კალათბურთი / NBA /
ტიმ დანკანი სპურსში დაბრუნდა!
07/23/2019 1:26
670

ლეგენდარული კალათბურთელი, ტიმ დანკანი სან ანტონიო სპურსში დაბრუნდა. ლეგენდარული 21 ნომერი ტეხასურ გუნდში ამჯერად ასისტენტი მწვრთნელის მოვალეობას შეასრულებს.

სან ანტონიოს ოფიციალური ვებგვერდის ცნობით, დანკანთან ერთად ასისტენტი მწვრთნელის თანამდებობაზე უილ ჰარდი დაინიშნა.

"სავსებით ლოგიკურია, რომ მას შემდეგ, რაც მე ტიმ დანკანს 19 წლის განმავლობაში ვუასისტე, ის სიკეთეს მიბრუნებს", - განაცხადა სან ანტონიოს მთავარმა მწვრთნელმა, გრეგ პოპოვიჩმა.

შეგახსენებთ, რომ ტიმ დანკანი 1997 წლის დრაფტზე პირველ ნომრად სწორედ სპურსმა აიყვანა, სადაც მან 19 წელი დაჰყო. ტიმმა გუნდთან ერთად NBA ხუთჯერ მოიგო, კარიერა კი 2016 წელს დაასრულა.

სინამდვილეში უნდა ითქვას, რომ ის არსადაც არ წასულა და მუდამ "სახლში" იყო, შესაბამისად დაბრუნებაც არ სჭირდებოდა. პოპმა ტიმის ამ პოზიციაზე მოწვევით გუნდში მისი როლი გააძლიერა, თავის მხრივ დანკანსაც როგორც ჩანს მოჰბეზრდა შერეულ ორთაბრძოლაში ვარჯიში და საყვარელ საქმეს უბრუნდება.

სათამაშო კარიერის უკანასკნელ პერიოდში ის ძალიან ხშირად ითავსებდა მენტორის ფუნქციებს, ამისთვის ბობან მარიანოვიჩის კომენტარიც კმარა, სადაც "ბობი" საუბრობს, რომ ამერიკაში ახალ ჩასულს ტიმი ვარჯიშის შემდეგ ხშირად ეხმარებოდა სხვადასხვა კომპონენტის დახვეწაში.

მიმდინარე თავისუფალი აგენტების ბაზარი უკანასკნელ პერიოდში ერთ-ერთი ყველაზე შთამბეჭდავი გამოდგა, თუმცა სან ანტონიოს აქ ფაქტობრივად არ უაქტიურია (მხოლოდ, დაიმატა დამარ კეროლი და გაუხანგრძლივა რუდი გეის). მაგრამ პოპმა ტიმის დაბრუნებით გუნდს დიდი ალბათობით შესძინა ის, რაც მას ასე აკლდა, ის ნამდვილი ხიდი იქნება მოთამაშეებსა და მწვრთნელს შორის, ამაში მას ბადალი არ ჰყავს.

ასე, რომ კაცი რომელიც იშვიათად იღიმის კვლავ საქმეშია!

#Flashscore