ფეხბურთი / პრემიერლიგა /
ვინ შეცვლის ლუკაკუს? იუნაიტედი შემტევს ეძებს...
08/09/2019 14:20
206

სატრანსფერო საგა დასრულდა - რომელუ ლუკაკუმ მანჩესტერ იუნაიტედი დატოვა და მილანის ინტერის მაისური მოირგო. ახალ სეზონში, ცენტრფორვარდის პოზიციაზე მარკუს რეშფორდი იასპარეზებს, ზამთარში კი, “წითელ ეშმაკებს“ შეტევის გაძლიერება მოუწევთ.

წარმოგიდგენთ ფეხბურთელებს, რომლებსაც ზამთარში იუნაიტედის დახმარება შეუძლიათ:

კშიშტოფ პიონტეკი

იტალიის სერია ა-ს გასულ სეზონში, პოლონელმა 34 მატჩში 22 გოლი გაიტანა. ჯენოასა და მილანში წარმატებული თამაშით, პიონტეკმა ყველას დაუმტკიცა, რომ ნიჭიერია და წინ დიდი მომავალი ელის. პოლონელი 24 წლისაა და ჯერ კიდევ იზრდება. თანაც, მანჩესტერს პიონტეკის ტრანსფერი პაულო დიბალაზე იაფი დაუჯდება.

მაურო იკარდი

არგენტინელის სახელს მანჩესტერს დიდი ხანია უკავშირებენ, მაგრამ ტრანსფერი ჯერაც არ განხორციელებულა. ამ ზაფხულს, ინტერში იკარდის მდგომარეობა განსაკუთრებით დამძიმდა და თავდამსხმელი ახალ კლუბს ეძებს.

შესაძლოა, ინგლისელებმა ამით ისარგებლონ და არგენტინელი ხელში დაბალ ფასად ჩაიგდონ. იკარდის ოსტატობაში ეჭვი არავის ეპარება. პრობლემების მიუხედავად, მან გასულ სეზონში 17 გოლი მოაგროვა.

ფილიპე კოუტინიო

ლივერპულიდან კოუტინიოს აბარგებამ მერსისაიდელები გააღიზიანა. ჯერჯერობით, ბრაზილიელმა ბარსელონაში თავი ვერ დაიმკვიდრა და ოპტიმალური ფორმისგან შორსაა.

კატალონიელები მის გაყიდვაზე თანახმანი არიან, რადგან ბიუჯეტის შევსება სურთ. კოუტინიო იაფი არ ეღირება, მაგრამ ტრანსფერით ორივე კლუბი დაინტერესებული იქნება. ცუდი ფორმის მიუხედავად, კოუტინიო მაინც ძლიერი ფეხბურთელია და არც იმ ასაკშია, რომ კლუბებმა მასზე ხელი ჩაიქნიონ.

უსმან დემბელე

ბარსელონა იაფად არც დემბელეს დათმობს. ფრანგი წარმოუდგენლად ნიჭიერია, მაგრამ ბარსელონაში სრულად ადაპტირებას ვერაფრით ახერხებს. დისციპლინის პრობლემების გამო, დემბელე კატალონიაში შენიშვნებს ხშირად იღებს.

ვფიქრობთ, დემბელეს სტილის ფეხბურთელი პრემიერ ლიგას ალღოს ადვილად აუღებს და მანჩესტერსაც კარგად მოერგება. ის ტექნიკური და სწრაფია, რომელსაც გოლების გატანაც შეუძლია. მიუხედავად ამისა, ბარსელონაში დემბელეს შეუცვლელად ნამდვილად არ მიიჩნევენ და ტრანსფერის შანსიც არსებობს.

ტიმო ვერნერი

სადღეისოდ, გერმანიის ბუნდესლიგაში უამრავი ტალანტია. გასულ სეზონში, ლუკა იოვიჩმა იმდენად გაიბრწყინა, რომ ამ ზაფხულსვე მადრიდის რეალში აღმოჩნდა. მისგან განსხვავებით, ვერნერი სტაბილურ თამაშს უკვე რამდენიმე სეზონია აჩვენებს.

გასული სეზონის 29 მატჩში, 23 წლის გერმანელმა 16 გოლი გაიტანა და 7 საგოლე პასი გააკეთა. ცხადია, ვერნერი დიბალას დონის ვარსკვლავი არაა, მაგრამ მანჩესტერისთვის ის მაინც სერიოზული ძალა იქნებოდა.