სხვა / ძიუდო /
გურამ თუშიშვილმა რუს მეტოქეს სძლია და ევროპის ჩემპიონია!
06/24/2019 20:33
2022
Loading the player...

მინსკის მეორე ევროპულ თამაშებზე ძიუდოში ინდივიდუალური შეჯიბრი დასრულდა.

ინდივიდუალური შეჯიბრის დაკვნით დღეს სამ წონით კატეოგრიაში სამმა ქართველმა იჭიდავა, თუმცა ფინალურ ბლოკში მედლებისთვის მხოლოდ ორმა მათგანმა იბრძოლა.

+100კგ წონით კატეგორიაში გურამ თუშიშვილმა ფინალამდე სამი შეხვედრა გამართა და სამივე იპონით მოიგო. ფინალურ შეხვედრაში კი ქართველი ძიუდოისტი რუს ინალ ტასოევს დაუპირისპირდა. თავდაპირველად ქართველი ძიუდოისტი ვაზარით მარცხდებოდა, თუმცა გდებიდან ოც წამში საქართველოს დელეგაციის მედროშემ ფინალში რუს მეტოქეს შესანიშნავი ილეთით იპონზე დააგდო და ევროპული თამაშებისა და ევროპის ჩემპიონი გახდა.

-100კგ წონით კატეგორიაში კი საქართველოს ნაკრების კაპიტანმა, ვარლამ ლიპარტელიანმა ასევე ფინალში იჭიდავა, თუმცა რუსეთის სახელით მოასპარეზე არმან ადამიანთან დამარცხდა და ევროპული თამაშებისა და ევროპის ჩემპიონატის ვერცხლის მედალს დასჯერდა.

-90კგ წონით კატეგორიაში ბექა ღვინიაშვილი მერვედფინალში რუს ხუსენ ხალმურზაევთან გოლდენ სქორში დამარცხდა და მედლისთვის ბრძოლას გამოეთიშა.

შეგახსენებთ, რომ სამი საშეჯიბრო დღის ჯამში საქართველოს ძიუდოს ნაკრებმა შვიდი მედალი მოიპოვა. მათ შორის ოქროს მედლები ლუხუმ ჩხვიმიანმა და გურამ თუშიშვილმა მოიპოვეს, ვერცხლის მედლის მფლობელი ვარლამ ლიპარტელიანი გახდა, ხოლო ბრინჯაოს მედალოსნები ამირან პაპინაშვილი, ვაჟა მარგველაშვილი, ბაგრატ ნინიაშვილი და ლუკა მაისურაძე გახდნენ. ტურნირზე უმედლოდ ქართველთაგან მხოლოდ ეთერ ლიპარტელიანი, ლაშა შავდათუაშვილი და ბექა ღვინიაშვილი დარჩნენ. აღსანიშნავია, რომ გუნდურ ჩათვლაში მამაკაცებს შორის საქართველოს ნაკრებმა პირველი ადგილი დაიკავა, თუმცა შერეულ ოფიციალურ გუნდურ შეჯიბრში ჩვენი ნაკრები ქალ ძიუდოისტების არყოფნის გამო ვერ იასპარეზებს.