ფეხბურთი / ლა ლიგა /
რეალის ვარსკვლავები, რომლებიც დაღმასვლას განიცდიან
05/14/2019 13:21
677

მადრიდის რეალმა 2018/2019 წლების საფეხბურთო სეზონი აშკარად ჩააგდო. “სამეფო კლუბი“ სანტიაგო სოლარიმ დატოვა და მის ნაცვლად, მთავარი მწვრთნელის პოსტზე კვლავ ზინედინ ზიდანი დაბრუნდა, მაგრამ გუნდს ვერც ამან უშველა. ზაფხულში, მადრიდულ გრანდში დიდი წმენდაა დაგეგმილი. დღევანდელ გუნდში, რამდენიმე ისეთი ფეხბურთელია, რომლებიც გასულ წლებში ბრწყინავდნენ, მაგრამ დღეს ჩამქრალი ვარსკვლავები უფრო არიან, ვიდრე გუნდის ლიდერები.

ტიბო კურტუა

ბელგიელი მომდევნო სეზონშიც მადრიდში ითამაშებს. კეილორ ნავასის ტრავმის გამო, კურტუამ ბოლო 3 მატჩი ძირითად შემადგენლობაში ჩაატარა, მაგრამ აშკარად ჩანდა, რომ ის ოპტიმალური ფორმისგან შორს იყო. ყველას გვახსოვს, როგორ თამაშობდა ბელგიელი მსოფლიოს 2018 წლის ჩემპიონატზე, დღეს კი, ის თავისივე თავის აჩრდილია. კურტუას რეალთან 5-წლიანი კონტრაქტი აკავშირებს და კლუბის ხელმძღვანელები მას ენდობიან, მაგრამ ბელგიელს დაძაბულობა და ნერვიულობა ყოველ მატჩში ეტყობა.

მარსელო

“მინდა ისეთი მარსელო აღვადგინო, როგორიც ის გასულ წლებში იყო“, - თქვა ზინედინ ზიდანმა მას შემდეგ, რაც რეალში დაბრუნდა. სანტიაგო სოლარის დროს, ბრაზილიელს სათამაშო პრაქტიკის ნაკლებობა ჰქონდა. ბოლო დროს, მარსელო მოედანზე პასიურია, რასაც მისგან მიჩვეულნი არ ვართ. რეალში არსებული კონკურენციიდან გამომდინარე, მარსელოს დროულად მართებს ფორმაში შესვლა. ზიდანი ბრაზილიელს ყოველთვის იცავს და გვერდში უდგას, მაგრამ თუ ასე გაგრძელდება, რეალი მის ჩანაცვლებაზე სერიოზულად დაფიქრდება.

კაზემირო

რეალის კიდევ ერთი ბრაზილიელი, რომელსაც თითქოს გადაღლილობა ეტყობა. ეს “ანოეტაზე“ გამართულ ბოლო მატჩშიც გამოჩნდა, სადაც ნახევარმცველმა ბურთი 12-ჯერ დაკარგა და მხოლოდ 3-ჯერ დაიბრუნა. გარდა ამისა, მან უწყინარ სიტუაციაში ყვითელი ბარათიც მიიღო. ისეთი შთაბეჭდილება იქმნება, თითქოს, კაზემირო უკვე შვებულებაშია და მოედანზევე ისვენებს. რამდენადაც ცნობილია, ზიდანი კაზემიროს ფორმაში შესვლას არ ელოდება და მის პოზიციაზე ნდომბელეს შეძენას ითხოვს.

მარკო ასენსიო

ესპანელს შეტევის მარჯვენა ფრთაზე თამაში სურდა და ზიდანმა მას ამის საშუალება მისცა. ასენსიომ ბეილის უთამაშებლობით ვერ ისარგებლა. ნახევარმცველმა ლა ლიგაში გოლი ბოლოს 22 სექტემბერს გაიტანა. რეალმა ასენსიოს გაყიდვაზე უარი თქვა, მაგრამ ფაქტია, რომ მისი კონკურენტები ესპანელს თანდათან ჩრდილავენ. ასენსიოს ბევრი შრომა მოუწევს იმისთვის, რომ ძირითად შემადგენლობაში ადგილი დაიმკვიდროს.

ისკო

ისკო ზიდანის ერთ-ერთი ფავორიტი ფეხბურთელი ყოველთვის იყო, მაგრამ აშკარაა, რომ ესპანელს ვერც ფრანგის დაბრუნებამ უშველა. კაზემიროსა და მარსელოს მსგავსად, ისკოსაც ეტყობა, რომ ფიზიკურ კონდიციებში მოიკოჭლებს და ისიც დაღლილის შთაბეჭდილებას ტოვებს. ზიდანის დაბრუნების შემდეგ, ისკომ პირველ ორ მატჩში ორივეჯერ გაიტანა, მაგრამ შემდეგ, ისევ ჩაიკარგა. ისკო ზიდანისთვის მნიშვნელოვანი ფიგურაა, მაგრამ თუ ესპანელი ასეთ არადამაჯერებელ თამაშს გააგრძელებს, “სამეფო კლუბი“ მას აუცილებლად გაასხვისებს. რამდენადაც ცნობილია, მისი ხილვა ტურინის იუვენტუსს სურს და შესაძლოა, გარემოს გამოცვლა თავად ისკოსაც წაადგეს.

ტონი კროოსი

მიმდინარე სეზონის ერთ-ერთ მთავარ იმედგაცრუებად სწორედ გერმანელი იქცა. კროოსის არადამაჯერებელი თამაშის გამო, რეალი პოლ პოგბასა და კრისტიან ერიკსენის ტრანსფერებზე დაფიქრდა. ბოლო მატჩებში, კროოსი ორთაბრძოლებში შესვლასაც კი ერიდება. ამის გამო, დიდი შანსია, მან ძირითად შემადგენლობაში ადგილიც კი დაკარგოს.

#Flashscore