სხვა / ძიუდო /
"ვეცდები, ოლიმპიადაზეც იგივე გავიმეორო" - ლუხუმ ჩხვიმიანის ექსკლუზიური ინტერვიუ
08/26/2019 19:09
6785

გუშინ, 25 აგვისტოს, ძიუდოს მსოფლიო ჩემპიონატის პირველი დღე საქართველოსთვის ფანტასტიკურად დაიწყო.

-60კგ წონით კატეგორიაში, ლუხუმ ჩხვიმიანმა შესანიშნავად იჭიდავა და მსოფლიო პირველობაც ტრიუმფით დაასრულა.

ძიუდოს სამშობლოში, ქართველი სპორტსმენი კვარცხლბეკის უმაღლეს საფეხურზე ავიდა და 2009 წლის შემდეგ, გახდა პირველი ევროპელი, რომელმაც -60კგ წონით კატეგორიაში ოქროს მედლის მოპოვება შეძლო.

Croco.ge მსოფლიოსა და ევროპის ჩემპიონ ლუხუმ ჩხვიმიას იაპონიაში დაუკავშირდა. გთავაზობთ ექსკლუზიურ ინტერვიუს ქართველ ძიუდოისტთან:

-ლუხუმ, ძიუდოს სამშობლოში, მსოფლიოს ერთ-ერთ ყველაზე პრესტიჟულ ტურნირზე ოქროს მედალი მოიპოვეთ და კვარცხლბეკის უმაღლეს საფეხურზე ახვედით. როგორი იყო თქვენი ემოცია ამ დიდი წარმატების შემდეგ?

- პირველ რიგში, მინდა ყველას მადლობა გადავუხადო. რაც შეეხება ემოციას, ძიუდოს სამშობლოში, მსოფლიო ჩემპიონატზე, ნებისმიერი სინჯის მედლის მოპოვება ერთ-ერთი ყველაზე დიდი მისია და ოცნება იყო. ჩემს სამეგობროში ვამბობდი, რომ თუ ნებისმიერი სინჯის მედალს ავიღებდი, ვიტყოდი ოდესღაც ძიუდოში, ჩემს წონით კატეგორიაში, რაღაც გამიკეთებია. მიხარია, რომ ჩემპიონი გავხდი და მეამაყება, რომ ჩემს პატარა და ამავდროულად დიდ საქართველოს სიხარული მოვუტანე. ვეცდები, 2020 წლის ზაფხულის ოლიმპიადაზე იგივე შედეგი გავიმეორო. ამისთვის ყველაფერს გავაკეთებ და იმაზე მეტს ვიშრომებ, ვიდრე მსოფლიო ჩემპიონატისთვის, დანარჩენს ალბათ ღმერთი გადაწყვეტს.

-კარიერაში საუკეთესო სეზონს ატარებთ. მსოფლიომდე მინსკში, ევროპის ჩემპიონი გახდით. როგორ ემზადებოდით, მოგვიყევით თქვენი მზადების პროცესის შესახებ.

-ეს არის ცხოვრების ერთ-ერთი ეტაპი, სადაც ადამიანი ხვდები, რომ ყველაფერი მეორე ფლანგზე უნდა გადადო და დასახული მიზანი რაც გაქვს, შეასრულო. თუ რამე გაქვს, ყველაფერი მიზნის მიღწევაში ჩადო... გინდა გაახარო შენთვის ახლობელი ადამიანები, გულშემატკივრები, ეს კი იმხელა მოტივაციას, სურვილს, ძალას გაძლევს, რომ იმასაც გააკეთებ, რასაც მარტო ვერ გააკეთებდი და არ შეგეძლო.

-ალბათ, ორმაგად სასიამოვნო და სასიხარულოა, როცა ძიუდოს სამშობლოში მასპინძელ იაპონელს ამარცხებ... 

-როდესაც ტოკიოში, ძიუდოს სამშობლოში გამოკვეთილ ლიდერს უგებ, რა თქმა უნდა, სასიხარულოა. იმისთვის უფრო რთული იყო ჩემთან შეხვედრა, ვიდრე ჩემთვის მასთან. აქამდე, მას ჩემთან ორჯერ ჰქონდა მოგებული და ეს მატჩრევანში იყო. მსოფლიო ჩემპიონატის წინ ჩემს თავს ყოველი მომზადებისას ვეუბნებოდი, რომ ეს ტურნირი რევანშების დღე უნდა ყოფილიყო და გამომივიდა კიდეც, ჩემი შრომის და ღვთის წყალობით.

-მთლიანად გუნდისთვის მსოფლიო ჩემპიონატის მოგებით დაწყება, ალბათ, ერთგვარი მოტივაცია იქნებოდა. ჩვენ ვიხილეთ კადრები, სადაც თქვენ და ვარლამ ლიპარტელიანი ფინალური შეხვედრის შემდეგ ერთმანეთს შეხვდით. მოგვიყევით, როგორი განწყობაა საქართველოს ნაკრებში? 

-ყოველთვის პირველ დღეს მიწევს ჭიდაობა, ამიტომ, არ ვიცი როგორია. რა თქმა უნდა, ჩვენთვის პირველი დღე წარმატებული გამოდგა და გუნდზეც პოზიტიურად აისახა. რაც შეეხება "ლიპოს", ის ყველანაირად შემართული დ მომზადებულია იმისთვის, რომ ჩვენი ქვეყანა, ჩვენი კუთხე გაახაროს. თუმცა იმასაც ვიტყვი, რომ ეს ძიუდოა და მხოლოდ მომზადება არაფერს ნიშნავს, ცოტა იღბალიც საჭიროა. აქ დაუმარცხებელი არავინაა. ერთი მოდუნება და ყველაფერი დაკარგულია. დარწმუნებული ვარ, ვარლამ ლიპარტელიანიც და ჩვენი გუნდის თითოეული წევრიც ყველაფერს გააკეთებენ იმისთვის, რომ საქართველოს წარმატება მოუტანოს.

-მიმართვა გულშემატკივრებს.

-თითოეულ გულშემატკივარს, ვინც გვერდში მედგა, ექიმებს, მწვრთნელებს მინდა დიდ მადლობა გადავუხადო. მიუხედავად იმისა, რომ ცოტა ტრავმები მაწუხებდა, ტკივილი არ მიგრძვნია. მადლობა მინდა გადავუხადო მათ... და ვეტყვი გულშემატკივრებს, რომ შევეცდები, 2020 წლის ოლიმპიადაზე იგივე შედეგი გავამეორო.

#Flashscore