სხვა / სხვა /
ვახტანგ ხურციძე - ქართველი "დრიფტის მეფე" Red Bull-ის საერთაშორისო ტურნირზე!
08/12/2019 17:55
12679

დრიფტინგს საფუძველი 70-იან წლებში იაპონიის სამთო გზებზე ჩაეყარა. 20 წლის შემდეგ, ავტომოყვარულების ახალმა გატაცებამ დიდ ბრიტანეთში, ავსტრალიაში, ახალ ზელანდიასა და ჩინეთშიც გადაინაცვლა. დაახლოებით 15 წელია, რაც დრიფტი სპორტის სახეობად ჩამოყალიბდა და Red Bull-ის მხარდაჭერით, საერთაშორისო შეჯიბრებები მსოფლიოს სხვადასხვა ქვეყნებში იმართება, პირველი მსოფლიო ჩემპიონატი კი, 2008 წელს ლიბანში ჩატარდა.

დროთა განმავლობაში, სპორტის ახალი სახეობა პოპულარული გახდა საქართველოშიც. ერთ-ერთი წარმატებული და გამორჩეული დრიფტერია ვახტანგ ხურციძე, რომელმაც ახლახანს საქართველოში ჩატარებული Red Bull Car Park Drift-ი მოიგო. შეჯიბრში მონაწილეობა მხოლოდ საქართველოს მოქალაქეებს შეეძლოთ და მონაწილეობა უფასო იყო. აღსანიშნავია, რომ ქართული ავტოსპორტის ისტორიაში, ეს იყო პირველი ტურნირი, რომელიც Red Bull-ის ორგანიზებით ჩატარდა.

“კროკობეთისა“ და “ლიქვი მოლის“ მხარდაჭერით, ხურციძემ დრიფტის ჩემპიონატზე BMW M3-ით იასპარეზა და საუკეთესო შედეგი აჩვენა. საქართველოს შესარჩევ ეტაპზე 35 დრიფტერი მონაწილეობდა, საიდანაც პირველ ეტაპზე 20 საუკეთესო გამოვლინდა. ოცეულში საუკეთესო შედეგი ხურციძემ აჩვენა.

Red Bull Car Park-ის მონაწილეებს აფასებდა კომპეტენტური ჟიური, რომლის შემადგენლობაშიც პროექტის წარმომადგენელი იუსიფ ბაზილი, Red Bull-ის უკრაინელი ათლეტი ალექსანდრ გრინჩუკი და ქართველი ავტომრბოლელები - დათა ქაჯაია და ოთარ თავართქილაძე შედიოდნენ.

ტურნირის დასკვნითი ეტაპი დაძაბული და სანახაობრივი გამოდგა. ვახტანგ ხურციძემ ჯამში 341 ქულა მოაგროვა,  პირველი ადგილი დაიკავა და “დრიფტის მეფე“ გახდა. აქვე აღვნიშნავთ, რომ ქულების მაქსიმალური რაოდენობა 400 იყო.

მეორე ადგილზე გავიდა ალექსანდრე ხეროდინაშვილი, ხოლო მესამე - ნოდარ კოდუა იყო.

1 სექტემბერს, თურქეთში საერთაშორისო შეჯიბრში 10 ქვეყნის საუკეთესო დრიფტერები ჩემპიონის ტიტულისთვის იბრძოლებენ. აღნიშნულ ტურნირზე საქართველოს წარმომადგენელი პირველად მიიღებს მონაწილეობას. საქართველოს გარდა, შეჯიბრში მონაწილე ქვეყნები არიან: ლიბანი, თურქეთი, იორდანია, ეგვიპტე, ქუვეითი, ომანი, მაროკო, მავრიტანია და არაბთა გაერთიანებული საამიროები. ჩემპიონატის ორგანიზატორებს უფლება აქვთ გამოიყენონ Wild Card-ი, რომელიც შესაძლოა გადაეცეს მოწვეულ დრიფტერს, როგორც უკვე მონაწილე, ისე არამონაწილე ქვეყნიდან.

როგორც აღვნიშნეთ, შეჯიბრზე მაქსიმალური ქულაა 400.

წარმოგიდგენთ შეფასების კრიტერიუმებს:

  1. ავტომობილის დიზაინი და ვიზუალი - 40/400
  2. დრიფტის უნარის გამოვლენა (ორჯერ) - 60/400
  3. Box-ში შესვლა (ორჯერ) - 25/400
  4. “სპირალში“ შესვლა - 20/400
  5. Gate – 20/400
  6. Flipper (ორჯერ) – 30/400
  7. Pendulum – 50/400
  8. ავტომობილის ხმა - 20/400
  9. საბურავის კვამლი - 20/400

ვახტანგ ხურციძის ასპარეზობა Red Bull Car Park Drift-ზე:

რეზი ყენიას ფოტოები

ლუკა ბაიდოშვილის ფოტოები

ტელეკომპანია "მაესტროს" სიუჟეტი Red Bull Car Park Drift-ის შესახებ: