ფეხბურთი / პრემიერლიგა /
ნისლიანი ალბიონის საჭირო “ჯოკრები“
07/11/2019 14:13
300

ფეხბურთში კარგი თავდამსხმელი ბევრია, მაგრამ სტაბილური - ცოტა. იმისათვის, რომ გულშემატკივრებს თავი შეაყვარო, ისინი მუდამ უნდა გაახარო. ზოგიერთ ფორვარდს განსაკუთრებული თვისება აქვს: იყოს სასარგებლო ყველაზე საჭირო მომენტში. ფეხბურთის მოყვარულები ასეთ მოთამაშეებს “ჯოკრებს“ უწოდებენ.

წარმოგიდგენთ ფეხბურთელებს, რომლებსაც ინგლისის პრემიერ ლიგაში სწორედ ამ სახელით იცნობენ.

ხავიერ ერნანდესი (ჩიჩარიტო)

სტაბილურობა ნამდვილად არაა ის სიტყვა, რომელიც ამ მექსიკელის ხსენებისას თავში აზრად მოგვივა. მანჩესტერ იუნაიტედიდან აბარგების შემდეგ, მის კარიერაში აღმასვლას დაღმასვლა მოჰყვებოდა. “ოლდ ტრაფორდზე“ ასპარეზობისას, ჩიჩარიტო ჩემპიონატის ერთ-ერთი ყველაზე შედეგიანი მოთამაშე იყო.

იმ დროს, ხავიერ ერნანდესი უეინ რუნისა და დიმიტარ ბერბატოვის დუბლიორად ითვლებოდა, მაგრამ ხშირად, მატჩების ბედს სწორედ მისი გოლები წყვეტდა. მანჩესტერში ჩატარებულ 103 მატჩში, ჩიჩარიტომ 37 გოლი გაიტანა და 12 საგოლე პასი გააკეთა. ის ძირითად შემადგენლობაში მხოლოდ 49-ჯერ გამოჩნდა.

ჯერმეინ დეფო

ტორონტო, სანდერლენდი, ტოტენჰემი... სად აღარ უთამაშია ვეტერან ინგლისელს. ასაკის მატებასთან ერთად, დეფომ სისწრაფე დაკარგა, მაგრამ უკვდავი ნიჭის წყალობით, ის შეტევების ერთ-ერთი საუკეთესო დამგვირგვინებელია.

ოფიციალური მონაცემებით, შეცვლაზე შესულ დეფოს 24 გოლი აქვს გატანილი. ინგლისელი ძირითად შემადგენლობაშიც ხშირად ხვდება, მაგრამ სტატისტიკა არ ტყუის - დეფო “ჯოკერია“.

ოლე-გუნარ სოლსკიაერი

ალექს ფერგიუსონის საყვარელი “ჯოკერი“, რომლის ფონზეც დანარჩენები უფერულდებიან. “მკვლელი ბავშვის სახით“ (Baby face killer) მისი მეტსახელია, რომელიც სწორედ ნორვეგიელის უნიკალური ნიჭიდან გამომდინარეობს.

სოლსკიაერს თავისი გუნდი მარცხისგანაც ბევრჯერ გადაურჩენია და გამარჯვების გოლიც არაერთხელ გაუტანია. ამის დასტურად ჩემპიონთა ლიგის 1999 წლის ფინალიც საკმარისია, სადაც ნორვეგიელმა გადამწყვეტი გოლი გაიტანა და მანჩესტერს 2:1 მოაგებინა.

სოლსკიაერს მანჩესტერში 408 მატჩი აქვს ჩატარებული და 149 გოლის ავტორია. მისი გოლების მეოთხედი სწორედ შეცვლაზე შესვლის შემდეგაა გატანილი.

კევინ ფილიპსი

ეს ფორვარდი ბევრს არ ახსოვს, არადა, საკმაოდ წარმატებული იყო. როცა მატჩის მიმდინარეობა შესაცვლელი იყო, ამას სწორედ ფილიპსი აკეთებდა.

ასაკის მატებასთან ერთად, ფილიპსი უფრო და უფრო უკეთესი ხდებოდა. პროფესიონალურ ფეხბურთში მან 20 წელი გაატარა და 10 კლუბში ითამაშა. მისი კარიერის საუკეთესო მომენტი 39 წლის ასაკში იყო, როცა უოტფორდთან ჩემპიონშიპის პლეი ოფის მატჩში, შეცვლაზე შესულმა ფილიპსმა გადამწყვეტი გოლი გაიტანა და კრისტალ პალასი პრემიერ ლიგაში გადაიყვანა.

ოლივიე ჟირუ

მსოფლიოს ჩემპიონობა, ევროპა ლიგის ოქროს მედალი და ინგლისის თასი - ეს იმ ტიტულების ჩამონათვალია, რომელსაც ოლივიე ჟირუ ატარებს. ჯილდოების გარდა, ფრანგს შეუძლია იამაყოს იმით, რომ ერთ-ერთი საუკეთესო “ჯოკერია“.

ხშირად, ჟირუს ისე არ აფასებენ, როგორც იმსახურებს. თანამედროვე ფეხბურთში მისი დონის “ფინიშერი“ ბევრი ნამდვილად არაა. არსენალსა და ჩელსიში, შეცვლაზე შესულმა ფრანგმა 20-ზე მეტი გოლი გაიტანა და “ჯოკრის“ სახელიც დაისაკუთრა.

დევიდ ფერკლაფი

ყველაზე ცნობილი ლივერპულელი “ჯოკერი“. გასული საუკუნის 70 და 80-იან წლებში, ის ლივერპულის ფორვარდების სტაბილური დუბლიორი იყო. მერსისაიდელთა რიგებში ჩატარებულ 154 მატჩში, ის ძირითად შემადგენლობაში 82-ჯერ გამოჩნდა. მისი 55 გოლიდან 35, მე-60 წუთის შემდეგაა გასული. ის მწვრთნელების საიდუმლო იარაღად მიიჩნეოდა.

კარიერის დასრულების შემდეგ, ფერკლაფმა ავტობიოგრაფიული წიგნი დაწერა და სახელად “სუპერცვლილება“ დაარქვა.

დივოკ ორიჯი

ბელგიელი “ჯოკრის“ სტატუსის მისაღებად ჯერ კიდევ იბრძვის და მას ამის დიდი პოტენციალი აქვს. ლივერპულში მისი კარიერა რთულად დაიწყო. ორიჯი დროის უმეტეს ნაწილს სათადარიგოთა სკამზე ატარებდა და სხვადასხვა დროს, ვოლფსბურგსა და ლილშიც იყო განათხოვრებული. ჩნდებოდა კითხვა, რატომაა ორიჯი “ენფილდზე“?

2018 წლის 2 დეკემბერს, ევერტონთან დერბის დროს, 96-ე წუთზე, ლივერპულს ორიჯის გოლმა მოაგებინა და ამის შემდეგ, მერსისაიდელმა ფანებმა თავდამსხმელი განსაკუთრებულად შეიყვარეს. ორიჯიმ ჩემპიონთა ლიგაზეც გაიბრწყინა - კატალონიის ბარსელონას დუბლი შეუსრულა და ტოტენჰემთან ფინალურ მატჩში გადამწყვეტი მეორე გოლიც გაიტანა. ცხადია, ლივერპულელები ორიჯის იოლად ვეღარ შეელევიან.