ქართული სპორტი / ქართული რაგბი /
უმცროსმა ბორჯღალოსნებმა ფიჯის სძლიეს და მეცხრე ადგილისთვის იბრძოლებენ
06/17/2019 22:21
3339

საქართველოს 20-წლამდე მორაგბეთა ნაკრებმა მსოფლიო ჩემპიონატზე მეოთხე მატჩი ფიჯის წინააღმდეგ გამართა.

უმცროსმა ბორჯღალოსნები მსოფლიო ჩემპიონატის დებიუტანტებს დაძაბულ ორთაბრძოლაში ანგარიშით 12:8 სძლიეს და მსოფლიო ჩემპიონატზე მეცხრე ადგილისთვის იბრძოლებენ.

საქართველოს ნაკრები ფიჯის წინააღმდეგ მთელი თამაშის განმავლობაში აგებდა, თუმცა შეხვედრის ბოლო წამებზე ქართველმა მორაგბეებმა 23-ფაზიანი შეტევა ლელოთი დაასრულეს და საბოლოო ანგარიში 12:8 დააფიქსირეს.

ფიჯელებმა მატჩი მერვე წუთიდან ლელოთი დაიწყეს, თუმცა გარდასახვა ვერ გამოიყენეს და 5:0 დაწინაურდნენ. პირველ ტაიმში ვერცერთი გუნდის მორაგბეებმა შანსები ვერ გამოიყენეს და პირველი ნახევრის ანგარიში 5:0, ფიჯის სასარგებლოდ დასრულდა.

მეორე ტაიმის ანგარიშიც ფიჯელებმა გახსნეს. 53-ე წუთზე მუნცმა ჯარიმა ზუსტად შეასრულა და ფიჯელები 8:0 დაწინაურდნენ. თუმცა 61-ე წუთზე უმცროსმა ბორჯღალოსნებმა ფიჯელ თანატოლებს ლელოთი უპასუხეს. იაშაღაშვილმა ლელო დაამიწა, ხოლო აბჟანდაძის გარდასახვა ზუსტი იყო და ანგარიში ერთ ქულამდე შემცრდა - 7:8.

განსაკუთრებით დაძაბული ბოლო წამები გამოდგა. ქართველი მორაგბეები ლელოს დასადებად ბოლომდე იბრძოდნენ, საბოლოოდ კი ოცდასამფაზიანი შეტევა ვანო კარკაძემ ლელოთი დააგვირგვინა და საქართველომ ანგარიშით 12:8 მოიგო.

მეცხრე ადგილისთვის შეხვედრაში ჩვენი ნაკრები იტალიას დაუპირისპირდება. საქართველოსა და იტალიას შორის მატჩი კი 22 ივნისს, თბილისის დროით 20:00 საათზე გაიმართება.

აღსანიშნავია, რომ საქართველოს 20-წლამდე ნაკრებმა მსოფლიო ჩემპიონატზე მეორე მატჩი მოიგო და 2020 წლის მსოფლიო ჩემპიონატზე ასპარეზობის უფლება გაინაღდა.

შეგახსენებთ, რომ 2018 წლის მსოფლიო ჩემპიონატი უმცროსმა ბორჯღალოსნებმა მეცხრე ადგილზე დაასრულეს.

#Flashscore