კალათბურთი / NBA /
ჯერ კიდევ, მოთხოვნადი თავისუფალი აგენტები NBA-ში
07/26/2019 16:31
121

NBA-ში სარგებლის მომტანი კალათბურთელები, უკვე, "დაბინავებულები" არიან, შესაბამისად, ერთეულები დარჩნენ თავისუფალი აგენტების ბაზარზე ისეთები, რომელთა ფასიც, როგორც მინიმუმ, საჭირო თანხა ღირს. ვიმსჯელოთ, თითოეულის უნარსა და, მათ გარშემო, მოვლენათა შესაძლო განვითარებებზე.

ლენს სტივენსონი

197სმ სიმაღლის 2-3 ნომერი, რომელსაც, თითქმის, ყველაფერი გამოსდის მოედანე, თუმცა, მისი ინტელექტი საშუალებას არ აძლევს, იყოს გუნდის სტაბილური წევრი. მოუხდებოდა გოლდენ სტეიტ უორიორსს. სათადარიგოთა სკამიდან შემოსული სტეფ კარისა და დიენჯელო რასელის ცუდ დაცვასაც დააბალანსებდა და თავის სასროლსაც სტაბილურად გამოიყენებდა.

ჯერემი ლინი

ჯერ კიდევ, კარგი "სქორერი" ბენჩიდან. მას აღარ ენდობიან, თუმცა, საკმაოდ დიდი შანსია, სტაბილური როლი ღირსეულად მოირგოს. ის მოუხდებოდა გუნდს, რომელსაც ცუდად მსროლელი გამთამაშებლების სიჭარბე აქვს. შესაძლოა - ნიუ ორლეანს პელიკანსს.

ჯამალ კროუფორდი და ვინს კარტერი

გამოცდილი ვეტერანები, რომლებიც ზუსტად ჩაჯდებოდნენ ახალგაზრდული ატლანტა ჰოუქსის რეზერვში. ამ კლუბს ჰყავს უდიდესი ტალანტები, თუმცა, ძალიან, ძალიან აკლია გამოცდილება და კარგი მენტორები.

აიმან შამპერტი

დაახლოებით, იგივე შემთხვევაა, რაც ზემოხსენებულ ლენს სტივენსონზე, ოღონდ, ეს ბიჭი სროლაში არც ისე კარგია. მშვენიერი დანამატი იქნებოდა გუნდისათვის, რომელსაც ბევრი კარგი მსროლელი ჰყავს, მაგალითად - ფინიქს სანსი.

დუაით ჰოვარდი

ეს არის წარსულში თავისი პოზიციის ხალხზე 10 თავით მაღლა მდგომი ცენტრი, რომელიც ახლა აღარავის სჭირდება. ეს იმიტომ არ ხდება, რომ სტაგნაცია დაეტყო, მას ხასიათის სერიოზული პრობლემები აქვს. არ არის ენთუზიასტი და მხოლოდ მაშინაა პროდუქტიული, როცა თვითონ უნდა.

დუაითი არც ერთ გუნდს არ მოუხდება, სანამ კალათბურთის მიმართ დამოკიდებულებას არ შეცვლის. თუ ცვლილება შედგა, ის, მარტივად, ყველასთვის სასურველი გახდება.

ჯეი არ სმიტი

უკვე ასაკშია და არც დაცვაშია კარგი, თუმცა, მისი სასროლი სელექცია დღესაც საიმედოა. კარგი ვარიანტია მესამე ოპციის რეზერვისტ მსროლელად, რომელსაც გარანტირებული წუთები არ ექნებოდა. რთულია ერთი გუნდის დასახელება, ასეთი როლით ნებისმიერ კლუბს გამოადგებოდა.

კარმელო ენტონი

უბრალოდ, არ შეიძლება, ამ მოთამაშის ტალანტი უცებ გაქრეს. მისი პოსტ-მოძრაობები და სროლა დღესაც გამოსადეგია. ამჯერად, ყველაფერი მელოზეა დამოკიდებული, ის უნდა მიხვდეს და მოირგოს Role Player-ის ამპლუა და ჩვენ მივიღებთ კევინ ლავის გაცილებით უფრო მობილურ და ათლეტურ 4 ნომერს. მოუხდებოდა პორტლენდ თრეილ ბლეიზერსს.

ჯონათონ სიმონსი

უცნაურიც კია ამ კალათბურთელის თავისუფალ აგენტებს შორის ყოფნა. ეს არის 196სმ სიმაღლის 2 ნომერი, რომლის სტილიც ლენს სტივენსონსა და აიმან შამპერტს შორისაა, თუმცა, ჭკუითა და ლიდერობით ორივეზე მაღალი დონისაა. კარგად მოერგებოდა გუნდს, რომლის ფეთქებად სტილსა და კარგად მსროლელ გამთამაშებელს, ასევე, ფეთქებადი სტილით გვერდს გაუმაგრებდა. იქნებ - ვაშინგტონ უიზარდსი? აიზეია თომასის გვერდით, სათადარიგოთა სკამიდან ბრედლი ბილის შემცვლელად.

კენეთ ფარიდი

ამ მძიმე ფორვარდის უგუნდოდ ყოფნა კი ნამდვილად უჩვეულოა. ეს არის ფენომენალური დამცველი, სწრაფი, ძლიერი და კარგად მომხსნელი ათლეტური 4 ნომერი, რომელიც იდეალური მეწყვილეა ქულებზე ორიენტირებული ცენტრების გვერდით. რომელია გუნდი, რომელსაც სროლის პრობლემა არ აქვს, ჰყავს "სქორერი" ცენტრი და ძალიან გამოადგება შავი სამუშაოს შემსრულებელი Power Forward? - ბოსტონ სელტიქსი. არც კი ჰყავთ კარგი ნომინალური 4 ნომერი.