით. ჩვენ ძალიან შორს არ ვიხედებით. კონცენტრაციას კონკრეტულ მატჩებზე მოვახდენთ. პირველ მატჩში შვეიცარიას დავუპირისპირდებით, რომელიც ძალიან ძლიერი გუნდია და ჩვენთვის მათთან თამაში მარტივი არ იქნება. ჩვენ გვსურს, რომ მოვიგოთ", - ამბობს ვაისი.

შეგახსენებთ, რომ საქართველოს ეროვნული ნაკრები ევროპის ჩემპიონატის საკვალიფიკაციო ეტაპის პირველ ორ მატჩს 23-26 მარტს გამართავს. 23 მარტს საქართველოს ნაკრები შვეიცარიას დიანმო არენაზე უმასპინძლებს, ხოლო 26 მარტს ჩვენი გუნდი ირლანდიას ესტუმრება.