ფეხბურთი / ლა ლიგა /
ვარსკვლავთცვენა “კამპ ნოუზე“ - რატომაა სარისკო გრიზმანის ტრანსფერი?
07/23/2019 13:26
490

2-წლიანი სატრანსფერო საგა დასრულდა: ანტუან გრიზმანმა მადრიდის ატლეტიკო დატოვა და კატალონიის ბარსელონას მაისური მოირგო. ესპანეთის ჩემპიონებს 28 წლის ფრანგის შეძენა 120 მილიონი ევრო დაუჯდათ.

“კამპ ნოუზე“ გრიზმანის ხილვა ზოგს უხარია, ზოგიც კი, შიშობს, რომ ფრანგის ხელფასისა და ბონუსების გათვალისწინებით, ბარსელონა ფინანსური კრიზისის წინაშე დადგება.

ცხადია, გრიზმანის ნიჭში ეჭვი არავის ეპარება, მაგრამ ტრანსფერი მაინც სარისკოდ ჩანს და სწორედ ამის მიზეზებზე ვისაუბრებთ.

ფანების გულგრილობა

ბარსელონას შეუძლია იამაყოს იმით, რომ მუზეუმში უამრავი ტიტული აქვს და ლურჯ-ბროწეულისფერი მაისურით ბევრ ლეგენდარულ ფეხბურთელს უთამაშია. ამის გათვალისწინებით, ბარსელონას წინადადებაზე უარს თითქმის ვერცერთი ფეხბურთელი ამბობს. გამონაკლისებს შორის ერთ-ერთი სწორედ ანტუან გრიზმანი იყო.

დაახლოებით წელიწადნახევრის წინ, კატალონიელებმა ფრანგის მიმართ ინტერესი ღიად გამოხატეს, მაგრამ ფეხბურთელის მხრიდან მოულოდნელი პასუხი მიიღეს. გრიზმანმა ვიდეო გამოაქვეყნა, სადაც ბარსელონას ინტერესი არაფრად ჩააგდო და თქვა, რომ მისი სახლი ატლეტიკო იყო. კატალონიელებს იმედი გაუცრუვდათ და გაბრაზდნენ, რადგან ასეთ პასუხს მიჩვეულები არ იყვნენ. ბარსას ფანებმა გრიზმანის ლანძღვა დაიწყეს.

ვიდეოს გავრცელების შემდეგ, ბარსელონასა და ატლეტიკოს პირველივე მატჩში, კატალონიელმა ქომაგებმა გრიზმანს 90 წუთის განმავლობაში უსტვინეს. წელს, ტრანსფერის გაოფიციალურების შემდეგ, ბარსას შტაბში ბევრი ღელავდა, რომ ახალწვეული გუნდში თავს უსაფრთხოდ ვერ იგრძნობდა.

ამხელა კლუბში ფანების იგნორირება შეუძლებელია და რამდენად დაალაგებს ფრანგი ადგილობრივებთან ურთიერთობას, ძნელი სათქმელია. ისე კი, “მარკასთან“ ახლახანს მიცემულ ინტერვიუში, გრიზმანმა აღიარა, რომ მის წარსულში რასაც შეცვლიდა, მხოლოდ იმ ვიდეოს არგადაღება იქნებოდა.

ლუის სუარესთან და ლიონელ მესისთან შეთამაშება

“კამპ ნოუდან“ ნეიმარის აბარგების შემდეგ, წინა ხაზში გაჩნდა ხვრელი, რომელიც ვერც ფილიპე კოუტინიომ შეავსო, ვერც მალკომმა და ვერც უსმან დემბელემ. ახლა კი, ჯერი გრიზმანზეა. მის შესაძლებლობებს ყველა პატივს სცემს, მაგრამ მესისა და სუარესის გვერდით, შესაძლოა, გრიზმანის დონის ფეხბურთელებიც ჩრდილში მოექცნენ.

ნეიმარს თამაშის თავისებური სტილი აქვს და მესი-სუარესის ვარსკვლავურ დუეტთან იდეალურად იყო შეწყობილი. შეტევის ეს ტრიო მსოფლიო ფეხბურთის ისტორიაში ერთ-ერთი საუკეთესო იყო.

ბარსელონაში ყველაფერი მესიზეა აგებული და ეს ყველამ კარგად იცის. ატლეტიკოში გრიზმანი გუნდის ერთპიროვნული ლიდერი იყო და ახალ რეალობასთან შეგუება მასაც გაუჭირდება. ფრანგს მესის ჩრდილქვეშ ყოფნაზე ადრეც უსაუბრია და აშკარაა, რომ მისი ადაპტაციის პროცესი იოლად არ ჩაივლის.

მნიშვნელოვან მომენტებში მოდუნება

ტექნიკურ და უზომოდ ნიჭიერ გრიზმანს ერთი უარყოფითი თვისება აქვს: საჭირო მომენტებში თითქოს მოედნიდან ქრება. შედარებით სუსტ გუნდებთან, გრიზმანს გოლები სტაბილურად გააქვს, მაგრამ გადამწყვეტ მატჩებში უჭირს. რეალისა და ბარსელონას წინააღმდეგ ჩატარებულ ბოლო 12 მატჩში, მან მხოლოდ 3 გოლი გაიტანა და 1 საგოლე პასი გააკეთა.

ჩემპიონთა ლიგის გასულ სეზონში, გრიზმანი იუვენტუსთან დაპირისპირებაში თითქმის არ ჩანდა, 2016 წელს კი, რეალთან ფინალურ მატჩში პენალტი ვერ გამოიყენა.

ბარსელონას კვლავ ევროპაში გამეფება სურს და ამისთვის გამარჯვებულის მენტალიტეტის მქონე ფეხბურთელებია საჭირო. არის გრიზმანი ასეთი? ჯერ არ ვიცით...

ახალი თანაგუნდელების მხრიდან უნდობლობა

წელიწადნახევრის წინ, ზემოთხსენებული ვიდეოს გამოქვეყნებამდე, გუნდში გრიზმანის ხილვა მესისაც სურდა და სხვა თანაგუნდელებსაც. ყველაფერი მას შემდეგ შეიცვალა, რაც ფრანგმა კატალონიური მხარე არაფრად ჩააგდო და ბარსელონაში თამაშზე არც დაფიქრებულა.

ფანებთან ერთად, ფეხბურთელებიც განაწყენდნენ. წელს, კატალონიაში გრიზმანის გამოჩენას არავინ ელოდა. ამ ზაფხულს, ჟურნალისტებმა მესის გრიზმანის შესაძლო ტრანსფერზე ჰკითხეს, მაგრამ არგენტინელმა კომენტარი არ გააკეთა. სამაგიეროდ, მან გუნდში ნეიმარის დაბრუნება ისურვა. დაახლოებით იგივე აზრზეა ლუის სუარესიც, რომელმაც მესისგან განსხვავებით, გრიზმანს დაურეკა და ბარსელონაში გადასვლა მიულოცა.

დღევანდელი შემადგენლობიდან, გრიზმანს ღიად მხოლოდ ხორვატი ივან რაკიტიჩი მიესალმა. ფრანგს ყურადღებას აქცევენ თანამემამულეებიც, მაგრამ რამდენად თბილად მიიღებენ მას გასახდელის სხვა წევრები, რთული სათქმელია.