ფეხბურთი / მსოფლიო ფეხბურთი /
7 ინტრიგა - რას უნდა ველოდოთ ახალ სეზონში?
08/13/2019 15:58
4460

ახალი საფეხბურთო სეზონის წინ, გულშემატკივრებს დიდი მოლოდინები აქვთ. წარმოგიდგენთ 7 ყველაზე დამაინტრიგებელ და საინტერესო საკითხს, რაც ტოპ-ლიგების მომდევნო სეზონში საყურადღებო იქნება.

რით გაგვაკვირვებს აზარი-იოვიჩის ტანდემი?

ამ ზაფხულს, რეალს 5 ახალწვეული ჰყავს. მადრიდელებს ეს სიამოვნება დაახლოებით 300 მილიონი ევრო დაუჯდათ. ყველაზე დიდ ინტერესს ედენ აზარისა და ლუკა იოვიჩის გამოჩენა იწვევს. რეალის ქომაგები მათი ტანდემის ხილვას მოუთმენლად ელიან, მომდევნო სეზონის ერთ-ერთი მთავარი ინტრიგა კი ისაა, როგორ ტაქტიკას აირჩევს ზინედინ ზიდანი და რომელ ფეხბურთელს სად მიუჩენს ადგილს.

გახდება აზარი-იოვიჩის ტანდემი რონალდუ-ბენზემაზე ძლიერი? სავსებით შესაძლებელია, რადგან ბელგიელი და სერბი ერთმანეთს ჩინებულად ავსებენ და აბალანსებენ. რონალდუ-ბენზემას ტანდემისგან განსხვავებით, მოედანზე 1 გამოკვეთილი ლიდერი არ იქნება.

გასულ სეზონში, დუეტების ტრენდი ობამეიანგმა და ლაკაზეტმა გამოაცოცხლეს, წელს კი, აზარისა და იოვიჩის დროა!

რამდენად შორს წავა დორტმუნდი?

ეს კლუბი ისეთ სიტყვებთან ასოცირდება, როგორიცაა მეგობრობა, ოჯახი და ერთგულება. “სიგნალ იდუნა პარკის“ გულშემატკივრები მოუთმენლად ელიან დღეს, როცა ბუნდესლიგის ვერცხლის სინი დორტმუნდში დაბრუნდება.

ამ ზაფხულს, ბორუსიამ 4 კარგი ტრანსფერი გააკეთა. მარცხენა მცველი ტეო შულცი თავის ზონას შეავსებ და აშრაფ ჰაკიმის მარჯვენა ფლანგზე დაბრუნების საშუალებას მისცემს. მშობლიურ გუნდში დაბრუნდა ცენტრალური მცველი მატს ჰუმელსი, რომელიც თავისი საფირმო პირველი პასით გუნდს დიდ დახმარებას გაუწევს.

ნახევარდაცვის ხაზს იულიან ბრანდტი და ტორღან აზარი შეავსებენ, რომელთა წყალობითაც შეტევა უფრო კრეატიული გახდება. დორტმუნდმა ოთხივე ისეთი ფეხბურთელი იყიდა, რომლებიც თავიანთი ეროვნული ნაკრების წევრები არიან. რაც მთავარია, კლუბმა ოთხივე მოთამაშე სეზონის წინ დაიმატა და ლუსიენ ფავრი მათთან შეკრების პირველივე დღიდან მუშაობს.

დორტმუნდის ბანაკში სასიხარულო ამბავია ის, რომ გუნდში დარჩა ამომავალი ვარსკვლავი ჯეიდონ სანჩო. გარდა ამისა, ბორუსიაშია გუნდის კაპიტანი და თავისი თაობის ერთ-ერთი საუკეთესო ფეხბურთელი მარკო როისი, რომელსაც ბუნდესლიგა ჯერ არასდროს მოუგია.

დორტმუნდს ბრძოლისუნარიანი და დაბალანსებული შემადგენლობა ჰყავს. ვნახოთ, იზეიმებენ თუ არა გულშემატკივრები დორტმუნდის ჩემპიონობას შავ-ყვითელი შარფებით...

სარის ფეხბურთი = ჩემპიონთა ლიგას?

გასული სეზონის ბოლოს, ორმხრივი შეთანხმების საფუძველზე, იუვენტუსმა მასიმილიანო ალეგრისთან კონტრაქტი გაწყვიტა. ვარიანტებს შორის, ტურინელებმა ოპტიმალური შეარჩიეს. ლონდონის ჩელსიში მომუშავე მაურიციო სარის სამშობლოში დაბრუნება ძალიან უნდოდა და “ბიანკონერის“ წინადადებას უყოყმანოდ დათანხმდა.

ამიერიდან, იუვენტუსი თავისი სტილის ფეხბურთს ითამაშებს, ბურთს დაიჭერს და პრესინგს მიმართავს. ძნელი სათქმელია, ტურინელები პირველივე სეზონში მოიგებენ თუ არა ჩემპიონთა ლიგას, მაგრამ წელიწადის შემდეგ, ეს გუნდი ნამდვილად სერიოზული ძალა იქნება და უპირველესად სწორედ ლიგის თასისთვის იბრძოლებს.

იუვეს ხელმძღვანელებმა თავიანთი ოსტატობა ამჯერადაც გამოავლინეს და უფასოდ სამი მაღალი დონის ფეხბურთელი დაიმატეს: ჯანლუიჯი ბუფონი, აარონ რემზი და ადრიან რაბიო. ამის ფონზე, დე ლიხტის სანაცვლოდ აიაქსისთვის გადახდილი 75 მილიონი ევრო დიდი ხარჯი ნამდვილად არ ყოფილა. ტურინში საინტერესო პროექტი მზადდება და ინტრიგაც დიდია.

დიდი ექვსეული“ ინგლისში

პრემიერ ლიგის ტოპ 6 კლუბსა და დანარჩენებს შორის ბიუჯეტში სხვაობა დიდია, მაგრამ ნაკლებადშემოსავლიან კლუბებს ეს ხელს არ უშლით იმაში, რომ ლიდერებს პრობლემები შეუქმნან. გასულ სეზონში, ვულვზმა რამდენიმე გრანდთან ბრწყინვალედ ითამაშა, პელეგრინის ვესტ ჰემი კი, სატრანსფერო ბაზარზე აქტიურობდა და მომდევნო სეზონშიც ანგარიშგასაწევი ძალა იქნება.

ლიდერთა შორის შესვლასთან ყველას ახლოს ლესტერია. “მელიებს“ ბრწყინვალე თავკაცი ბრენდან როჯერსი ჰყავთ, რომელიც 2014 წელს ლივერპულთან ერთად ჩემპიონობასთან ახლოს იყო. მერსისაიდელებმა იმ სეზონში ბრწყინვალედ ითამაშეს და თავიანთთვის სარეკორდი 101 გოლი გაიტანეს. ამჟამად, როჯერსი კომბინაციური ფეხბურთის თამაშს ლესტერში ცდილობს.

წლეულს, ლესტერი არცერთ ევროტურნირზე არ ითამაშებს და მხოლოდ ქვეყნის მასშტაბით ჩატარებულ მატჩებზე იქნება ორიენტირებული. ბუნებრივია, ეს გუნდს დასვენებისა და კარგად მომზადების საშუალებას მისცემს. შეძლებს ლესტერი ექვსეულში შესვლას?

კონტეს ეფექტი“

კონტეს მთავარი უნარი ისაა, რომ შეუძლია, ცუდ მდგომარეობაში მყოფი გუნდი მალევე გამოაკეთოს. ანუ, უმოკლეს დროში უმკურნალოს. ბოლოს დროს, მილანის ინტერს წარმატებისთვის აღარ მიუღწევია და გასული სეზონის ბოლოს, გუნდში კონტეს უხმეს.

კონტე იტალიური მაფიასავითაა: იმპულსურია და გამარჯვებულის ფსიქოლოგია აქვს, არ აღიარებს ავტორიტეტებს (მაგ: დიეგო კოშტას, მაურო იკარდის და ა.შ).

ინტერში კონტეს მისვლას სერია ა-ში იუვენტუსის ჩემპიონობა საეჭვო გახადა და წლებია, ეს ასე არ ყოფილა. ტურინელებისთვის სარის ტაქტიკაზე მიჩვევას დრო დასჭირდება და შესაძლოა, პირველი სეზონი ექსპერიმენტული იყოს, რითაც ინტერმა უნდა ისარგებლოს. მილანელები რომელუ ლუკაკუთი გაძლიერდნენ და დროა, ჩემპიონობაზე იფიქრონ.

რით გაგვაოცებს ატლეტიკო?

გასული სეზონის დასრულების შემდეგ, ატლეტიკოს მისამართით მხოლოდ სამძიმრები მიდიოდა. გუნდი თავისუფალი აგენტის სტატუსით დატოვა ხუანფრანგმა, გოდინმა და ფილიპე ლუიშმა. მათთვის კარიერის მადრიდული ნაწილი დასრულებულია. პეპ გვარდიოლამ მანჩესტერ სიტიში როდრიგო წაიყვანა, ბარსელონაში ანტუან გრიზმანის გადაბარგებას კი, დიდი სკანდალი მოჰყვა. საქმე ისე მიდიოდა, რომ ატლეტიკოს დაღმასვლა იწყებოდა.

ატლეტიკო გლოვას მორჩა და გრანდიოზული სატრანსფერო კამპანია დაიწყო. დიეგო სიმეონეს გუნდში ერთაბაშად 8 ახალი ფეხბურთელი გამოჩნდა. კლუბმა ტოტენჰემისგან კირან ტრიპიე დაიმატა, პორტუსგან ექტორ ერერა, რეალისგან - მარკოს ლორენტე. გარდა ამისა, მადრიდელებმა ლონდონის ჩელსისგან ალვარო მორატას სატრანსფერო უფლებები გამოისყიდეს. 12 მილიონი ევროს სანაცვლოდ, ატლეტიკომ 21 წლის ბრაზილიელი მცველი რენან ლოდიც დაიმატა.

მთავარი ახალწვეული პორტუგალიელი სუპერტალანტი ჟოაუ ფელიშია. ატლეტიკომ ყველა კონკურენტს აჯობა და ლისაბონის ბენფიკას ყოფილი შემტევი “ვანდა მეტროპოლიტანოზე“ ჩაიყვანა.

ატლეტიკომ სეზონისწინა შეკრებაზე კარგი შთაბეჭდილება დატოვა და გულშემატკივრები დააიმედა. ინტრიგა დიდია: რით გაგვაოცებს ატლეტიკო?

ვის გაუშვებენ პირველს?

დაუწერელი კანონია: ყოველი სეზონის წინ, პრესაში არის მწვრთნელი, ვისაც კლუბში დიდი მომავალი სეზონის სტარტზევე არ უწერია. მაგალითისთვის, გასულ სეზონში ასეთი ჟოზე მოურინიო იყო, რომელმაც მანჩესტერი იუნაიტედი სეზონის დაწყებიდან რამდენიმე თვეში დატოვა.

წელს, ყველაზე მეტად ეს საფრთხე ბაიერნის თავკაც ნიკო კოვაჩს ემუქრება. მან გერმანიის სუპერთასის ფინალი უკვე წააგო და მომავალიც ბურუსით მოცულია. კოვაჩმა ტრანსფერებისთვის დაპირებული 250 მილიონი ვერ მიიღო და ლეროი სანეს საკითხიც ჯერ არ გადაწყვეტილა. დიდი ალბათობით, თუ ბაიერნი სეზონის წარმატებულად ვერ დაიწყებს, ყველაფერი მაინც მწვრთნელს დაბრალდება და ჯოხიც კოვაჩზე გადატყდება.

მეორე ვარიანტად ლონდონის ჩელსიში დაბრუნებული ფრენკ ლამპარდი მოჩანს. დიდი ავტორიტეტის მიუხედავად, მას ჯერ არ დაუმტკიცებია, რა შეუძლია სამწვრთნელო ასპარეზზე. მისმა გუნდმა ინგლისის პრემიერ ლიგის ახალი სეზონი კატასტროფულად დაიწყო. ჩელსი პრინციპულ მეტოქესთან - მანჩესტერ იუნაიტედთან განადგურდა. ჩელსიმ “ოლდ ტრაფორდზე“ 4 უპასუხო გოლი გაუშვა, რაც ლამპარდისთვის დიდი დარტყმა იყო.

#Flashscore