ფეხბურთი / ქართული ფეხბურთი /
დავით მუჯირი: "სოლიდარობის აქცია ჩვენი მხრიდან სრულად იქნება მხარდაჭერილი"
06/24/2019 18:37
267

დღეს, 24 ივნისს გამართულ სხდომაზე, აღმასკომის წევრებმა უეფას 2019-2020 წლების სეზონის ლიცენზირების შედეგის შესახებ სფფ-ის საკლუბო ლიცენზირების განყოფილების მოხსენება მოისმინეს. 

აღმასრულებელი კომიტეტის სხდომის დასრულების შემდეგ საქართველოს ფეხბურთის ფედერაციის გენერალური მდივანი, დავით მუჯირი ქართულ კლუბებთან დაკავშირებით მედიაში გავრცელებულ ინფორმაციას გამოეხმაურა.

დავით მუჯირი: "დღევანდელი მდგომარეობით, ეროვნული ლიგის მონაწილე არცერთ გუნდს სანქცია არ ემუქრება. არც უეფადან და არც ფიფადან ჩვენთან შესაბამისი განცხადება არ შემოსულა.

კიდევ ერთხელ ვადასტურებ, რომ სოლიდარობის აქცია, რომელიც გასული კვირის განმავლობაში ქართული კლუბების მიერ იყო წარმოებული, ჩვენი მხრიდან სრულად იქნება მხარდაჭერილი".

ცნობისთვის, ეროვნული ლიგის მეცხრამეტე ტურში ქართული კლუბები თბილისში განვითარებულ მოვლენებს სოლიდარობის აქციით შეუერთდნენ. ეროვნული ლიგის რამდენიმე კლუბმა მატჩის დაწყებამდე ანტისაოკუპაციო მაისურები მოირგეს, რის გამოც რუსული მხარე ქართველების დასჯას ითხოვდა.

ფოტო: ეროვნული ლიგა