ფეხბურთი / სერია ა /
დაღმასვლა და აღმასვლა აპენინებზე...
08/29/2019 15:48
765

რამდენიმე წლის წინ, “პარმა” უსახსროდ დარჩა და ზაფხულამდე სული დიდი გაჭირვებით მიიტანა. იტალიური ფეხბურთის მმართველებმა 90-იანი წლების ერთ-ერთი ყველაზე სიმპათიური კლუბი სერია D-ში გაისტუმრეს, მაგრამ დღეს ეს გუნდი ისევ ელიტის წევრია. იტალიურ ფეხბურთს გაკოტრებული და შემდეგ “დაბრუნებული” კლუბები ახსოვს. ჩვენ რამდენიმე შემთხვევის შესახებ მოგითხრობთ.

“ფიორენტინა”

იყო დრო, როცა “ფიორენტინას” ცნობილი იტალიელი პროდიუსერი მარიო ჩეკი გორი და მისი ვაჟი ვიტორიო ფლობდნენ. კინოოჯახის მმართელობის დროს, “არტემიო ფრანკიზე” არაერთი ვარსკვლავი გამოჩნდა, არგენტინელი გაბრიელ ბატისტუტა კი, კლუბის ლეგენდა გახდა. გარკვეულ პერიოდში, “იები” სატურნირო ცხრილის ზედა ნაწილშიც იყვნენ, მაგრამ მათი აღმავლობის ხანა დიდ ხანს არ გაგრძელებულა. 2001/02 სეზონის მიწურულს, ტოსკანელთა ვალმა 50 მილიონ ევროს მიაღწია. კლუბმა ფეხბურთელებისთვის ხელფასის მიცემა შეწყვიტა. იმისათვის, რათა “ფიორენტინას” ხალხის სიყვარული არ დაეკარგა, კლუბი გულშემატკივრებისთვის სხვადასხვა სახის აქციებს აწყობდა. შეიძლება ითქვას, რომ ამგვარი ტაქტიკა გარკვეულწილად ამართლებდა კიდეც.

2002 წლის ივნისში, “ფიორენტინა” გაკოტრებულად გამოცხადდა. ასეთ დროს, იტალიაში ახალი კლუბის შენებას იწყებდნენ და ამჯერადაც ასე მოხდა. ახალ კლუბს სახელად “ფიორენტინა ვიოლა” დაერქვა. ტოსკანელები სერია ა-ში იმაზე გაცილებით ადრე გადავიდნენ, ვიდრე ელოდნენ. იტალიის ფეხბურთის ფედერაციის ინიციატივით, “ფიორენტინა” C1 და C2 ლიგებს “გადაახტა”. ამგვარად, “იებმა” თავი პირდაპირ იტალიის სერია ბ-ში ამოჰყვეს და 2004 წელს, უმაღლეს ლიგაშიც დაბრუნდნენ. იტალიის ფეხბურთის ფედერაციის განცხადებით, ეს გადაწყვეტილება “ფიორენტინას” სპორტული დამსახურებების გამო იქნა მიღებული. ამ ფაქტმა იტალიაში ბევრი კითხვა გააჩინა და დიდი მითქმა-მოთქმაც გამოიწვია. ასე იყო თუ ისე, ფლორენციელები სერია ა-ში დაბრუნდნენ, ახალი პრეზიდენტი კი, დიეგო დელა ვალე გახდა.

“ნაპოლი”

დიეგო მარადონას პერიოდის ბრწყინვალე “ნაპოლი” ყველას კარგად ახსოვს. მოგვიანებით, ნეაპოლში ბნელი პერიოდი დაიწყო და კლუბი სერია ბ-ში დამკვიდრდა. კლუბმა ასეთ ყოფას დიდ ხანს ვერ გაუძლო და მისი ფინანსური მდგომარეობაც უფრო და უფრო გაუარესდა. განსაკუთრებული პრობლემები 2004 წლის ზაფხულში დაიწყო. ნეაპოლელებმა თავი აგვისტომდე გაიტანეს, მაგრამ შემდეგ თავი გაკოტრებულად გამოაცხადეს. ამგვარად, კლუბმა არსებობა შეწყვიტა.

ადამიანი, რომელმაც ნეაპოლს დიდი ფეხბურთი შეუნარჩუნა, აურელიო დე ლაურენტისია. კინოპროდიუსერმა, რომელსაც 70-ზე მეტი ფილმი გადაუღია, უმოკლეს დროში შექმნა ახალი კლუბი და “ნაპოლი სოკერი” უწოდა. დე ლაურენტისმა თავისი კლუბი სერია ჩ1-ში დაარეგისტრირა. 2006 წელს, “ნაპოლიმ” ემბლემა და ძველი სახელწოდება დაიბრუნა, წელიწადის შემდეგ კი, სერია ა-შიც გადავიდა. დე ლაურენტისი “ნაპოლიში” მუშაობას ყოველთვის განსაკუთრებულად ეკიდებოდა. მისი წყალობით, ნეაპოლში ძლიერი ფეხბურთელები გამოჩნდნენ, რომლებმაც იტალიაშიც შესანიშნავად ითამაშეს და თავი ევროასპარეზზეც დაგვამახსოვრეს.

“ლეჩე”

იტალიის ერთ-ერთმა ყველაზე შემტევმა კლუბმა ასპარეზობა 2012 წელს შეწყვიტა. “ლეჩე” სერია ა-დან გავარდა და მისი საქმე უკან-უკან წავიდა. არადა, დიდი შანსი იყო, 2011/12 წლების სეზონში "ლეჩეს" უმაღლეს დივიზიონში ადგილი შეენარჩუნებინა კიდეც. სერსე კოზმის თავკაცობით, “ლეჩემ” სეზონის მეორე ნახევარი საკმაოდ შედეგიანად ჩაატარა, მაგრამ დაქვეითებას მაინც ვერ გადაურჩა. იტალიის პროკურატურამ "ლეჩეს" ფინანსური მაქინაციები გამოუჩხრიკა და ადგილი სერია C1-ში მიუჩინა.

“ლეჩეს” ძველ თაობაში ყველაზე უკეთ თავდამსხმელები – ხავიერ ჩევანტონი და ფაბრიციო მიკოლი გემახსოვრებათ. საგულისხმოა, რომ მიკოლის ბავშვობიდანვე “ლეჩეში” თამაში სდომებია. დიდი გაჭირვების შემდეგ, “ლეჩე“ სერია ა-ში დაბრუნდა.

“ასკოლი”

2006/07 წლების სეზონის შემდეგ, “ასკოლი” იტალიის სერია ა-ს დაემშვიდობა და დიდი პრობლემებიც აქედან დაიწყო. მას შემდეგ, ამ კლუბს იტალიის ყველაზე პრესტიჟულ დივიზიონში არასოდეს უთამაშია. 2011 წელს, იტალიის პოლიციამ “ასკოლის” პრეზიდენტი დაიჭირა, აქედან 2 წლის შემდეგ კი, “ასკოლი” ოფიციალურად გაკოტრდა. იმ მომენტისთვის, “ასკოლის” მთელი ქონება მხოლოდ 862 ათას ევროს შეადგენდა.

2013/14 წლების სეზონში, “ასკოლის” ბაზაზე ახალი კლუბი შეიქმნა, რომელსაც “ასკოლი პიკიო” დაერქვა. სადღეისოდ, ასკოლი სერია ბ-შია.

“პარმა”

90-იან წლებში, “პარმას” იტალიაში ერთ-ერთი ყველაზე ძლიერი კლუბი ჰყავდა. ჯანლუიჯი ბუფონმა, ფაბიო კანავარომ, ერნან კრესპომ, ხუან სებასტიან ვერონმა და სხვებმა გულშემატკივრებს არაერთი დაუვიწყარი მატჩი აჩუქეს. “პარმამ” 2002 წლამდე ღირსეულად ითამაშა, შემდეგ კი, პრობლემები დაიწყო.

“პარმას” პრეზიდენტის პოსტზე კალისტო ტანცი ტომაზო გირარდიმ შეცვალა. რობერტო დონადონისა და ანტონიო კასანოს წყალობით, კლუბმა იმიჯი აღიდგინა და გარკვეული პერიოდის განმავლობაში, მაღალ დონეზეც თამაშობდა. გასულ ზაფხულს გირარდიმ “პარმა” მიატოვა, მას შემდეგ კი, კლუბმა 4 მფლობელი გამოიცვალა. გულშემატკივრებს გარანტიები ვერავინ მისცა. “პარმა” ახლო წარსულშიც გაკოტრდა და სერია D-ში გადავიდა, მაგრამ სადღეისოდ ისევ სერია ა-ს გუნდია.