კალათბურთი / NBA /
NBA დაიჯესტი - რასელის კარიერის ღამე, კარიმ მინესოტა არ დაინდო
03/20/2019 11:19
1031

ლოს ანჯელეს ლეიკერსმა დიანჯელო რასელი ლონზო ბოლს და ტიმოფეი მოზგოვის საშინელ კონტრაქტს შესწირა. ეს ქმედება გუშინ ღამემდეც კრიტიკის ობიექტი გახლდათ, ვინაიდან ბრუკლინის გამთამაშებელმა თავისი პირველი ოლ სტარ თამაში უკვე ჩაატარა და ნიუ იორკული გუნდის უდაო ლიდერად მოგვევლინა. მიუხედავად ამისა, საკრამენტოში ჩატარებულმა შეხვედრამ რასელისადმი სრული აღფრთოვანება გამოიწვია.

დიანჯელომ კინგსს 44 ქულა (22 გადამწყვეტ მეოთხედში) ჩაუგდო და 12 შედეგიანი გადაცემა შეასრულა და თავის გუნდს ბოლო პერიოდში 45-18 მოგების შემდეგ ურთულესი მატჩი 123-121 მოაგებინა. რასელის კარიერის ღამეს მარვინ ბეგლიმ (28ქ/7მ) და დი აარონ ფოქსმა (27ქ/9პ) უპასუხეს, თუმცა საკრამენტომ შეხვედრა მაინც დათმო.

კარლ ენტონი თაუნზი მინესოტა ტიმბერვულვზისთვის ზედმეტად კარგია. ეს აზრი ჯიმი ბატლერის გაცვლის შემდეგ ნელ-ნელა ფაქტად იქცა და დღეს ამაზე ძალიან ცოტა თუ კამათობს. კარლმა გოლდენ სტეიტთან შეხვედრაში ორმაგი დუბლი 26 ქულითა და 21 მოხნსნით შეასრულა, თუმცა მინეაპოლისში ტიმბერვულვზი უორიორზთან 107-117დამარცხდა. სტეფ კარის ლიდერობით (36ქ/5პ) მოქმედმა ჩემპიონებმა დამაჯერებელი გამარჯვება მოიპოვეს.

ლოს ანჯელეს ლეიკერსი ოფიციალურად წამგებ რეჟიმში გადავიდა. ლუკ უოლტონმა ლებრონ ჯეიმსი და ლენს სტივენსონი დაასვენა და შედეგად მილუოკიში კალიფორნიელებმა 101-115 წააგეს. იანის ანტეტოკუნმპოს გარეშეც კი, ეს ლეიკერსი ვისკონსილენთათვის პრობლემას არ წარმოადგენდა. კრის მიდლტონის (30ქ/10მ/5პ) და ბრუკ ლოპესის (29ქ/9მ) ლიდერობით ბაქსმა მარტივად მოიგო.

ემბიდის გარეშე მოიგო ფილადელფია სიქსერსმა. ბენ სიმონსის (28ქ/8მ/5პ), ტობაიას ჰარისის (22ქ/11მ) და ჯიმი ბატლერის (23ქ/9მ) ერთობლივი ძალისხმევით პენსილვანიელებმა შარლოტში ჯერემი ლემბი (26ქ/11მ) და კემბა უოლკერი (21ქ) დაძაბულ ბრძოლაში, 118-114 დაამარცხეს.

კვლავ საოცარია ჯეიმს ჰარდენი (30ქ/8მ/10პ), ხოლო ტრეი იანგი (21ქ/12პ) და ჯონ კოლინსი (20ქ/10მ) ატლანტა ჰოუქსს უდიდეს მომავალ უქმნიან. გუშინდელი შეხვედრა ვეტერანების გამარჯვებით დასრულდა. ლიგის ყველაზე "მოხუცმა" გუნდმა ჯორჯიის შტატში მარტივად, 121-105 იმარჯვა.

ლოს ანჯელეს კლიპერსმა შინ ინდიანა პეისერსი მარტივად, 115-109 დაამარცხა და ამით დასავლეთ კონფერენციის პლეიოფის რეისს საბოლოო წერტილი დაუსვა. დანილო გალინარის (24ქ) და მონტრეზ ჰარელის (20ქ/12მ) ლიდერობით კალიფორნიელებმა ნეიტ მაკმილანის გუნდის დამარცხება მოახერხეს.

#Flashscore