ფეხბურთი / პრემიერლიგა /
"მაგუაიერს შეუძლია ვან დეიკის მსგავსი ეფექტი მოახდინოს"
08/12/2019 11:36
142

მანჩესტერ იუნაიტედმა პრემიერ ლიგის პირველი ტურის მატჩში, "ოლდ ტრაფორდზე" ფრენკ ლამპარდის ლონოდნის ჩელსი, ანგარიშით 4-0 გაანადგურა

მატჩის საუკეთესო ფეხბურთელად ლესტერიდან 80 მილიონი ფუნტის სანაცვლოდ გადმოსული ჰარი მაგუაიერი დაასახელეს.

26 წლის მცველის თამაშმა განსაკუთრებით აღაფრთოვანა მანჩესტერ იუნაიტედის ლეგენდარული ფეხბურთელი გარი ნევილი, რომელიც ამჟამად SkySports-ის საფეხბურთო ექსპერტია. ნევილის თქმით, მაგუაიერს შეუძლია "წითელი ეშმაკებისთვის" ისეთივე ანგარიშგასაწევი ძალა იყოს, როგორიც ლივერპულისთვის ვირჯილ ვან დეიკია:

"მაგუაიერის თამაშში დამაჯერებლობა შეინიშნება. ის დაუმარცხებელია საჰაერო ორთაბრძოლებისას და როგორც დაცვის ლიდერს შეეფერება ისე თამაშობს.

ის არამხოლოდ თავის საქმეს აკეთებს კარგად, არამედ დანარჩენ ფეხბურთელებსა და მთლიანად გუნდზე ახდენს გავლენას და შეიძლება ითქვას, რომ ამ მხრივ ერთგვარი კატალიზატორია.

შეიძლება დღეს ძალიან ადრეა იმაზე საუბარი, რომ მაგუაიერი გუნდზე ვირჯილ ვან დეიკის მსგავს გავლენას მოახდენს, მაგრამ ამის პოტენციალი მას ნამდვილად აქვს.

არ დაგავიწყდეთ, რომ მისი გადაბირება მანჩესტერ სიტისაც სურდა, მაგრამ ამ სატრანსფერო ბრძოლაში გამარჯვებული მანჩესტერ იუნაიტედი დარჩა". - განაცხადა გარი ნევილმა.