მაღლივ კორპუსთან კალათბურთის არენის მშენებლობა შეუფერხებლად მიმდინარეობს
საქართველოს 10500 გულშემატკივარზე გათვლილი არენა ექნება

საქართველოს კალათბურთის ფედერაციის ოფიციალურმა გვერდმა, 2022 წელს გასამართი ევრობასკეტისთვის (2021-ში უნდა გამართულიყო, თუმცა პანდემიის გამო გადავადდა) მშენებარე არენის ვიდეო მაკეტი წარმოადგინა.

აღსანიშნავია, რომ არენა 10500 გულშემატკივარზეა (დავდაპირველად 15000 უნდა ყოფილიყო) გათვლილი, რაც ფიბას სტანდარდებს სრულიად აკმაყოფილებს.

მშენებარე კომპლექსს საქართველოს განათლების, მეცნიერების, კულტურისა და სპორტის მინისტრის მოადგილე შალვა გოგოლაძე ესტუმრა, რომელმაც ამასთან დაკავშირებით კომენტარიც გააკეთა:

"მთავრობამ დააანონსა, რომ 2021 წლის სექტემბრისთვის საქართველოს უნდა ჰქონოდა ულტრათანამედროვე საკალათბურთო არენა, რომელიც ევროპის საკალათბურთო ჩემპიონატს ღირსეულად უმასპინძლებდა. კორონავირუსის კრიზისის პერიოდში მიღებულ იქნა გადაწყვეტილება, მშენებლობა ერთი საათითაც არ შეჩერებულიყო. მინდა ამ გადაწყვეტილებისთვის მადლობა ვუთხრა პრემიერმინისტრ გიორგი გახარიას.

რამდენიმე დღის წინ მშენებარე არენას კალათბურთის ფედერაციის პრეზიდენტ პაატა გურასპაულთან ერთად ვეწვიე და მახარებს, რომ ძირითადი, რთული სამუშაოები უკვე შესრულებულია. დიდი მოცულობის მიწა მოიხსნა, საძირკველი ჩაყრილია და ახლა სვეტების ამოყვანის პროცესში ვართ. დარბაზი 2021 წლის ივლისისთვის უნდა დასრულდეს. იმ ტემპით, რა ტემპითაც მუშაობა მიმდინარეობს, გვაქვს იმის თქმის საფუძველი, რომ კომპანია ვადებში სრულად ჩაეტევა.

მოგეხსენებათ, ევროპის 2021 წლის ჩემპიონატი კორონავირუსის პანდემიის გამო 2022 წლის სექტემბრისთვის გადაიდო. ეს საშუალებას მოგვცემს მშვიდად, კარგად გატესტილი დარბაზით შევხვდეთ ევრობასკეტს.

მახარებს, რომ ძალიან მალე საქართველოს ექნება ევროპული სტანდარტების 10 ათასკაციანი ლამაზი სპორტის სასახლე, რომელიც ერთიანი კომპლექსის ნაწილი იქნება. ახალი არენა გვირაბით დაუკავშირდება 2015 წლისთვის აგებულ ოლიმპიურ სასახლეს, რომელშიც ორი სხვადასხვა ტევადობის დარბაზია. ერთში 3 ათასი ადამიანი ეტევა, მეორეში – 800."

მომავალი ევროპის ჩემპიონატი 2022 წლის 1-18 სექტემბერს ოთხ ქვეყანაში ჩატარდება. თბილისის გარდა, ჯგუფური ეტაპის მატჩებს პრაღა (ჩეხეთი), კიოლნი (გერმანია) და მილანი (იტალია) უმასპინძლებენ, ფინალური რაუნდი კი ბერლინში (გერმანია) ჩატარდება.

ასევე იხილეთ: Championat.com: "მისი ცსკა-ში გადასვლა მხოლოდ დროის საკითხია"

როგორი იქნება 2022 წელს გასამართი ევრობასკეტის არენა?!

ასევე იხილეთ

უახლესი ამბები