ფეხბურთი / მსოფლიო ფეხბურთი /
მსოფლიოს U20 ჩემპიონატის საუკეთესო ფეხბურთელები - სად არიან ისინი?!
06/25/2019 14:39
852

ცოტა ხნის წინ ფეხბურთის 20 წლამდე ასაკის მსოფლიო ჩემპიონატი დასრულდა, რომლის ტრიუმფატორი გიორგი წიტაიშვილი და მისი უკრაინის ნაკრები გახდა. ქართული წარმოშობის ფეხბურთელმა შესანიშნავად ითამაშა და ულამაზესი გოლიც გაიტანა.

ეს ტურნირი ყოველთვის გამოირჩეოდა ახალგაზრდა ტალანტების აღმოჩენით, ბევრმა სუპერვარსკვლავმა კარიერის საწყისი ნაბიჯები სწორედ აქ გადადგა. გადავწყვიტე წარმოგიდგინოთ ბოლო 10 ჩემპიონატის საუკეთესო მოთამაშეები, რა გზა გაიარეს და სად არიან ახლა ისინი.

 

1999 წელი - ნაბი კეიტა (მალი)

აფრიკული ფეხბურთის ერთ-ერთი გამორჩეული ფეხბურთელი ნაბი კეიტა ამ ტურნირის აღმოჩენა იყო. მალის ნაკრებმა ტურნირზე მესამე ადგილი დაიკავა, ბოლო თამაშში ურუგვაისთან სწორედ მან გაიტანა.

ამის შემდეგ ნაბიმ 5 სეზონი ფრანგულ ლანსში გაატარა, საიდანაც ესპანურ სევილიაში აღმოჩნდა. ანდალუსიურ კლუბში გატარებული ერთი წელი საკმარისი აღმოჩნდა პეპ გუარდიოლას ბარსელონას დასაინტერესებლად, კატალილიელმა სპეციალისტმა ის იდეალურად გამოიყენა, მასთან ერთად 2 ჩემპიონთა ლიგა და სამი ლა ლიგა მოიგო.

კეიტა ახლა 39 წლისაა, კარიერა კი 2017 წელს ყატარულ ალ-ჯაიშში დაასრულა.

 

2001 წელი - ხავიერ სავიოლა (არგენტინა)

2001 წელს არგენტინის ნაკრები შეუჩერებელი იყო და ტურნირი დამაჯერებლად მოიგო, ამ გუნდის უდავო ლიდერი და მთავარი ვარსკვლავი ხავიერ სავიოლა იყო. "ბაჭიამ" ორი ჰეთ-თრიქის და ორი დუბლის შესრულება მოახერხა, 6 თამაშში 11 გატანილი გოლით ის საუკეთესო ბომბარდირი გახდა, ცნობისთვის უახლოესი მდევრებს ჯიბრილ სისეს და ადრიანოს 6-6 გოლი ჰქონდათ გატანილი.

ამავე წელს რივერის ტალანტი ბარსელონამ შეიძინა, ის მომავალი მარადონა უნდა გამხდარიყო და პირველი სამი სეზონი საკმაოდ მაღალ დონეზეც ჩაატარა, თუმცა შემდეგ ყველაფერი აირია.

მის კარიერაში იყო სევილიასთან ერთად მოგებული უეფას თასი (ახლანდელი ევროპა ლიგა), მადრიდის რეალის სათადარიგო სკამზე გატარებული ორი სეზონი და ლისაბონის ბენფიკა. კარიერა მშობლიურ რივერ პლეიტში დაასრულა, ის ახლა 37 წლისაა.

 

2003 წელი - ისმაილ მატარი (არაბეთის გაერთიანებული ემირატები)

ამ წელს ტურნირს არაბეთის გაერთიანებულმა ემირატებმა უმასპინძლა, ამ გუნდის მთავარი დამრტყმელი ძალა კი სწორედ ისმაილ მატარი იყო. გუნდმა მეოთხედფინალამდე მიაღწია, სადაც კოლუმბიასთან დამარცხდნენ, მერვედფინალში გუნდმა მატარის გოლით მოიგო.

მას მთელი კარიერა მშობლიურ ალ-ვახდში აქვს გატარებული, ხოლო უაე-ს შემადგენლობაში ჩატარებულ 131 მატჩში 36 გოლი აქვს გატანილი. მან მონაწილეობა მიიღო ლონდონის 2012 წლის ჩემპიონატზე, სადაც 2 გოლი გაიტანა.

ის 36 წლისაა და დღემდე აგრძელებს საფეხბურთო კარიერას.

 

2005 წელი - ლიონელ მესი (არგენტინა)

აქ ყველაფერი ძალიან მარტივადაა, არგენტინა მსოფლიო ჩემპიონი გახდა, ხოლო ლეომ რა თქმა უნდა საუკეთესო ბომბარდირის ჯილდო დაიმსახურა. ფინალში მან დუბლი შეასრულა და ესპანელ ფერნანდო ლორენტეს აჯობა.

ლეოს კარიერა როგორც განვითარდა მსოფლიოს თითქმის ყველა ადამიანმა იცის, ის ფეხბურთის ისტორიაში ერთ-ერთი საუკეთესო (ზოგის აზრით საუკეთესო) ფეხბურთელია. 24 ივნისს ის 32 წლის გახდა და დღემდე ბარსელონას და არგენტინის ნაკრების ლიდერია.

 

2007 წელი - სერხიო აგუერო (არგენტინა)

არგენტინის კიდევ ერთი ტრიუმფი, ამჯერად სერხიო აგუეროს დრო დადგა. ის 6 გატანილი გოლით ტურნირის საუკეთესო ბომბარდირი გახდა, მან ფინალში ჩეხეთსაც გაუტანა.

აგუერო პრემიერ ლიგის ყველა დროის ერთ-ერთი საუკეთესო ბომბარდირი და მანჩესტერ სიტის ლეგენდაა. ევროპული კარიერის საწყისი წლები მადრიდის ატლეტიკოში გაატარა, სადან ძალიან კარგი თამაშით ინგლისური კლუბი დააინტერესა. როგორ განვითარდა მოვლენები ბევრ თქვენგანს ემახსოვრება, ბოლო წამები და ქუინზ პარკ რეინჯერსის კარში გატანილი ლეგენდარული გოლი, რომელმაც მანჩესტერელებს 44 წლის შემდეგ პირველი ჩემპიონობა მოუტანა.

ამჟამად აგუერო 31 წლისაა და მანჩესტერ სიტის ლიდერია.

 

2009 წელი - დომინიკ ადია (განა)

ყველასთვის მოულოდნელად მსოფლიო ჩემპიონი განა, ხოლო საუკეთესო ბომბარდირი 8 გატანილი გოლით დომინიკ ადია გახდა. მათ ფინალში დუგლას კოსტას ბრაზილიის ნაკრები დაამარცხეს.

2010 წელს ის მილანმა შეიძინა, თუმცა იტალიაში ერთი შეხვედრაც არ ჩაუტარებია. ის ჯერ თურქულ კარშიაკუში, შემდეგ კიევის არსენალში, ბოლოს კი ყაზახურ ატირაუში გაანათხოვრეს. 2015 წელს ის ტაილანდურ ნაკჰორნატსიმაში აღმოჩნდა, სადაც დღემდე თამაშობს, ის 29 წლისაა.

 

2011 წელი - ენრიკე ალმეიდა (ბრაზილია)

ამ წელს ჩემპიონი ბრაზილია გახდა, ხოლო მისი ლიდერი ენრიკე ალმეიდა გახდა, რომელმაც მექსიკას ნახევარფინალში ორი გოლი გაუტანა, ის ტურნირის საუკეთესო ბომბარდირი 5 გატანილი ბურთით გახდა. აღსანიშნავია, რომ ამ გუნდის წევრები ფილიპე კოუტინიო და ოსკარიც იყვნენ.

2013 წელს ის რეალში გადავიდა, თუმცა მხოლოდ კასტილიაში ითამაშა. შემდეგ იყო რიგი ბრაზილიური კლუბები, 2017 წელს თურქეთის მეორე ლიგაში ითამაშა, ხოლო გასული წელი პორტუგალიურ ბელენენსეშში ჩაატარა და 5 გოლი გაიტანა, ახლა ის 28 წლისაა.

 

2013 წელი - პოლ პოგბა (საფრანგეთი)

პოლი ჩემპიონი საფრანგეთის ნამდვილი ლიდერი და კაპიტანი იყო.

მან იუვენტუსთან ერთად სერია ა რამდენჯერმე მოიგო, შემდეგ მანჩესტერმა 105 მილიონ ევროდ შეიძინა, რომელიც იმ დროისთვის სარეკორდო იყო. 2018 წელს საფრანგეთის მთავარ ნაკრებთან ერთადაც მოიგო მსოფლიოს ჩემპიონის ტიტული.

მიმდინარე სატრანსფერო ბაზარზე მას ხან მადრიდის რეალს, ხანაც იუვენტუსს უკავშირებენ, პოგბა 26 წლისაა.

 

2015 წელი - ადამა ტრაორე (მალი)

1999 წლის მსგავსად მალის ნაკრებმა ამჯერადაც მესამე ადგილი დაიკავა, ამ ნაკრების ლიდერი კი ადამა ტრაორე იყო. მესამე ადგილისთვის მატჩში მან დუბლი შეასრულა, ხოლო მთლიანად ტურნირი მან 4 გოლით და სამი შედეგიანი გადაცემით დაასრულა.

ტურნირის დამთავრებისთანავე ის 14 მილიონ ევროდ მონაკომ შეიძინა. 2016-17 წლების სეზონში მან მხოლოდ 5 მატჩი ჩაატარა და 2 გოლი გაიტანა. ამის შემდეგ ის ბელგიურ სერკლ ბრიუგეშია განათხოვრებული, რომელიც "მონეგასკების" პარტნიორი კლუბია, ადამა 23 წლისაა.

 

2017 წელი - დომინიკ სოლანკე (ინგლისი)

დომინიკი ინგლისის ნაკრების კაპიტანი და საუკეთესო ფეხბურთელი იყო, რომელმაც პირველად მოახერხა ახალგაზრდული მსოფლიო ჩემპიონატის მოგება. მან ნახევარფინალში იტალიასთან დუბლი შეასრულა, ხოლო მეოთხედფინალში მისი ერთადერთი გოლით ბრიტანელებმა მექსიკა დაამარცხა.

ჯერ კიდევ ტურნირის დაწყებამდე, დიდი სკანდალით უფასოდ ჩელსიდან ლივერპულში გადავიდა, სადაც ფეხის მოკიდება ვერ შეძლო. 2019 წლის დასაწყისში ყველასთვის მოულოდნელად ბორნმუთმა მასში 19 მილიონი ევრო გადაიხადა, თუმცა "ალუბლების" შემადგენლობაში მას გოლი ჯერჯერობით არ გაუტანია, ის 21 წლისაა.

 

2019 წელი - ლი კან ინი (სამხრეთ კორეა)

კიმი სამხრეთ კორეის ნაკრების უდავო ლიდერი იყო, ამ ნაკრებმა ფინალამდე მიაღწია, სადაც ზემოთხსენებული გიორგი წიტაიშვილის უკრაინასთან დამარცხდა. მოთამაშემ ტურნირზე 2 გოლი და 4 შედეგიანი გადაცემა შეასრულა.

ის ვალენსიას ფეხბურთელია და კლუბთან კონტრაქტი 2022 წლამდე აკავშირებს, ლა ლიგაში დებიუტი კი გასულ სეზონში ჰქონდა. კიმი კორეული ფეხბურთის მომავლად ითვლება, გულშემტკივრები მისი და სონის დუეტს დიდი ხანია ელიან, ამჟამად ის 18 წლისაა.