ჩოგბურთი / ATP /
ნიკოლოზ ბასილაშვილი ცინცინატის მასტერსზე მეთხუთმეტე ნომრად იასპარეზებს
08/10/2019 13:18
1119

საქართველოს პირველი ჩოგანი, ნიკოლოზ ბასილაშვილი ცინცინატის მასტერზე იასპარეზებს.

ამერიკის ღია პირველობის მოსამზადებელი მორიგი ტურნირი სტარტს 11 აგვისტოს აიღებს. ცინცინატში კი მონაწილეობას ქართველი ჩოგბურთელიც მიიღებს.

ATP-ის ტურის მორიგ მასტერსზე ნიკა მეთხუთმეტე ნომრადაა განთესილი და პირველ წრეში საკვალიფიკაციო ეტაპზე გამარჯვებულ ერთ-ერთ ჩოგბურთელს შეხვდება.

აღსანიშნავია, რომ ბასილაშვილს აშშ-ში საკმაოდ რთული ბადე შეხვდა. პირველი წრის დაძლევის შემთხვევაში, ქართველი ჩოგბურთელი ბულგარელ გრიგორ დიმიტროვსა და შვეიცარიელ სტენ ვავრინკას შორის გამარჯვებულს დაუპირისპირდება. მესამე წრეში გასვლის შემთხვევაში კი, დიდი ალბათობით მისი მეტოქე მსოფლიოს მესამე ჩოგანი, როჯერ ფედერერი იქნება.

ნიკოლოზ ბასილაშვილს გასულ სეზონში ცინცინატის მასტერზე მონაწილეობა არ მიუღია, შესაბამისად, ნებისმიერი ეტაპის დაძლევის შემთხვევაში, იგი სარეიტინგო ქულებს გამოიმუშავებს.

ცნობისთვის, ცინცინატის მასტერსი მიმდინარე სეზონში საკმაოდ წარმომადგენლობითია და თავი უძლიერესმა ჩოგბურთელებმა მოიყარეს. ტურნირში მონაწილეობას მოქმედი ჩემპიონი, მსოფლიოს პირველი ჩოგანი, ნოვაკ ჯოკოვიჩი, რაფაელ ნადალი, როჯერ ფედერერი, ენდი მარი და სხვები იღებენ.

შეგახსენებთ, რომ ნიკოლოზ ბასილაშვილი მონრეალის მასტერსზე მერვედფინალში გავიდა, სადაც ალექსანდრ ზვერევთან დაძაბულ ბრძოლაში დამარცხდა. თუმცა ამის მიუხედავად, ნიკამ 45 სარეიტინგო ქულა გამოიმუშავა და "ცოცხალ" რეიტინგში ამჟმად 2020 ქულით მეთექვსმეტე ადგილზეა.

#Flashscore