რაგბი / სუპერ რაგბი /
ნაიჯელ ოუენსი - სექსუალურ ორიენტაციას ვერ ავირჩევ!
05/18/2019 23:38
237

სრულიად სარაგბო სამყარო (და არა მარტო) უკანასკნელ პერიოდში მხოლოდ და მხოლოდ ავსტრალიელი მორაგბის ისრაელ ფოლაუს ჰომოფობიურ განცხადებაზე საუბრობს, რამაც ავსტრალიელი ფულბექის მოკვეთა გამოიწვია.

სიდნეის ვორათაზის ლიდერი ავსტრალიის რაგბის კავშირის სადისციპლინო კომიტეტმა დამნაშავედ ცნო და კონტრაქტი გაუწყვიტა, რამაც მორაგბეების (განსაკუთრებით კუნძულელების) პროტესტი გამოიწვია, მათ ორგანიზაცია რწმენის და მისი გამოხატვის შეზღუდვაში დაადანაშაულეს. ფოლაუმ კი "ცეცხლზე ნავთი დაასხა" და განაცხადა, რომ ავსტრალიის ნაკრებში დაბრუნება "სატანის სამსახური იქნება".

თუმცა რაგბი განსხვავებით სხვა სპორტებისგან, ყოველთვის გამოირჩეოდა ლგბტ თემის წარმომადგენელთა მიმართ ტოლერანტული მიდგომით და ეგრედ წოდებული "ქამინგ აუთი" არაერთ მორაგბესა თუ ამ სპორტით დაკავებულ სხვა პირებს გაუკეთებიათ.

მათ შორის ერთ-ერთი ასეთი უელსელი არბიტრი ნაიჯელ ოუენსია, რომელიც ბევრის აზრით მსოფლიოს საუკეთესო მსაჯია და მის სიტყვას სარაგბო თემში დიდი ფასი აქვს. მან 2007 წელს აღიარა, რომ გეია და ამით ამაყობს.

ოუენსის აზრით ზემოთ მოყვანილ საკითხთან დაკავშირებით გამოცემა foxsports-ი დაინტერესდა.

"ავსტრალიის რაგბის კავშირმა ძალიან მნიშვნელოვანი გზავნილი გააკეთა. მათ ეყოთ ძალა და მოახერხეს ძალიან მყარად დამდგარიყვნენ საკუთარ პოზიციაზე, რისთვისაც მათ ქება ეკუთვნით.

რწმენის ამ ფორმით გამოხატვა დღევანდელი საზოგადოებისთვის აბსოლუტურად მიუღებელია, რადგან ამით უამრავ ადამიანს ტკივილს აყენებ.

როდესაც რამე სფეროში მოღვაწეობ, არ აქვს მნიშვნელობა ეს სპორტი იქნება თუ სხვა რამ, უნდა გაითვალისწინო, რომ ამ საქმეს შესაძლოა შენგან განსხვავებული ადამიანებიც აკეთებდნენ და ვალდებული ხარ მათ პატივი სცე.

მე შემიძლია ავირჩიო ჩემი რელიგია, ავირჩიო როგორი ადამიანი ვიქნები, კარგი თუ ცუდი, რომელ სპორტს ვითამაშებ და კიდევ უამრავი რაღაცის არჩევა შეგვიძლია ცხოვრებაში, მაგრამ სექსუალური ორიენტაცია არის ისეთი რამ, რასაც ადამიანი ვერ აირჩევს და მინდა რომ ეს ყველასთვის გასაგები იყოს.

მე ამ ფაქტით ძალიან დამწუხრებული ვარ, თუმცა ერთხელ და სამუდამოდ უნდა ვისწავლოთ ერთმანეთის პატივისცემა. უნდა გვესმოდეს, რომ ჩვენი "უბრალო სიტყვები" შეიძლება სხვა ადამიანს ძალიან ტკენდეს გულს."