ფეხბურთი / მსოფლიო ფეხბურთი /
საფეხბურთო დინასტიები: ფეხბურთელები ერთი ოჯახის სამი თაობიდან!
08/26/2019 14:42
3281

ხშირია შემთხვევები, როცა ფეხბურთელებს ოჯახებში ამავე პროფესიის წინაპარი ჰყავთ, მაგრამ სპორტის ამ სახეობაში ერთი ოჯახის სამი თაობის წარმომადგენელს ეცადოს ბედი, იშვიათია. თქვენს ყურადღებას ყველაზე ცნობილ გვარებზე გავამახვილებთ.

მალდინები

ჩეზარე მალდინი ამ დინასტიის პირველი წარმომადგენელი იყო. ის მილანში 12 წლის ასაკში გამოჩნდა და მცველის პოზიციაზე თამაშობდა. ჩეზარემ გუნდთან ერთად სკუდეტო 4-ჯერ მოიგო.

მისი შვილი - პაოლო, კიდევ უფრო უკეთესი იყო. ის მსოფლიო ფეხბურთის ისტორიაში ერთ-ერთი საუკეთესო უკანახაზელი და კაპიტანია. პაოლომ “როსონერიში“ დაახლოებით ორი ათწლეული ითამაშა და ტიტულებსაც მრავლად დაეუფლა.

პაოლოს შვილმა კრისტიანმა გაცემული ავანსი ვერ გაამართლა, მაგრამ მისი ძმა დანიელი ჯერჯერობით საკმაოდ იმედისმომცემი ფეხბურთელია. არცთუ დიდი ხნის წინ, მას მილანის მთავარ გუნდში ჰქონდა დებიუტი.

მარკოს ალონსოები

ალონსოებს არა მხოლოდ საერთო პროფესია, არამედ საერთო სახელიც ჰქონდათ. მარკოს ალონსო იმასი (ყველაზე უფროსი) სხვადასხვა კლუბებში თამაშობდა და ყველაზე დიდი დრო - 8 წელი მადრიდის რეალში გაატარა. მან მადრიდულ გრანდთან ერთად ქვეყნის ჩემპიონატი 5-ჯერ მოიგო და ევროთასსაც ამდენჯერ დაეუფლა.

მისი შვილი - მარკოს ალონსო პენია გარემარბი იყო. მან რეალის კონკურენტი გუნდები - ატლეტიკო და ბარსელონა აირჩია. შუათანა ალონსომ ქვეყნის ჩემპიონატი და ესპანეთის თასი თითოჯერ მოიგო.

ყველაზე პატარა ალონსო ლონდონის ჩელსიში თამაშობს. ის ინგლისის ჩემპიონი გახდა და ევროპა ლიგის თასიც მოიგო.

ფორლანები

ფორლანების საფეხბურთო ოჯახის პირველი წარმომადგენელი ხუან კარლოს კორასო იყო. მან ახალგაზრდული კარიერა მონტევიდეო უონდერერსში დაიწყო, შემდეგ კი, რასინგსა და ინდეპენდიენტეში ითამაშა. მან ვერცერთი ტიტული მოიგო.

მისი შვილი - პაბლო ფორლანი მცველი იყო და ურუგვაის ჩემპიონი 7-ჯერ გახდა. გარდა ამისა, მან ერთხელ ლიბერტადორესის თასიც მოიგო.

ოჯახის ყველაზე ცნობილი წარმომადგენელი დიეგო ფორლანია, რომელსაც ურუგვაის ისტორიაში ერთ-ერთი საუკეთესო ფორვარდი თამამად შეგვიძლია ვუწოდოთ. მან სახელი მანჩესტერ იუნაიტედში, ვილიარეალსა და ატლეტიკოში თამაშით გაითქვა. დიეგო ფორლანი მსოფლიოს 2010 წლის ჩემპიონატის საუკეთესო ფეხბურთელად დასახელდა.

გუდიონსენები

არნორ გუდიონსენი ნათესავებს შორის პირველი ფეხბურთელი იყო. მან კარიერა ვიკინგურში დაიწყო, შემდეგ ლოკერენსა და ანდერლეხტშიც ითამაშა. ის ისლანდიის ეროვნული ნაკრების წევრი იყო. არნორი თავდამსხმელი გახლდათ.

მის შვილს - ეიდურ გუდიონსენს ყველა კარგად იცნობს. ის ჩელსიში, ბარსელონასა და ტოტენჰემში თამაშობდა. მოიგო პრემიერ ლიგა, ლა ლიგა და ჩემპიონთა ლიგა.

მისი ორი მცირეწლოვანი ვაჟი მადრიდის რეალის აკადემიაში ვარჯიშობს, უფროსი - სვეინი კი, სპეციას ღირსებას იცავს.

ერნანდესები

გვადალახარაში გატარებულ 10 წელიწადში, ტომას ბალკასარმა მექსიკის ჩემპიონატი 8-ჯერ მოიგო და კლუბის ლეგენდა გახდა.

მისი შვილი ხავიერ ერნანდეს გუტიერესი, მეტსახელად “ჩიჩარიტო“, ნახევარმცველი იყო და ესტუდიანტეს ტეკოსში, პუებლასა და მონარკას მორელიაში ასპარეზობდა.

ჩვენთვის ყველაზე კარგად ნაცნობი მისი შვილი ხავიერ ერნანდეს ბალკასარი, ასევე “ჩიჩარიტოა“. 31 წლის თავდამსხმელმა უკვე ითამაშა მანჩესტერ იუნაიტედის, მადრიდის რეალისა და ლევერკუზენის ბაიერის მაისურით. სადღეისოდ, ის ვესტ ჰემის ფეხბურთელია.

ლაუდრუპები

ოჯახში პირველი ლაუდრუპი ფეხბურთელი დიდად წარმატებული არ ყოფილა. მან ვინერ შპორტ-კლუბში, ბრიონსჰეისა და კოპენჰაგენში ითამაშა. მისი კარიერა უტიტულოდ დასრულდა.

მისმა შვილმა მიქაელ ლაუდრუპმა ფეხბურთის ისტორიაში თავისი კვალი დატოვა. კარიეირს განმავლობაში, მან იუვენტუსში, რეალსა და ბარსელონაში ითამაშა. მან ქვეყნის ჩემპიონატები რამდენჯერმე მოიგო (5-ჯერ ესპანეთის).

მისმა ძმამ - ბრაიანმა ბაიერნსა და მილანში ითამაშა. ის იტალიის ჩემპიონი და ჩემპიონთა ლიგის გამარჯვებული გახდა.

მიქაელის შვილებმა - მადსმა და ანდრეასმა ფეხბურთში ბედი სცადეს, მაგრამ წარმატებას ვერ მიაღწიეს. ანდრეასმა კარიერა ჯანმრთელობის პრობლემების გამო ნაადრევად დაასრულა. ფეხბურთი ბრაიანის შვილმა ნიკოლაიმაც ითამაშა, მაგრამ განსაკუთრებული შედეგი არც მას ჰქონია. სადღეისოდ, ნიკოლაი და მადსი ერთ-ერთი სამოყვარულო გუნდის ღირსებას იცავენ.

კუმანები

მარტინი კუმანებს შორის პირველი ფეხბურთელია. ამპლუით მცველმა სხვადასხვა დროს ბლაუ ვიტის, გრონინგენისა და ჰერენვენის უკანა ხაზები გაამაგრა. მან ჰოლანდიის ეროვნულ ნაკრებში ერთადერთხელ ითამაშა.

მარტინს საფეხბურთო სამყაროში უფრო იმით იცნობენ, რომ რონალდისა და ერვინის მამაა. რონალდ კუმანი აიაქსის, პსვ-სა და ბარსელონას ლეგენდა გახდა. რონალდმა ოთხ-ოთხჯერ მოიგო ესპანეთისა და ჰოლანდიის ჩემიონატები. ასევე, დაეუფლა ჩემპიონთა ლიგის თასს.

რონალდ კუმან-უმცროსი ჯერ ძალიან დაბალ დონეზე თამაშობს. ის ჰოლანდიის მეორე დივიზიონის კლუბის - ტოპ ოსის კარს იცავს.

კლუივერტები

ფეხბურთელ კლუივერტებს შორის კენეტი პირველი იყო. ის სურინამულ რობინ ჰუდსა და რეალ სრანანში თამაშობდა.

მისი ვაჟი - პატრიკი, ოჯახის მთავარი ვარსკვლავია. მას აიაქსში, მილანსა და ბარსელონაში უთამაშია. პატრიკმა ჰოლანდიის ჩემპიონატი 3-ჯერ, ესპანეთის კი, ერთხელ მოიგო. შუათანა კლუივერტი ჩემპიონთა ლიგის ტრიუმფატორიცაა.

პატრიკის 20 წლის ვაჟი ჯასტინი დიდ ფეხბურთში პირველ ნაბიჯებს დგამს. ჯასტინ კლუივერტმა აიაქსში ასპარეზობით რომას ყურადღება მიიქცია და გასული სეზონიდან, ის სწორედ იტალიის დედაქალაქში თამაშობს.

#Flashscore