ჩოგბურთი / ATP /
ენდი მარიმ პირველივე მატჩი წააგო
08/13/2019 1:11
250

მენჯ-ბარძაყის რთული ოპერაციის შემდეგ, ბრიტანელმა ჩოგბურთელმა, ენდი მარიმ ერთეულთა თანრიგში პირველად 12 აგვისტოს, ცინცინატის მასტერსზე იასპარეზა.

გადაწყვეტილება მარიმ მონრეალში ვარჯიშისას მიიღო და ცინცინატის ორგანიზატორებმაც იგი უაილდ ქარდით დააჯილდოეს.

პირველ წრეში ბრიტანელი ჩოგბურთელი ფრანგ რიშარ გასკეს დაუპირისპირდა და ორ სეტში, ანგარიშით 4:6; 4:6 დამარცხდა. მიუხედავად ერთეულთა თანრიგში მარცხისა, ენდი ცინცინატზე ასპარეზობას მაინც განაგრძობს. იგი წყვილთა თანრიგში ესპანელ ფელიციანო ლოპესთან ერთად ითამაშებს.

აღსანიშნავია, რომ მარი წყვილთა თანრიგში უკვე ორი თვეა ასპარეზობს. ივნისის თვეში კი მან ფელიციანო ლოპესთან ერთად პირველივე ტურნირი, Queens's Club-ი მოიგო. სავარაუდოა, რომ უიმბლდონის ორგზის ჩემპიონს ერთეულთა თანრიგში ამერიკის ღია პირველობაზეც ვიხილავთ.

შეგახსენებთ, რომ ცინცინატის მასტერსზე საქართველოს პირველი ჩოგანი, ნიკოლოზ ბასილაშვილიც იასპარეზებს. ნიკა პირველ წრეში საკვალიფიკაციო ეტაპის გამარჯვებულს, რუს ანდრეი რუბლიოვს დაუპირისპირდება.

 
#Flashscore