ქართული სპორტი / ქართული რაგბი /
ქართველი მორაგბეების ბრწყინვალე გამარჯვება !
11/18/2018 10:41
1158

საქართველოს მორაგბეთა ნაკრებმა ნოემბრის ტესტ-მატჩებზე პირველი გამარჯვება მოიპოვა. ბორჯღალოსნების მეტოქე სამოას ნაკრები იყო, რომელიც დღეისათვის მსოფლიო რეიტინგის მე-17 გუნდია.

თამაში საქართველოს ნაკრებისთვის კარგად დაიწყო, თედო აბჟანდაძემ (მან პირველი კეპი მოიხვეჭა) დებიუტშივე მოახერხა საჯარიმო დარტყმით ანგარიშის გახსნა. სტუმრები გონს მალევე მოეგნენ და ლელო დადეს, რომელიც კარგად გარდასახეს. საერთოდ სამოელები მთელი პირველი ნახევრის განმავლობაში დომინირებდნენ და მეტოქეს არანაირ შანსს არ უტოვებდნენ, ისინი ტრადიციულად ძალიან სწრაფად თამაშობდნენ. ბორჯღალოსნები აშკარად დაბნეულები ჩანდნენ და მეორე ლელოც მიიღეს, თუმცა მეტოქის დამრტყმელმა გარდასახვა ხელსაყრელი ადგილიდან გააცუდა. წნეხი იმდენად დიდი იყო, რომ კუნძულელებმა მესამე გარდასახული ლელოც დადეს და მათი უპირატესობა კოლოსალური გახდა.

ქართველთა საქებრად შეიძლება ითქვას, რომ მიუხედავად უსუსტესი პირველი ნახევრისა გუნდმა მაინც მოახერხა ერთი ლელოს გაქვითვა, თავი მე-9 ნომერმა ვასილ ლობჟანიძემ გამოიჩინა, რომელიც აბჟანდაძემ წარმატებით გარდასახა.

პირველი ტაიმი საქართველოს ნაკრებმა 10:19 წააგო.

მეორე ნახევარში საქართველოს ნაკრები გარდაიქმნა, რაც მოსალოდნელიც იყო. ბორჯღალოსანთა შერკინების მოთამაშეები თითქმის თანაბარი დონის არიან და შემცვლელები თამაშს ყველა ჯერზე აძლიერებენ, ასე რომ თუ პირველ ნახევარში სამოა გაძალიანდა, მეორეში ქართველებმა მეტოქე "გადათელეს".
 
ცალკე აღნიშვნის ღირსია აბჟანდაძე-აფრასიძის დუეტი, რომლებმაც საოცარი პერფორმანსი შემოგვთავაზეს. თედომ როგორც კი იგრძნო თამაში და პირველმა მღელვარებამაც გადაუარა, გუნდის გაძღოლაც დაიწყო, რაც მისი ასაკისთვის იდეალურად მოახერხა.
 
ქართველებმა გაილაღეს და მიუხედავად არცთუ კარგად ჩატარებული პირველი ნახევრისა, შეხვედრაში გამარჯვება სრულიად დაიმსახურეს. სწრაფად, ლამაზ სტილში მათ მეტოქის ორჯერ დალელოვებით (აბჟანდაძე ორივე გარდასახა) და ერთი საჯარიმოთი მეტოქის დამარცხება მოახერხეს 27:19.
 
 
ბორჯღალოსნები მომდევნო თამაშს 24 ნოემბერს ტონგას ნაკრების წინააღმდეგ გამართავენ, მატჩი მიხეილ მესხის სტადიონზე 18:00 საათზე დაიწყება.
 
#Flashscore