ფეხბურთი / პრემიერლიგა /
სონ ჰიუნ მინი - ცრემლები, მკაცრი ვარჯიშები და მამის დარიგებები
05/21/2019 15:08
273

ჩემპიონთა ლიგის 1/4-ფინალში, მანჩესტერ სიტისა და ლონდონის ტოტენჰემის დაპირისპირებამ გულგრილად ფეხბურთის ვერცერთი გულშემატკივარი დატოვა. ბრწყინვალედ ითამაშეს ლივერპულმა და ამსტერდამის აიაქსმაც. მოვლენები ისე განვითარდა, რომ 1962 წლის შემდეგ პირველად, ევროტურნირის ფინალში ტოტენჰემი აღმოჩნდა. ტრავმირებული ჰარი კეინის გარეშე დარჩენილმა ლონდონელებმა ახალი გმირი - სონ ჰიუნ მინი აღმოაჩინეს.

ხასიათის სიძლიერე

მსოფლიოს 2018 წლის ჩემპიონატზე, მექსიკას ზედიზედ მეორე მატჩის მოგებამდე წუთები აშორებდა, როცა სონ ჰიუნ მინმა ბურთი ფლანგზე მიიღო, ცენტრისკენ შეიწია და “ცხრიანში“ ზუსტად დაარტყა. მისი გოლი ფრისთვისაც კი არ აღმოჩნდა საკმარისი. მატჩის შემდეგ, გასახდელში, სონს თვით სამხრეთ კორეის პრეზიდენტი მუნ ჩჟე ინი ამშვიდებდა. “აზიელი ვეფხვების“ ლიდერი გერმანიასთან მომდევნო მატჩში გამარჯვებაში დარწმუნებული არ იყო, მაგრამ გულშემატკივრებს პირდებოდა, რომ გუნდი მაქსიმუმს გააკეთებდა. სონმა მუნდიალის ზედიზედ მეორე მატჩში გაიტანა გოლი და მსოფლიოს მოქმედი ჩემპიონები გერმანიაში ნაადრევად დააბრუნა. კორეელები პლეი ოფში ვერ გავიდნენ, მაგრამ ასეთი დიდი გამარჯვების შემდეგ, მათი ცრემლები ღიმილმა შეცვალა.

სონმა ყველაზე კარგად იცის, რომ ბოლომდე უნდა იბრძოლოს. 2016 წლის ზაფხულში, ინგლისში გატარებული პირველი სეზონის შემდეგ, ლონდონელები კორეელის გასაყიდად მზად იყვნენ. სონი ტოტენჰემის ძირითად შემადგენლობაში თითქმის ვერასდროს ხვდებოდა და გუნდში თავს ზედმეტად გრძნობდა. სატრანსფერო ფანჯრის დახურვამდე 2 დღით ადრე, ვოლფსბურგმა ტოტენჰემს აზიელის სანაცვლოდ 30 მილიონი ევრო შესთავაზა, მაგრამ ამ დროს, საქმეში მთავარი მწვრთნელი მაურისიო პოჩეტინო ჩაერთო. არგენტინელმა თქვა, რომ სონი მის სამომავლო გეგმებში შედიოდა და ნახევარმცველს ურჩია, რომ ძირითად შემადგენლობაში მოხვედრისთვის ებრძოლა. უკვე სექტემბერში, სონი ინგლისის პრემიერ ლიგის თვის საუკეთესო ფეხბურთელად დასახელდა...

უნივერსალი რეკორდსმენი

ტოტენჰემის ფეხბურთელები სათამაშო პრაქტიკის ნაკლებობას იშვიათად უჩივიან, რადგან სეზონი საკმაოდ გრძელი გამოვიდა და პოჩეტინოს ყველა ფეხბურთელისგან მაქსიმუმის გაღება დასჭირდა. წინა წლებში, პოჩეტინო სონს 4-3-3 ტაქტიკაში ფლანგზე ათამაშებდა და კორეელს ცენტრფორვარდობა მხოლოდ მაშინ უწევდა, როცა გუნდი 4-2-2 სქემაზე გადადიოდა. პოჩეტინო სიტისთან “ეტიჰადზე“ გამართულ მატჩში სონი ლუკას მოურას შეუწყვილა და ამან გაამართლა - კორეელმა 3 წუთში დუბლი გაიფორმა. ამით, სონმა ჩემპიონთა ლიგაში 12 გოლი მოაგროვა და ამ ტურნირის ისტორიაში აზიელებს შორის საუკეთესო ბომბარდირი გახდა.

მუსა სისოკოს იძულებითი ცვლილების შემდეგ, სონმა ნახევარდაცვაში დაიხია. აზიელი არა მხოლოდ ფლანგს აკონტროლებდა, არამედ გუნდს მოედნის ცენტრშიც ეხმარებოდა. სონის დაუღალავმა შრომამ და გასაოცარმა ენერგიამ ტოტენჰემის წარმატებაში ერთ-ერთი მნიშვნელოვანი როლი ითამაშა. ტოტენჰემმა ბოლოს ის 15 მატჩი მოიგო, სადაც სონმა 1 გოლი მაინც გაიტანა. ამასთან ერთად, უკვე მესამე სეზონია, რაც სონი პრემიერ ლიგაში მინიმუმ 10 გოლს იტანს.

ფინტი რასიზმის წინააღმდეგ

ჩერნოგორიასა და ინგლისის ნაკრებთან მარტში გამართულ მატჩში, მასპინძელი ქომაგები “სამი ლომის“ შავკანიან ფეხბურთელებს 90 წუთის განმავლობაში ლანძღავდნენ. ამის შემდეგ, ფეხბურთში რასიზმის პრობლემამ კვლავ წინა პლანზე გადაიწია. თავი განსაკუთრებით შეურაცხყოფილად იგრძნო სონის თანაგუნდელმა დენი როუზმა. ამ დღიდან 3 კვირის შემდეგ, პრემიერ ლიგის ფეხბურთელებმა რასიზმი გააპროტესტეს და სოციალურ ქსელებზე უარი თქვეს.

რასისტულ ნიადაგზე ლანძღვას მიჩვეული იყო სონიც, რომელსაც ტოტენჰემის გულშემატკივრებიც კი ავიწროვებდნენ. აზიელ შემტევს პრობლემები არც ეროვნულ ნაკრებში აკლდა. კორეისა და ჩილეს ნაკრებთა მატჩში, სამხრეთამერიკელთა ნახევარმცველმა დიეგო ვალდესმა გოლი რასისტული ჟესტით მხოლოდ იმიტომ აღნიშნა, რომ შეხვედრის დებიუტში, სონმა მას ბურთი ფეხებშუა გაუძვრინა.

“ასეთ ქცევებს ყურადღება არ უნდა მივაქციოთ. რასიზმის პრობლემას მთელი ცხოვრებაა ვაწყდები. ყველანი ერთნაირი ადამიანები ვართ, რომლებიც ფეხბურთს ვთამაშობთ“, - თქვა მატჩის შემდეგ სონმა.

ჯარისკაცული ცხოვრება

გამძლეობასა და დისციპლინას სონი ბავშვობიდანვე სწავლობდა. ფეხბურთელის მამა თავის შვილებს ადრეული ასაკიდანვე ფელიქს მაგათის სტილში - ჯალათურად ავარჯიშებდა. სონ ჰიუნ მინისთვის ნამდვილი კოშმარი მაშინ დაიწყო, როცა მამამისი მის საფეხბურთო სკოლას სათავეში ჩაუდგა. სონის თითოეული შეცდომისთვის, მთელი გუნდი ისჯებოდა. დროთა განმავლობაში, ვარჯიშები სამხედრო ჯარში მზადებას ემსგავსებოდა.

შეიძლება ითქვას, რომ სონი სამხედრო ცხოვრებისთვისაც კი მზად იყო. კორეის კანონების მიხედვით, 28 წლამდე ასაკის მამაკაცებმა ჯარში 21 თვე უნდა გაატარონ. სპორტსმენები მხოლოდ იმ შემთხვევაში თავისუფლდებიან, თუ ოლიმპიადაზე ან აზიის თამაშებზე ოქროს მედალს მოიგებენ. კორეელმა მიმდინარე სეზონის სტარტი ამ მიზეზით გამოტოვა და აზიის თამაშებში მიიღო მონაწილეობა.

“ფინალის წინა ღამეს, ვერაფრით დავიძინე, მაგრამ წარმატებაში დარწმუნებული ვიყავი“, - თქვა სონმა იაპონიასთან მატჩის შემდეგ.

 

მამის დარიგება

ჰიუნ მინს უფროსმა სონმა ურჩია, რომ ცოლი ადრეულ ასაკში არ მოეყვანა. მიზეზი მარტივია - საკუთარი ოჯახი საფეხბურთო კარიერას ხელს შეუშლიდა.

“ამას მამაჩემი მეუბნება და მეც ვეთანხმები. როცა ოჯახს ქმნი, შენთვის უფრო მნიშვნელოვანი ცოლ-შვილი ხდება და შემდეგ მოდის ფეხბურთი. სანამ პროფესიონალურ დონეზე ვთამაშობ, დარწმუნებული უნდა ვიყო, რომ ფეხბურთი ჩემთვის პირველ ადგილზე იქნება. მამაჩემის თქმით, დაოჯახეობას 33-34 წლის ასაკშიც მოვასწრებ, როცა კარიერას დავასრულებ“, - ამბობს სონი.

ვინ არ ისურვებდა გუნდში ისეთ მოთამაშეს, რომელიც ფეხბურთს გოგონებთან გართობაში არ ცვლის?

სონის თანაგუნდელებს კიდევ ერთი მიზეზი აქვთ იმისთვის, რომ კორეელს პატივს სცემდნენ. საკმარისია ნახოთ, როგორ აღნიშნავს სონი გოლებს ყველასთან ინდივიდუალურად და ამაში თავადვე დარწმუნდებით.

“ჩემთვის, ხელის ჩამორთმევა განსაკუთრებული რიტუალია. ბიჭები ჩემთვის არა მხოლოდ თანაგუნდელები, არამედ მეგობრებიც არიან. ყველასთან განსაკუთრებული მისალმება მაქვს და იმედია, მათ ეს მოსწონთ“, - აცხადებს კორეელი.

ძნელია, ფეხბურთის გულშემატკივარს ასეთი შრომისმოყვარე, ერთგული და მეგობრული მოთამაშის მიმართ სიმპათია არ გაუჩნდეს...