კალათბურთი / NBA /
შარლოტ ჰორნეთსი - გუნდი, რომელიც ვერ ვითარდება
07/29/2019 10:25
201

შარლოტ ჰორნეთსი, გუნდი, რომელიც, უბრალოდ, ვერ ვითარდება და ამ ყველაფერს თავისი მიზეზები აქვს. კლუბს არასოდეს უთამაშია NBA-ს ფინალებში.

2011 წელს ჰორნეთსმა გაცვალა შონ ლივინგსტონი, სტივენ ჯექსონი და დრაფტ პიკი (ტობაიას ჰარისი) ბისმაკ ბიომბოში, რომელიც, პირდაპირ ვთქვათ, სათადარიგო ცენტრის არც ისე კარგი ვარიანტია რომელიმე გუნდისათვის.

2012 წლის NBA-ის დრაფტი. შარლოტი ირჩევს მაიკლ ქიდ-გილქრისტს და  აიგნორებს ბრედლი ბილს. იდეაში, გილქრისტი არ არის ცუდი ფორვარდი, მაგრამ ამ კალათბურთელს სჭირდებოდა გუნდი, რომელიც მის "სპეციფიკურ" შესაძლებლობებს მკაცრად და ფრთხილად განავითარებდა. ჰორნეთსი კი, მოთამაშეების განვითარების მხრივ, საშინლად მოქმედია.

იგივე, 2012 წელს, მეორე რაუნდის პიკად კლუბმა აირჩია ჟეფრი ტეილორი, როცა, მის ნაცვლად, დრეიმონდ გრინის ან კრის მიდლტონის არჩევა შეეძლოთ.

2015 წელს, პირველი რაუნდის პიკის სანაცვლოდ, ბოსტონ სელტიქსმა შარლოტელებს რამდენიმე პიკი შესთავაზა, მაიკლ ჯორდანმა კი (გუნდის მფლობელი) უარი თქვა და, საბოლოოდ, მე-9 პიკად ფრენკ კამინსკი აირჩია. დღეს ფრენკის სათამაშო წუთები პარკეტზე გარანტირებული არც კია.

NBA-ის 2016 წლის დრაფტზე შარლოტი მზად იყო, აერჩია პასკალ სიაკამი, თუმცა, ეს პიკი კლუბმა მარკო ბელინელიში გაცვალა.

კულმინაცია ხდება 2017 წლის დრაფტზე, როცა გუნდის იმდროინდელი მთავარი მწვრთნელი, სტივ კლიფორდი, დონოვან მიჩელის აყვანას "იხვეწებოდა", მაგრამ რა ქნეს ჰორნეთსის მესვეურებმა? - აირჩიეს მალიკ მონკი.

2019 წელს კლუბი კემბა უოლქერს არ სთავაზობდა მაქსიმალურ კონტრაქტს, რაც უჩვეულოა, როცა გუნდს უკვე ჰყავს ისეთი კალიბრის ვარსკვლავი, როგორიც კემბაა. შედეგად, გამთამაშებელმა შარლოტი დატოვა.

2019-20 წლების სეზონში შარლოტ ჰორნეთსი ნიკოლას ბატუმს, ბისმაკ ბიომბოს, მარვინ უილიამსს, კოდი ზელერსა და მაიკლ ქიდ-გილქრისტს, ჯამში, 85 მილიონი დოლარი უნდა გადაუხადოს. ეს იმდენივეა, რასაც 2016-17 წლების სეზონში ერთად იღებდნენ კევინ დურანტი, კლეი ტომპსონი, დრეიმონდ გრინი და ანდრე იგუოდალა გოლდენ სტეიტ უორიორსში, როცა ჩემპიონები გახდნენ.