ფეხბურთი / ევროპის ლიგა /
დინამო მოსაგებად იბრძოლებს - ფელის ვისენტემ პრესკონფერენციაზე ისაუბრა
08/14/2019 23:16
141

დინამო თბილისი ხვალ, 15 აგვისტოს დინამო არენაზე უეფას ევროპა ლიგის მესამე საკვალიფიკაციო ეტაპის განმეორებით შეხვედრას ფეინოორდის წინააღმდეგ გამართავს.

მატჩის წინ, თბილისელთა მთავარმა მწვრთნელმა, ფელის ვისენტემ პრესკონფერენციაზე ჟურნალისტების კითხვებს უპასუხა.

"მიუხედავად იწინა მატჩის შედეგისა, განმეორებით შეხვედრას დიდ მნიშვნელობას ვანიჭებთ. ჩვენ ბოლომდე ვიბრძოლებთ და შესაძლებელია, რომ შედეგიც შემოვატრიალოთ.

მნიშვნელოვანია აღვნიშნოთ, რომ პირველ მატჩში დინამომ საკმაოდ კარგად ითამაშა, თუმცა შემდეგ სამ წუთში მოხდა ისეთი რამ, რაც სეზონში, შესაძლოა, მხოლოდ ერთხელ მოხდეს, ან არც კი. ხვალ შევეცდებით, უფრო მეტად შევუტიოთ.

როგორც უკვე აღვნიშნე, მართალია, 0:1-ს ვაგებდით, მაგრამ ოთხმოცი წუთის განმავლობაში თამაში არც ისე ცუდად მიმდინარეობდა, თანაც იმის გათვალისწინებით, რომ განმეორებითი მატჩი აქ უნდა გამართულიყო... ვფიქრობ, ჯერ კიდევ შესაძლებელია მდგომარეობის გამოსწორება. ჩემის აზრით, ყველა იმ ფეხბურთელმა, რომელმაც ითამაშა, ყველამ თავისი მაქსიმუმი გააკეთა და არ მგონია, რომ არასწორი გადაწყვეტილება მივიღეთ. ხვალაც ითამაშებენ ის ფეხბურთელები, რომლებიც საუკეთესო ფორმაში არიან და შევეცდებით, მაქსიმალური შედეგი ვაჩვენოთ.

ძალიან სამწუხაროა, რომ გულშემატკივრების გარეშე მოგვიწევს თამაში. ვიცით, რომ მათთვის ხვალინდელი თამაში ერთ-ერთი ყველაზე მნიშვნელოვანია. გვინდოდა, რომ ჩვენთან ერთად ყოფილიყვნენ და ბოლომდე დაეჭირათ ჩვენთვის მხარი, თუმცა ჩვენ ყველანაირად ვეცდებით, ისინი გავახაროთ", - განაცხადა ფელის ვისენტემ.

"რასაკვირველია, პირველი მატჩის შემდეგ მდგომარეობა რთულია, თუმცა ვფიქრობ, ამ თამაშის მოგება მაინც შესაძლებელია. არავინ იცის, შესაძლოა, პირველი ტაიმის შემდეგ, შემდეგ ეტაპზე გასვლაზეც ვფიქრობდეთ.

ისევე როგორც დაცვის ხაზი, ნახევარდაცვა და თავდასხმა, მზად არის. თერთმეტი კაცი თერთმეტის წინააღმდეგ ვთამაშობთ და როგორც მათ შეძლეს, ასევე ჩვენც შევეცდებით, იგივენაირი შედეგი დავაფიქსიროთ", - განაცხადა დინამოს ცენტრალურმა მცველმა, ვიქტორ მონხილმა.

შეგახსენებთ, რომ დინამო თბილისი როტერდამში 0:4 წაგების შემდეგ, ფეინოორდს შინ, დინამო არენაზე 20:00 საათზე უმასპინძლებს.