ფეხბურთი / ქართული ფეხბურთი /
ეროვნული ლიგა - ლოკომოტივის წარუმატებელი სერია გრძელდება
08/30/2019 22:26
70

დინამო თბილისის და გორის დილას მატჩით დაწყებული ეროვნული ლიგის 26-ე ტური დღეს მიხეილ მესხზე გაგრძელდა, სადაც ლოკომოტივი და ბოლნისის სიონი დაუზავდნენ ერთმანეთს - 1:1. 

პირველი ნახევარი მასპინძელთა კარნახით წარიმართა, თუმცა ტაიმი უგოლოდ დასრულდა. მეორე ტაიმში ლოკოს იერიშები უფრო მწვავე გახდა და მასპინძლებს არაერთხელ შეეძლოთ დაწინაურება, თუმცა 79-ე წუთზე ანგარიშის გახსნა ბოლნისელებმა მოახერხეს. არჩილ ტვილდიანის პასით სიონი გიორგი ივანიშვილმა დააწინაურა, რის შემდეგაც ლოკომოტივი შტურმზე გადავიდა და გათანაბრება მალევე შეძლო. 86-ე წუთზე საჯარიმოს სიახლოვეს დანიშნული სტანდარტი თეიმურაზ შონიამ გოლით დაასრულა და საბოლოო ანგარიშიც დააფიქსირა. ამრიგად, ლოკომოტივმა ზედიზედ მესამე შეხვედრაში ვერ შეძლო გამარჯვების მოპოვება, სიონმა კი უკანასკნელ სამ ტურში პირველი ქულა მოიპოვა.

ხვალ, 31 აგვისტოს, 26-ე ტურის ორი შეხვედრა გაიმართება. ქუთაისის ტორპედო წყალტუბოში ვიტ ჯორჯიას მიიღებს, ხოლო რუსთავს ბათუმის დინამო ესტუმრება. ტური ზეგ, 1 სექტემბერს, საბურთალოსა და ჩიხურას მატჩით დასრულდება. 

ფოტო: ლოკომოტივის პრესსამსახური