სხვა / ძალოსნობა /
ლაშა ტალახაძის მორიგი რეკორდები და ოქროს მედალი ევროპის ჩემპიონატზე
04/13/2019 18:55
4497
Loading the player...

ბათუმში, სპორტის ახალ სასახლეში ძალოსნობაში, ევროპის ჩემპიონატი ყველაზე პრესტიჟული წონითი კატეგორიით დაიხურა.

ტურნირის დასკვნით დღეს ოლიმპიური ჩემპიონი და პრიზიორი, ლაშა ტალახაძე და ირაკლი თურმანიძე იღებდნენ მონაწილეობას.

ქართველმა ძალოსნებმა აკვრაში პირველ მცდელობისას ყველაზე მძიმე წონები შეუკვეთეს და შესაბამისად, ფიცარნაგზე ბოლოები წარსდგნენ.

ქართველი გოლიათი, ლაშა ტალახაძე კვლავაც ბრწყინვალე იყო და საკუთარი გულშემატკივრების წინაშე კვლავაც წარმოუდგენელ წონებს დაეჭიდა.

აკვრაში ქართველმა ძალოსნებმა სრული ფურორი მოახდინეს. ჩვენი გუნდის კაპიტანმა, ირაკლი თურმანიძემ სამივე ცდა გამოიყენა, საბოლოოდ კი 206 კილოგრამი დასძლია, უახლოეს მდევარს, სომეხ გორ მინასიანს ექვსი კილოთი აჯობა და ევროპის ჩემპიონატზე პირველი მცირე მედალი, ვერცხლი მოიპოვა. 

ოქროს მედალი ცხადია, ლაშა ტალახაძეს ერგო, რომელმაც მხოლოდ ორი მისვლა გამოიყენა, 218 კილოგრამი დასძლია და საკუთარი რეკორდი კვლავ გააუმჯობესა.

ატაცში ქართველი ძალოსნები ისევ საუკეთესოები იყვნენ. 

ირაკლი თურმანიძემ ატაცში სამივე ცდა ბრწყინვალედ შეასრულა, ბოლოს კი 241 კილოგრამი დააფიქსირა და ორჭიდის ჯამში ევროპის ჩემპიონატზე ვერცხლის მედალი მოიპოვა, ხოლო აკვრაში მცირე ვერცხლის მედალს ატაცში ბრინჯაო შემატა.

ლაშა ტალახაძემ კი მორიგი რეკორდი დაამხო. საკუთარი რეკორდი ტალახაძემ ერთი კილოგრამით გააუმჯობესა და ორჭიდის ჯამში 478 კილოგრამი დააფიქსირა. ტალახაძემ აკვრის მსგავსად, ატაცშიც მხოლოდ ორი მისვლა გამოიყენა და სამივე ოქროს მედალი სწორედ მას ერგო.