ფეიენოორდმა ადვოკაატს ნდობა გამოუცხადა
ადვოკაატი როტერდამელებს კიდევ ერთი სეზონი გაწვრთნის

როტერდამის ფეიენოორდის ოფიციალური ვებ-გვერდის ცნობით, კლუბმა მთავარ მწვრთნელს, დიკ ადვოკაატს მოქმედი კონტრაქტი ერთი წლით გაუხანგრძლივა და ნიდერლანდელი სპეციალისტი კლუბის სათავეში 2021 წლის ზაფხულამდე დარჩება.

"ეს ფანტასტიკაა, რომ ჩვენ მოვახერხეთ და დიკ ადვოკაატთან კონტრაქტი კიდევ ერთი წლით გავახანგრძლივეთ. ამ შესანიშნავ სპეციალისტთან ერთად ჩვენ კვლავ შევძელით საჩემპიონო რბოლაში ჩავრთულიყავით და ამასტანავე თასის ფინალში გასვლა მოვახერხეთ. სამწუხაროდ, სეზონი კორონავირუსის პანდემიის გამო შეჩერდა და ძნელი წარმოსადგენია როდის მოვახერხებთ თამაშის გაგრძელებას. თუმცა, ასეთ მწვრთნელთან ერთად როცა არ უნდა დავბრუნდეთ, ნებისმიერ შემთხვევაში მაღალი მიზნებისთვის ვიბრძოლებთ", - განაცხადა ფეიენოორდის ტექნიკურმა დირექტორმა ფრანკ არნესენმა.

"ჩემთვის ძალიან სასიამოვნოა ამ შესანიშნავ კლუბთან კონტრაქტის გახანგრძლივება. ბოლო პერიოდში ფეიენოორდი სულ უფრო და უფრო უკეთესად გამოიყურებოდა. მსურს, რომ დაწყებული საქმე ბოლომდე მივიყვანო და მწვერვალები დავიპყრო", - თქვა 72 წლის სპეციალისტმა.

დიკ ადვოკაატმა ფეიენოორდი 2019 წლის ნოემბრის ბოლოს ჩაიბრა და მტავარი მწვრთნელის პოსტზე იაპ სტამი ჩაანაცვლა. ამრიგად, ნიდერლანდელი სპეციალისტისთვის როტერდამული კლუბი 40 წლიან სამწვრთნელო კარიერაში მეოცე გუნდი გახდა. სხვადასხვა წლებში ადვოკაატი ნიდერლანდებს, ბელგიას, სერბეთს, სამხრეთ კორეას, რუსეთს, პსვ-ს, ალკმაარს, მიუნხენგლადბახის ბორუსიას, სანდერლენდს, ფენერბახჩესა და სხვა მრავალს წვრთნიდა.

შეგახსენებთ, რომ კორონავირუსის პანდემიის გამო ერედივიზიის შეჩერებამდე ფეიენოორდი სატურნირო ცხრილში 25 ტურის შემდეგ, მე-3 პოზიციას იკავებს და ლიდერ აიაქსს ექვსი ქულით ჩამორჩება. ნიდერლანდების თასის ფინალში კი უტრეხტს 19 აპრილს უნდა დაპირისპირებოდა.

ასევე იხილეთ: შვედეთში ჩემპიონატის დაწყებას გეგმავენ

ფეიენოორდი და ადვოკაატი შეთანხმდნენ

უახლესი ამბები