ფეხბურთი / ქართული ფეხბურთი /
ბექა მიქელთაძე: "ძალიან გახარებული ვარ"
07/24/2019 16:00
408

ყაზანის რუბინი რუსული პრემიერ ლიგის ერთ-ერთი მთავარი მოულოდნელობაა. ზაფხულში გუნდი ლეგენდარულმა ყურბან ბერდიევმა დატოვა, რითიც გუნდის ფინანსური მდგომარეობა ცნობილი გახდა.

გუნდი არაერთმა ლიდერმა დატოვა და დაიწყო ახალი გუნდის მშენებლობა, სადაც აქცენტი ახალგაზრდა ფეხბურთელებზე გაკეთდა. როგორც აღმოჩნდა, ჯერჯერობით ეს კურსი ამართლებს, რადგან ყაზანელებმა მოსკოვური ვოიაჟი, სადაც ლოკომოტივსა და დინამოს შეხვდნენ 4 ქულით დაასრულეს.

გუნდის წარმატების ერთ-ერთი მთავარი განმაპირობებელი ქართული ტრიოა. ლოკომოტივთან თავი ხვიჩა კვარაცხელიამ გამოიჩინა, დინამოსთან ბექა მიქელთაძემ 93 წუთზე გამარჯვების მომტანი გოლი გაიტანა, ხოლო ზურიკო დავითაშვილი ორივე შეხვედრაში ძირითადში იყო და რუსულ მედიაში საკმაოდ კარგი შეფასებებიც მიიღო.

რუსულმა გამოცემა iz.ru-მ მეორე მოსკოვური მატჩის მთავარ გმირ ბექა მიქელთაძესთან საკმაოდ ვრცელი ინტერვიუ ჩაწერა, სადაც ქართველმა წარმატებულ სტარტზე, ქართულ ტრიოზე და ახმატთან მოახლოებულ მატჩზე ისაუბრა.

— გამოჩნდა, რომ დინამოსთან მატჩი რუბინისთვის ძალიან ძნელი გამოდგა…

— თამაში ნამდვილად ურთულესი გამოვიდა. პირველ ნახევარში ჩვენ მოთამაშე გაგვიძევეს, ამან კი თამაში კიდევ უფრო რთული გახადა. ჩვენ ვეცადეთ, რომ ჩვენივე თავისთვის გვეჯობნა და წლის პირველი გამარჯვება მოგვეპოვებინა, რაც საბოლოოდ გამოგვივიდა, რა თქმა უნდა ბედნიერები ვართ.

გასაკვირია, რომ გუნდს, რომელიც თამაშის უმეტესი დრო ნაკლებობაში იყო, მატჩის ბოლოსკენ გოლის გატანის ძალა შემორჩა...

დიახ, როგორც ვთქვი ნაკლებობაში თამაში რთულია. თუმცა სხვა მხრიდან რომ შევხედოთ, ეს გუნდს აძლევს მოტივაციას, რომ ყველანაირად კონცენტრირება მოახდინოს და ბოლომდე იბრძოლოს. საოცარია, როცა ასეთი თამაშის შემდეგ გოლიც გაგაქვს, წარმოუდგენელ ემოციებს განიცდი.

— როგორი ემოცია დაგეუფლათ რუსულ პრემიერ ლიგაში გატანილი პირველი გოლის შემდეგ?

— ძალიან გახარებული ვარ. როცა შენ მოდიხარ ახალ კლუბში და მალევე აჩვენებ ხალხს თუ რა შესაძლებლობები გაქვს, ამაზე კარგი ვფიქრობ არაფერია.

— რუბინი პირველი გუნდია, რომელმაც დინამოს წინააღმდეგ ახალ არენაზე ითამაშა. როგორ მოგეწონათ ის?

— ვთვლი, რომ უმაღლესი დონის სტადიონია და აქ თამაში შესანიშნავი იყო. ვფიქრობ, იმდენად კომფორტულია, რაღაცით კინოთეატრს წააგავს.

— ცოტა თუ ფიქრობდა, რომ რუბინი სეზონის დასაწყისიდანვე ასეთ თამაშს აჩვენებდა. რისი დამსახურებაა გუნდის ასეთი გამოსვლა?

— შესაძლოა ჩვენი ასეთი კარგი სტარტი სწორედ იმის ბრალია, რომ ამას არავინ ელოდა. როდესაც შენგან ნაკლებს ელიან, შენ გინდა საპირისპირო დაამტკიცო, პლუს ამას რუბინში შესანიშნავი კოლექტივი ვართ შეკრებილი, რომელსაც ბევრი რამის მიღწევა შეუძლია. ვფიქრობ, ჩვენგან სიურპრიზებს ყველა მატჩში უნდა ელოდეთ.

— რუბინში შესანიშნავი "ქართული ბანდა" შეიკრა. თქვენ რამდენად გეხმარებათ დანარჩენი ორი ქართველის გუნდში ყოფნა?

— რა თქმა უნდა ეს სამივესთვის შესანიშნავია. მე, ხვიჩა და ზურიკო ერთმანეთს დიდი ხანია ვიცნობთ, ჩვენ ერთად თბილისის დინამოში ვთამაშობდით. ჩვენ ერთმანეთს შესანიშნავად ვგრძნობთ და ძალიან გვინდა მოედანზე სამივე ერთად გვიხილოთ. გვინდა ყველას ვაჩვენოთ, რომ თამაში შეგვიძლია და ეს ჩვენი მაქსიმუმი ნამდვილად არა არის.

— მომავალი მატჩი საკუთარ კედლებში გროზნოს ახმატთან გაქვთ. როგორი შემართებით ხვდებით აღნიშნულ დაპირისპირებას?

— ჩვენ ეს მატჩი ყოველ მიზეზს გარეშე უნდა მოვიგოთ, რადგან საკუთარ კედლებში გვსურს კარგად დაწყებული საქმის გაგრძელება. სახლში საკუთარი გულშემატკივრების წინაშე მოგების გარდა ყველა სხვა რეზულტატი წარუმატებლობად ჩაითვლება.