ფეხბურთი / ლა ლიგა /
ხოსე ანტონიო რეიესი - უკანასკნელი აჩქარება
06/10/2019 15:49
10545

ჩემპიონთა ლიგის ფინალის დღეს, 1 ივნისს, საზეიმო განწყობა ტრაგიკულმა ამბავმა გააფუჭა: დიდი სიჩქარით მოძრავი ხოსე ანტონიო რეიესი ავარიაში მოყვა და ძმასთან ერთად დაიღუპა. ესპანელი დაუმარცხებელი არსენალის წევრი იყო და ფეხბურთის ისტორიაში იმითაა შესული, რომ ევროპა ლიგა ყველაზე მეტჯერ - 5-ჯერ აქვს მოგებული.

ადგილი არსენ ვენგერის გუნდში

ვენგერის თვალთახედვის არეში ყოველთვის ბევრი ნიჭიერი ახალგაზრდა იყო, მაგრამ არსენალში მოხვედრის შანსი ყველას არ ეძლეოდა. 20 წლის რეიესის შემთხვევაში, ტრანსფერი მინიმალურ დროში გაიჩარხა. იმ დროისთვის, ხოსეს სევილიასთან ერთად სეგუნდა დივიზიონი ჰქონდა მოგებული და ევროპის 19-წლამდელთა ჩემპიონატზეც ბრწყინავდა. 2004 წელს, სევილიელთა სპორტულმა დირექტორმა რამონ მონჩიმ ფეხბურთელი საკმაოდ ძვირად - 20 მილიონ ევროდ გაყიდა.

ვენგერი რეიესს დენის ბერგკამპის შემცვლელად და ტიერი ანრის მეწყვილედ განიხილავდა. მოგეხსენებათ, ბერგკამპს ფრენის ფობია ჰქონდა და მნიშვნელოვან გასვლით მატჩებში გეგმა B იყო საჭირო. ასობით ნიჭიერი ესპანელის მნახველ ვენგერს რეიესი ისე დაამახსოვრდა, როგორც მორიდებული და მუდამ მომღიმარი ბიჭი.

“ჰაიბერიზე“ ჩელსისთან ინგლისის სათასო მატჩში რეიესმა დუბლი შეასრულა და თავის გუნდს მოაგებინა. იმ დღეს, “მეთოფეების“ ფანები რეიესის შესახებ პირველად ამღერდნენ. ესპანელი იმ ბრწყინვალე გუნდის ნაწილი გახდა, რომელმაც პრემიერ ლიგა მარცხის გარეშე მოიგო.

ფაბრეგასი არსენალში რეიესზე წელიწადით ადრე მოხვდა, მაგრამ როგორც თავად ამბობს, მისი საუკეთესო მეგობარი და მეწყვილე სწორედ ის გახდა. ფაბრეგასს ნისლიან ალბიონზე ადაპტაცია კიდევ უფრო გაუადვილდა.

რეიესი სწრაფ და ტექნიკურ ფეხბურთს თამაშობდა, რის გამოც ინგლისურ მოედნებზე ფეხებში ხშირად ხვდებოდა. გარი ნევილმა ავტობიოგრაფიაში აღიარა, რომ მას შემდეგ, რაც რეიესმა ბურთი ფეხებს შორის გაუძვრინა, მზად იყო, თავხედური ფინტისთვის ესპანელი ადგილზევე დაეჩეხა.

არსენალი ჩემპიონთა ლიგაშიც ბრწყინვალედ თამაშობდა. ჯგუფური ეტაპის მე-3 ტურიდან ფინალამდე, ვენგერის გუნდს გოლიც კი არ ჰქონდა გაშვებული. რეიესმა თითქმის ყველა მატჩში ითამაშა, მაგრამ ფინალში, ვენგერმა არჩევანი ალექსანდრ გლების სასარგებლოდ გააკეთა. იენს ლემანის გაძევების გამო, არსენალი მე-18 წუთიდან კაცნაკლული თამაშობდა და სოლ კემპბელის გოლით იგებდა, მაგრამ ლონდონელებმა უპირატესობა ვერ შეინარჩუნეს. რეიესს თამაშის მიმდინარეობის შესაცვლელად მხოლოდ 5 წუთი მიეცა, მაგრამ ბარსელონამ საქმე გამარჯვებამდე მიიყვანა.

 

სამშობლოს მონატრება

ფინალში მარცხმა, რეიესს ესპანეთში დაბრუნების სურვილი გაუღვივა. ესპანელი მადრიდის რეალმა ერთი სეზონით ინათხოვრა. ხოსე ფაბიო კაპელოს 4-3-3 ტაქტიკურ სქემას კარგად მოერგო და გარემარბის პოზიციაზე ორივე ფლანგზე თამაშობდა, მაგრამ რობინიოსთან კონკურენცია უჭირდა.

რეიესმა სეზონში 38 მატჩი ჩაატარა და ერთ-ერთი მთავარი გმირი მაინც გახდა. ბოლო ტურის წინ, რეალს 73 ქულა ჰქონდა და წარუმატებლობის შემთხვევაში, ბარსელონა შესაძლოა ჩემპიონი გამხდარიყო. ბარსელონა ხიმნასტიკს 4:0-ს უგებდა, რეალი კი, მალიორკასთან მატჩში 65-ე წუთამდე მინიმალური ანგარიშით მარცხდებოდა. 66-ე წუთზე, კაპელომ ბექჰემი რეიესით შეცვალა და ორიოდ წუთში, ესპანელმა ანგარიში გაათანაბრა. 83-ე წუთზე, რეიესმა გოლი თითქმის 30 მეტრიდან გაიტანა და რეალს 30-ე ჩემპიონის ტიტული მოუტანა.

ტრიუმფის მიუხედავად, იმჟამინდელმა პრეზიდენტმა რამონ კალდერონმა კაპელო გაათავისუფლა და მას რამდენიმე ფეხბურთელიც მიყვა. მათ შორის რეიესიც იყო. რეალმა ესპანელი არ გამოისყიდა, ფეხბურთელმა კი, არსენალთან კონტრაქტის გახანგრძლივება აღარ ისურვა და ისევ მადრიდში დარჩა - ამჯერად, ატლეტიკოში.

მადრიდის მეორე მხარე

შესაძლოა, ერთ დღეს, ევროპა ლიგას რეიესის სახელი დაერქვას, ან ტურნირის საუკეთესო ფეხბურთელს მისი სახელობის პრიზი გადაეცეს. უკვე ვთქვით, რომ რეიესი ჩემპიონთა ლიგის ტიტულთან ძალიან ახლოს იყო, მაგრამ მან ეს დანაკარგი პრესტიჟულობით მეორე საკლუბო ტურნირზე აინაზღაურა.

ატლეტიკოს გულშემატკივრები რეიესს ცუდად დახვდნენ, რად ის რამდენიმე კვირით ადრე მოსისხლე მტრის - რეალის გერბს კოცნიდა. მთავარი მწვრთნელი ხავიერ აგირე ფლანგებზე უპირატესობას მაქსი როდრიგესსა და სიმაოს ანიჭებდა. ფორმაში შედიოდა დიეგო ფორლანი, სერხიო აგუერო კი, თანდათან იზრდებოდა. დროთა განმავლობაში, რეიესს ნერვებმა უმტყუნა და მანაც ემოციების გამოხატვა ღიად დაიწყო.

“ჩემი სტილის ფეხბურთელები მოედანზე ბოლომდე იხარჯებიან და სანაცვლოდ, სისხლჩაქცევებსა და ჰემატომებს იღებენ. ზოგიერთ ფანს ჩემი რეალში გატარებული წარსულის გარდა არაფერი აინტერესებს!“, - ამბობდა რეიესი.

ესპანელი იჯარით ლისაბონის ბენფიკაში გადავიდა, სადაც მწვრთნელი მისი თანამემამულე კიკე სანჩეს ფლორესი იყო. მას არ ესმოდა, როგორ უნდა ეთქვა უარი რეალისა და არსენალის ყოფილ ვარსკვლავზე. შესაბამისად, ფლორესი მას ენდობოდა და ხშირად ათამაშებდა. სიმბოლურია, რომ სეზონის დასრულების შემდეგ, ფეხბურთელიცა და მწვრთნელიც ატლეტიკოში გადავიდნენ.

მადრიდელებმა სეზონი ჩინებულად ჩაატარეს: მოიგეს ესპანეთის თასი, უეფას სუპერთასი და ევროპა ლიგის ისტორიის პირველი გათამაშება. ფლორესმა რეიესს მოედანზე ადგილი ფორლანთან და აგუეროსთან ერთად მოუძებნა.

სევილიაში დაბრუნება

კიკე სანჩეს ფლორესის წასვლის შემდეგ, მადრიდში რეიესის საჭიროება კვლავ აღარ იყო. მის მდგომარეობაზე გავლენა ვერც ევროპა ლიგის მეორედ მოგებამ იქონია. ვინგერი მშობლიურ სევილიაში დაბრუნდა. რეიესს ფიზიკურად ძლიერ მცველებთან გამკლავება თანდათან უჭირდა. მთავარმა მწვრთნელმა უნაი ემერიმ ესპანელი ისე დატვირთა, რომ მას თავისი თავის ნდობა არ დაეკარგა.

რეიესი ევროპა ლიგის 3 ფინალიდან ორში ძირითად შემადგენლობაში იყო. ის ახალგაზრდა თანაგუნდელებს ამხნევებდა და თვითრწმენას მატებდა. ერთ-ერთი ასეთი მარცხენაფლანგელი ალბერტო მორენო იყო. ის მისი ერთგვარი შეგირდი იყო. მოგვიანებით, მორენო ინგლისში წავიდა და ახლახანს, რეიესისგან განსხვავებით, ჩემპიონთა ლიგაც მოიგო. ყოფილი თანაგუნდელის სიკვდილის შემდეგ, ფინალში წუთიერი დუმილისას, მორენომ ცრემლებისგან თავი ვერ შეიკავა. ფინალის შემდეგ, ალბერტომ მაისური ჩაიცვა, რომელზეც სწორედ რეიესი იყო გამოსახული.

გადაჭარბებული სიჩქარე

მეხუთედ მოგებული ევროპა ლიგის თასის შემდეგ, რეიესმა გადაწყვიტა, რომ დიდი ფეხბურთისგან დაესვენა და მხოლოდ საკუთარი სიამოვნებისთვის ეთამაშა. გარკვეული დროით, რეიესი ესპანიოლსა და კორდობაში მსუბუქი დატვირთვით თამაშობდა, შემდეგ კი, ჩინურ სინცზიან ტიანშან ლეოპარდში აღმოჩნდა. რეიესს აზიაში გაუჭირდა. თანაც, ესპანეთში ორი მცირეწლოვანი ქალიშვილი - ნოელია და ტრიანა ეზრდებოდა. გასულ ზამთარს, ფეხბურთელი კვლავ ესპანეთსა და ოჯახს დაუბრუნდა.

გაზაფხულზე, 35 წლის ფეხბურთელი ყოფილი თანაგუნდელის - დიეგო კაპელის მიწვევით ესტრემადურაში თამაშობდა, რომელიც 2007 წელს დაარსდა და სანახევროდ პროფესიონალური კლუბია. რეიესს კონტრაქტი ეწურებოდა და რომ დასცლოდა, დიდი ალბათობით, კარიერის დასრულების შესახებ ოფიციალურ განცხადებასაც გააკეთებდა.

ზაფხულის პირველ დღეს, რეიესი Mercedes Benz S550-ს მართავდა და მასთან ერთად, 23 წლის ძმა და ბიძაშვილიც მგზავრობდნენ. ისინი ალმენდრალეხოდან უტრერაში მიდიოდნენ. გადაჭარბებული სიჩქარისას, ავტომობილს საბურავი გაუსკდა და გზიდან გადავარდა, რა დროსაც ცეცხლი გაუჩნდა. ორივე ძმა დაიღუპა, მაგრამ ფეხბურთელის ბიძაშვილს სხეულის 60% დაეწვა. მას არაფერი ახსოვს გარდა იმისა, რომ ავტომობილი ფაქტობრივად მიფრინავდა.

პოლიციამ უკვე დაადასტურა, რომ ავარიის მიზეზი გადაჭარბებული სიჩქარე გახდა. გარკვეულწილად, ეს მის კარიერასთანაც კავშირშია და სიმბოლურია. ხოსემ ძალიან სწრაფად გაიბრწყინა, გახდა სეგუნდა დივიზიონისა და პრემიერ ლიგის გამარჯვებული, დაიმკვიდრა თავი ესპანეთის ნაკრებში. რეიესი მინდორზეც განსაკუთრებული სისწრაფით გადაადგილდებოდა და როგორც ჩანს, ის ამაზე უარს არც მოედანს მიღმა ამბობდა, რამაც წლის ერთ-ერთი ყველაზე დიდი საფეხბურთო ტრაგედია გამოიწვია.