ფეხბურთი / მსოფლიო ფეხბურთი /
ლეოს ბოლო შანსი...
06/11/2019 11:52
671

არგენტინის ნაკრები ლეო მესისთვის ყოველთვის მტკივნეულ საკითხად ითვლებოდა: მასთან ერთად სუპერვარსკვლავი სამჯერ კოპა ამერიკის ფინალში დამარცხდა, ამავე სტადიაზე მსოფლიოს ჩემპიონატზე გერმანიის ნაკრებთან წააგო, ხოლო 2010 და 2018 წლებში ძალიან უსუსურად იასპარეზა.

2016 წელს ლეომ ემოციები ვეღარ გააკონტროლა და ნაკრებიდან წასვლის შესახებ გამოაცხადა, ეს ყველასთვის ნამდვილი შოკი იყო, ძალიან ბევრი ადამიანი მას ნაკრებში დაბრუნებას თხოვდა, მესიმ ზეწოლას ვეღარ გაუძლო, როგორც ჩანს ემოციებიც გაცივდა და ორ თვეში დაბრუნდა.

მას არგენტინაში ბევრი კრიტიკოსი ჰყავს. "ჩემი ექვსი წლის შვილი ხშირად ინტერტესდება, თუ რისთვის "მკლავენ" არგენტინაში, მას ამ ხალხს ასე ძალიან არ ესმის, რატომ არ ვუნდივარ" - განაცხადა ცოტა ხნის წინ ლეომ.

როგორც იქნა ლეომ ნავსი გატეხა და არგენტინისთვის "რაღაც კარგი" გააკეთა: მან ქვეყანას პირველი თასი მოუტანა, მართალია არაოფიციალური, თუმცა ამას მნიშვნელობა არ აქვს.

ნიკარაგუის ნაკრების განადგურებით (5:1) არგენტინამ სან-ხუანის სიმბოლური თასი მოიგო, რომელიც ქალაქ სან-ხუანის მერიამ სპეციალურად ამ მატჩისთვის დააწესა.

მატჩის შემდეგ მესის სიმბოლური თასი გადასცეს, ეს თითქოს მომდევნო გამარჯვებების სიმბოლო უნდა გახდეს, რადგან ნაკრების მაისურით მას თასი აქამდე არასდროს აუწევია.

ამ "ტიტულმა" სოციალურ ქსელში დიდი გამოხმაურება ჰპოვა, თუმცა უმეტეს შემთხვევაში ხალხი ამაზე ხუმრობდა, ზოგიერთი კი მას ევროპის ერთა ლიგაზე კრიშტიანო რონალდოს გამარჯვებას ადარებდა.

 

 

მესის არგენტინის ახალგაზრდულ ნაკრებში ბრწყინვალე კარიერა ჰქონდა - 2005 წელს მან იუნიორთა მსოფლიოს ჩემპიონატი, ხოლო 2008 წელს ოლიმპიადა მოიგო. თუმცა "დიდებში" მისი საქმეები ძალიან შავ ფერებშია მიუხედავად იმისა, რომ ის კარგა ხანია 67 გატანილი გოლით საუკეთესო ბომბარდირია.

2007 წლის კოპა ამერიკა - პირველი დარტყმა "ჯადოქარმა" სწორედ 2007 წელს მიიღო, სადაც ახალგაზრდა ლეომ ორი გოლი გაიტანა, ხოლო არგენტინა ფინალში გავიდა, თუმცა იქ ბრაზილიის ნაკრებმა არ დაინდო და 3:0 დაამარცხა.

 

2010 წლის მსოფლიოს ჩემპიონატი - არგენტინისთვის საშინელი გამოდგა, გუნდი გერმანიის ნაკრებთან 0:4 დამარცხდა და ტურნირს სამარცხვინოდ დაემშვიდობა. თვითონ ლეოსთვისაც ალბათ ამ დროის გახსენება არასასიამოვნო იქნება, რადგან მან 5 თამაშში ვერც ერთი გოლის გატანა შეძლო.

 

2014 წლის მსოფლიოს ჩემპიონატი - ლეომ ყველაფრის გამოსწორება სცადა, გაიტანა 4 გოლი და ტურნირის საუკეთესო ფეხბურთელის ჯილდოც დაიმსახურა. თუმცა მას წინ ამჯერადაც გერმანია გადაეღობა, მარიო გიოტცემ 113 წუთზე გამარჯვების გოლი გაიტანა და გერმანიას მსოფლიოს მეოთხე ჩემპიონობა მოუპოვა.

 

2015 წლის კოპა ამერიკა - არგენტინა ფინალში ჩილესთან თერთმეტმეტრიანების სერიაში დამარცხდა.

 

2016 წლის კოპა ამერიკა - ისევ ფინალი, ისევ ჩილე და ისევ თერთმეტმეტრიანების სერიაში წაგება. მესიმ ტურნირზე 5 გოლი გაიტანა, თუმცა ფინალში პენალის გატანა ვერ მოახერხა. სწორედ ამ თამაშის შემდეგ განაცხადა ლეომ, რომ ნაკრებიდან მიდიოდა, თუმცა როგორც ზემოთ ვთქვი ორ თვეში დაბრუნდა.

2018 წლის მსოფლიოს ჩემპიონატი - არგენტინა ჯგუფიდან დიდი გაჭირვებით გავიდა, სადაც საფრანგეთთან უშანსოდ დამარცხდა. მესიმ ერთი გოლის გატანა მოახერხა და შესაძლოა მისთვის ეს მსოფლიოს ჩემპიონატის მოგების უკანასკნელი შანსი იყო, რადგან მომავალ 2022 წლის მუნდიალზე ის უკვე 35 წლის იქნება.

 

2019 წლის კოპა ამერიკა ლიონელ მესისთვის ნაკრებთან ერთად სერიოზული ტიტულის მოგების უკანასკნელი შანსია. მიუხედავად იმისა, რომ "არგენტინელი ჯადოქრის" სიდიადეში ეჭვის შეტანა მკრეხელობა იქნება, მას მაინც ყოველთვის გაუხსენებენ ნაკრებში წარუმატებლობას.

ობიექტურობისთვის, აქვე უნდა ვახსენოთ მისი მთავარი კონკურენტის - კრიშტიანო რონალდოს მიერ მოგებული ევროპის ჩემპიონატი, ავად თუ კარგად ბევრად სუსტი შემადგენლობით მან პორტუგალიას ეს ჯილდო მოუპოვა. დროა იგივე ლეომაც გააკეთოს, არგენტინაში ყველა ამის მოლოდინშია...