რაგბი / ქართული რაგბი /
ვიტო კოლელიშვილი: "არასდროს დავნებდები"
05/20/2019 23:59
223

ევროსპორტის ფრანგული სარაგბო გამოცემა RugbyRama საქართველოს ეროვნული ნაკრებისა და კლერმონის მორაგბესთან, ვიტო კოლელიშვილთან საინტერესო ინტერვიუს აქვეყნებს.

კოლელიშვილს ტრავმის გამო თითქმის რვა თვე გაუცდა, "რაგბირამას" მთავარი თემაც სწორედ ეს იყო. ვიტომ გამოცემასთან მის ამჟამინდელ მდგომარეობასა და მოედანზე დაბრუნებაზე ისაუბრა.

გთავაზობთ სრულ ინტერვიუს:

-თქვენი უკანასკნელი მატჩი 6 ოქტომბერს, ლე როშელის წინააღმდეგ ითამაშეთ, რა მოხდა ამ მატჩის შემდეგ?

-ბენჟამინ კეიზერთან შეჯახებისას თავის შოკი მივიღე. მატჩის შემდგომ ვერ ვიხსენებდი სად ჩატარდა და რა ანგარიშით დასრულდა შეხვედრა, ვინ იყო მოწინააღმდეგე... ამის შემდგომ მქონდა პრობლემები მხედველობასთან დაკავშირებით, ხშირად მტკიოდა თავი და ერთსა და იმავე თემაზე კონცენტრაციას დიდხანს ვერ ვახდენდი. მქონდა შაკიკი. როდესაც ასეთ მდგომარეობაში ნახევართვეზე მეტხანს იღვიძებთ, აღარაფერი გინდათ.

-როდის გქონდათ პირველი ტვინის შერყევა?

-2015 წლის მსოფლიო ჩემპიონატის შემდეგ ტვინის შერყევა ხუთჯერ თუ ექვსჯერ მივიღე. თავიდან ვიფიქრე, რომ ეს სერიოზული არ იყო. გონება არ დამიკარგავს და ნამდვილად არანაირი სიმპტომი არ მქონდა, ამიტომ თამაშს ვაგრძელებდი. თუმცა უნდა გავჩერებულიყავი და დრო გამოჯანმრთელებისთვის დამეთმო. სახლში შოკის ძალიან ცუდი სერიები მქონდა. ახლა კი, როდესაც ექიმებს ვესაუბრე, ვიცი, რომ ტვინის შერყევა, შესაძლოა, პირღებინებისა და გონების დაკარგვის გარეშეც სერიოზულ საფრთხეს წარმოადგენდეს.

-გესმით, რომ ფრენკ აზემს (კლერმონის მთავარი მწვრთნელი) ეშინია თქვენი განაცხადში დაყენება?

-დიახ და არა. მაგრამ შეიძლება, ის მართალიც არის. შესაძლოა, მას უბრალოდ სურს, რომ საკუთარი თავისგან დამიცვას. შინაგანად ვგრძნობ, რომ მოედანი ჩემთვის საუკეთესო წამალი იქნება.

-ვარჯიშობთ?

-მსურდა, რომ კონტაქტური ვარჯიში განმეახლებინა, მაგრამ ცოტახნით კიდევ დაცდა ვარჩიე. დღეს მე მზადების მეთოდებს ვცვლი. როდესაც თავს ძალას ვატან და ძველებურ ვარჯიშებს ვაკეთებ, ტკივილი მაწუხებს. ისე კი კარდიოს ვარჯიშებს ვაკეთებ და დავრბივარ. უნდა გაიგოთ, რომ ეს მხრის ან მუხლის ტრავმა არ არის.

-რას ამბობენ ქირურგები?

-ზოგი ექიმი მეუბნება, რომ ეს არაფერს ნიშნავს, ზოგი კი მაფრთხილებს... მაგრამ ყველა თანხმდება, რომ ცოტა ხანს მოცდა კიდევ მომიწევს. თუმცა მე არ დავნებებულვარ, არასდროს დავნებდები.