ცოტა ხნის წინ, სუპერლიგის გუნდი, ტიტები, რომლის მედია პარტნიორი Croco.ge-ა, საქართველოს ნაკრების გამოცდილი გამთამაშებელით, მაიკლ დიქსონით გაძლიერდა.

ეს ტრანსფერი ბოლო წლებში უდავოდ ყველაზე გამორჩეულია, რადგან ამ დონის მოთამაშეებით ქართული ლიგა განებივრებული ნამდვილად არ არის.

ჩვენ მაიკლს ტიტების ვარჯიშზე ვეწვიეთ და მცირე ინტერვიუც ჩავწერეთ:

- პირველ რიგში მაინტერესებს, როგორია საქართველოში ცხოვრება?

- ყველაფერი კარგადაა და აქ ცხოვრება საკმაოდ კარგია, ყველამ კარგად იცის აქ რატომ ვარ. ყოველ ვარჯიშზე, თამაშზე ვცდილობ ფორმა აღვიდგინო და როგორც კალათბურთელი, კიდევ უფრო განვვითარდე. ასევე მინდა, რომ გუნდს მოგებებში დავეხმარო, რაც ძალიან მნიშვნელოვანია.

- ვინ ითამაშა თქვენს ამ გუნდში გადმოსვლაში გადამწყვეტი როლი?

- მე და „მანუ“ (მარკოიშვილი) ნაკრებში თანაგუნდელები ვიყავით, ასევე ჩვენთან ერთად თამაშობდა გუნდის მფლობელი, ლაშა გამყრელიძე. ჩვენ 2017 წლის ევრობასკეტზე ძალიან კარგად ვითამაშეთ, სწორედ ამ ორმა ადამიანმა ითამაშა გადამწყვეტი როლი ჩემს ამ გუნდში ჩარიცხვაში. მათთან ერთად ვცდილობ ნაყოფიერად ვიმუშავო და რაც შეიძლება მეტი თამაში მოვიგოთ, მანუჩარი ჩემთვის მნიშვნელოვანი ადამიანია, მართალია უკვე განსხვავებულ ამპლუაში, მაგრამ მიხარია, რომ კვლავ ერთად გვიწევს მუშაობა.

- რას იტყოდით თქვენს ახალ გუნდ ტიტებზე და როგორ მოგწონთ საქართველოს სუპერლიგა?

- ბიჭები ძალიან კარგები არიან, მათ შესანიშნავად მიმიღეს და თავს მშვენივრად ვგრძნობ. მწვრთნელები შესანიშნავ სამუშაოს ეწევიან, ჩვენ დღითიდღე ვიზრდებით. თავიდან გაგვიჭირდა, პირველი მატჩი წავაგეთ, თუმცა შემდეგ ჩვენი თამაში ვიპოვეთ და ყველაფერი წესრიგშია, იმედია კვირასაც გავიმარჯვებთ.

- როგორც პროფესიონალი კალათბურთელი, როგორ დაახასიათებდით საკუთარ თავს?

- შემიძლია სროლა, ბურთის კარგად ტარება, დაცვა, გათამაშება, პასი, ვასრულებ მოხსნებსაც, მოედანზე ვაკეთებ თითქმის ყველაფერს, სწორედ ამიტომ აღვწერ საკუთარ თავს, როგორც ე.წ. „სრულყოფილი მოთამაშე“ (all around player).

- ზოგჯერ ადამიანებს ავიწყდებათ, რომ „ნახევარი თამაში დაცვაა“, თქვენ ამ კომპონენტში საკმაოდ კარგი ხართ, რას იტყოდით ამის შესახებ?

- რა თქმა უნდა, ვფიქრობ თამაშის ყველაზე მნიშვნელოვანი ასპექტი სწორედ დაცვაა, მატჩებს სწორედ ეს იგებს.

- როგორია თქვენი სამომავლო გეგმები?

- ვარ მოლოდინის რეჟიმში, რომ მივიღო ჩინეთის ვიზა და სათამაშოდ სწორედ ამ ქვეყანაში წავიდე, მანამდე კი მაქსიმალურად ვცდილობ, ტიტებს წარმატების მიღწევაში დავეხმარო.

- თუ უყურეთ საქართველოს ნაკრების მატჩებს ფინეთში და ვის გამოარჩევდით?

- რა თქმა უნდა, ვუყურე და ვუგულშემატკივრე, ძალიან გამახარა ბიჭების წარმატებამ. იმედია, სწორედ ასეთი შემართებით გააგრძელებენ. რაც შეეხება მოთამაშეებს, ძალიან კარგები იყვნენ მაკფადენი, თოკო, შერმო, ბაქრაძე, ვფიქრობ ყველამ გუნდურად მაღალი დონის კალათბურთი აჩვენა, რისი მთავარი შემოქმედი მწვრთნელი - ილიას ზუროსია.

- ბოლოს, რას ეტყოდით ქართველ გულშემატკივარს?

- ქართველ გულშემატკივართან მადლობის მეტი არაფერი მეთქმის, მათ მხარდაჭედას ყოველთვის ვგრძნობდი და იმედია, საქართველოს ნაკრების 3-ნომრიან მაისურს ისევ მოვირგებ. ვფიქრობ პანდემია მალე დასრულდება, ცხოვრება ჩვეულ რიტმს დაუბრუნდება და ერთმანეთს მალე შევხვდებით...

შეგახსენებთ, რომ ტიტების გენერალური სპონსორია კროკობეთი - გაერთე უსასრულოდ!

ექსკლუზიური ინტერვიუ მაიკლ დიქსონთან

ასევე იხილეთ

უახლესი ამბები