ფეხბურთი / მსოფლიო ფეხბურთი /
TOP 5 ვარსკვლავი, რომლებმაც სერ ალექს ფერგიუსონს უარი უთხრეს
06/24/2019 18:12
539

წარმოგიდგენთ ფეხბურთის იმ ვარსკვლავებს, რომლებსაც სხვადასხვა დროს მანჩესტერ იუნაიტედისთვის და სერ ალექს ფერგიუსონისთვის ტრანსფერზე უარი აქვთ ნათქვამი.

ალან შირერი

ლეგენდარული ინგლისელი ბომბარდირი დილემის წინაშე 1996 წელს დადგა. როგორც ამბობენ, შირერი ალექს ფერგიუსონს სახლშიც კი ეწვია. შოტლანდიელმა თავდამსხმელის დაყოლიება სცადა, მაგრამ ბლექბერნს შირერის გაყიდვა არ სურდა და კლუბის შეცვლის დიდ სურვილს არც ფეხბურთელი იჩენდა.

საბოლოოდ, შირერი ნიუკასლში წავიდა და გუნდის მთავარი ბომბარდირიც მალევე გახდა. “კაჭკაჭებში“ ჩატარებულ 206 მატჩში შირერს ტიტული არ მოუგია, მაგრამ ნიუკასლმა ჩემპიონთა ლიგაზე გასვლა მოახერხა და ინგლისის პრემიერ ლიგაშიც ბევრ გრანდს შეუქმნა პრობლემა.

თავის მხრივ, მანჩესტერი საქმეს შირერის გარეშეც იოლად გაუმკლავდა და ქვეყნის ჩემპიონი გახდა. ინგლისელის თქმით, ის თავის გადაწყვეტილებას არ ნანობს. აღსანიშნავია, რომ შირერს იუნაიტედში გადასვლის შანსი მეორედაც ჰქონდა, მაგრამ სერ ალექსმა ამჯერადაც უარი მიიღო.

პატრიკ კლუივერტი

ფერგიუსონისთვის შირერის აზრი ასე თუ ისე გასაგები იყო, მაგრამ გამოცდილი სპეციალისტი 1998 წელს ჰოლანდიელის უარმა შოკში ჩააგდო. ფერგი ვერაფრით ხსნიდა, რატომ არ სურდა კლუივერტს მანჩესტერში გადასვლა.

მანჩესტერი და მილანი ფინანსურ დეტალებზე მორიგებულები იყვნენ. ინგლისელებს იტალიელებისთვის 9 მილიონი გირვანქა სტერლინგი უნდა გადაეხადათ. ტრანსფერით კლუივერტის გარდა ყველა იყო დაინტერესებული. ფერგიუსონს თავში მხოლოდ ის აზრი უტრიალებდა, რომ კლუივერტი მანჩესტერ იუნაიტედის მასშტაბებს ვერ იაზრებდა და უარზეც ამიტომ იყო.

“გაკვირვებული დავრჩი, რადგან მან ჩვენთან საუბარიც კი არ ისურვა. მოგვიანებით გავიგეთ, რომ ლონდონში გადასვლის სურვილი ჰქონდა. თუ იქ თამაში უნდოდა, ჩვენ შანსი აღარ გვექნებოდა“, - ამბობდა ფერგიუსონი.

ზაფხულში, კლუივერტი ბარსელონას შეუერთდა. რივალდოსთან ტანდემი წარმატებული აღმოჩნდა. იმავე წელს, მანჩესტერ იუნაიტედმა ტრიპლეტი შეასრულა და ყველა შესაძლო ტიტული კლუივერტის გარეშე, დუაიტ იორკთან და ენდი კოულთან ერთად მოიგო.

“როცა ახალგაზრდა პატრიკ კლუივერტს ჩვენი მხრიდან ინტერესზე რეაქციაც კი არ ჰქონია, მაშინვე მივხვდი, რომ ის წაგებული დარჩებოდა“, - დაწერა ფერგიუსონმა თავის ავტობიოგრაფიულ წიგნში.

რონალდინიო

2003 წელს, ბარსელონა და რეალი დევიდ ბექჰემის ტრანსფერზე აქტიურად მუშაობდნენ. კატალონიური გრანდის საპრეზიდენტო არჩევნების წინ, ყველა კანდიდატი პირობას დებდა, რომ “კამპ ნოუზე“ ბექჰემს ჩაიყვანდა. სანდრო როსელი მანჩესტერში იმყოფებოდა, სადაც უთხრეს, რომ “ბექზი“ 80%-ით მადრიდის რეალში გადადიოდა.

ფერგიუსონი რონალდინიოს ბექჰემის შემცვლელად მიიჩნევდა. იუნაიტედი პსჟ-ს სატრანსფერო თანხაზეც შეუთანხმდა. ფეხბურთელი ამბობდა, რომ გარიგების დასრულებამდე მცირე დეტალები იყო დარჩენილი. საბოლოოდ, ისე მოხდა, რომ ბექჰემმა ბარსელონას უარი უთხრა, განაწყენებულმა კატალონიელებმა კი, მომღიმარი ვარსკვლავის შეძენა თავადვე მოინდომეს და 22 წლის ფეხბურთელი დაითანხმეს.

“ბარსელონაში დიდ ბრაზილიელებს უთამაშიათ: რომარიოს, რივალდოს, რონალდოს... მინდოდა მეც იქ ვყოფილიყავი. სუპერვარსკვლავობა მინდოდა და ბარსელონაში ამის მეტი შანსი მქონდა. თანაც, აქაური კლიმატი და ცხოვრება მირჩევნია. მანჩესტერში მუდამ ცუდი ამინდია“, - ამბობდა გაუჩო.

იმედგაცრუებულმა ფერგიუსონმა აქცენტი 17 წლის ლისაბონელ ბიჭზე გადაიტანა: “მეგონა, საქმე უნდა გაჩარხული იყო, მაგრამ როცა პარიზში ჩავფრინდი, სხვა სიტუაცია დამხვდა. რონალდინიოს წარმომადგენლებმა მითხრეს, რომ შეთანხმების პუნქტები უნდა შეგვეცვალა. ამის შემდეგ, სრულიად მოულოდნელად ის ბარსელონას მაისურით ვიხილეთ. დიდი იმედგაცრუება იყო, მაგრამ საბოლოოდ, კრიშტიანუ რონალდუ დავიმატეთ. ყველაფერი სხვაგვარად რომ წასულიყო, შესაძლოა, რონალდუ არც გვეყიდა“.

ედენ აზარი

2012 წლის ზაფხულში აზარი ყველაზე მოთხოვნადი ფეხბურთელი იყო. 21 წლის ბელგიელისთვის ყველა გრანდი იბრძოდა. საბოლოოდ, იუნაიტედს ჩელსიმ აჯობა, რომელსაც ჩემპიონთა ლიგა ახალი მოგებული ჰქონდა.

აზარმა აღიარა, რომ მის გადაწყვეტილებაზე გავლენა რომან აბრამოვიჩმა იქონია: “აბრამოვიჩს ფეხბურთი ძალიან უყვარს. მას უბრალოდ უნდოდა, რომ ჩელსი ყოველთვის სათავეში ყოფილიყო. წინ მანჩესტერისა და ჩელსის ვარიანტები მედო. გადაწყვეტილება უნდა მიმეღო და ჩელსი ავირჩიე, რადგან უკეთეს პროექტად მივიჩნიე.

“ფეხბურთელებს ძალიან ვაფასებ, მათ შორის აზარსაც, მაგრამ მისმა ფასმა დამაფრთხო. კარგი ფეხბურთელია, მაგრამ 34 მილიონი გირვანქა ზედმეტად ბევრია“, - ამბობდა ფერგიუსონი.

აზარის ნაცვლად, ფერგიმ დორტმუნდიდან იაპონელი შინჯი კაგავა აიყვანა.

სამირ ნასრი

“ერთი რამ ზუსტად ვიცი: ნასრის მანჩესტერ იუნაიტედში არასდროს გავუშვებ“, - ამბობდა არსენალის ყოფილი მწვრთნელი არსენ ვენგერი.

ნასრის ლონდონის დატოვება უნდოდა და მას არც ახალი კონტრაქტი აინტერესებდა. ფერგიუსონს ამ ფაქტორის გამოყენება სურდა და იმედი ჰქონდა, რომ მობერებულ შემადგენლობას ფრანგით გააახალგაზრდავებდა.

“სერ ალექსს პარიზში ერთ ისეთ ადგილას შევხვდი, სადაც პაპარაცები ვერ მოგვაგნებდნენ და ჭორებიც არ გაჩნდებოდა. პრობლემა ერთი იყო: არსენალს ღიად უნდა დავპირისპირდებოდი და ტრანსფერი მხოლოდ ამ შემთხვევაში შედგებოდა. არსენ ვენგერს ასე ვერ მოვექცეოდი“, - თქვა ნასრიმ.

საბოლოოდ, ნასრი მანჩესტერში მაინც გადავიდა, მაგრამ სიტის მაისური მოირგო.

“არდადეგების დროს, რობერტო მანჩინი ყოველდღე მირეკავდა. მივხვდი, რომ ის ჩემი სამსახურით მართლაც დაინტერესებული იყო. სიტის დავთანხმდი და პირველივე სეზონში ჩემპიონის ტიტული მოვიპოვე. ჩემი გადაწყვეტილების სისწორეში კიდევ უფრო დავრწმუნდი“, - იხსენებს ნასრი.

#Flashscore