კორონავირუსით გამოწვეული პანდემიის გამო, თითქმის მთელი მსოფლიო სახლებშია გამოკეტილი და დროის გაყვანას საინტერესო ფილმების ყურებით ცდილობს.

ჩვენ შევეცადეთ, თქვენთვის ეს საქმე შეძლებისდაგვარად გაგვემარტივებინა და Croco.ge-ს ვერსიით ტოპ 10 სპორტულ ფილმს წარმოგიდგენთ.

10. უიმბლდონი (WIMBLEDON)

ფილმი 2004 წელს არის გადაღებული და მასში საკმაოდ პოპულარული ინგლისელი მსახიობი პოლ ბეთანი მონაწილეობს (ვიჟენი - შურისმაძიებლებიდან), ხოლო მას პარტნიორობას იმ დროისთვის ადამიანი ობობას ვარსკვლავი კირსტენ დანსტი უწევს.

მართალია ის საკმაო დოზით შეიცავს რომანტიკას, თუმცა კარგად გვაჩვენებს ჩოგბურთის ერთ-ერთი უმთავრესი ტურნირის პერიპეტიებს და შიდა სამზარეულოს.

უიმბლდონი ჩოგბურთზე გადაღებულ ფილმებში უდავოდ მოწინავე ადგილს იკავებს და ჩვენს სიაში მეათე ადგილი დამსახურებულად მოიპოვა.

9. მარადონა (MARADONA)

ფილმი ორი უცნაური გენიოსის კოლაბორაციაა. მარადონა, რომელიც ყოველთვის აოცებდა საფეხბურთო მსოფლიოს თავისი ექსტრავაგანტული ქცევით და კუსტურიცა, რომელიც იგივეს კინემატოგრაფიაში აკეთებს.

სერბი რეჟისორი ცდილობს სააშკარაოზე გამოიტანოს ისეთი დიეგო, როგორიც ის სინამდვილეშია, თავისი უამრავი ნაკლით, მაგრამ მაინც გენიალურობით.

ამ ნამუშევრის ნახვით, კარგად შეიცნობთ არგენტინელი გენიოსის ბუნებას.

8. პარასკევის ღამის შუქები (FRIDAY NIGHT LIGHTS)

შესანიშნავი ნამუშევარი, რომელშიც ბილი ბობ ტორნტონი თამაშობს და რეალურ ამბავზეა დაფუძნებული.

მასში მოთხრობილია ტეხასის პატარა ქალაქის გუნდის წარმატების ისტორია, თუმცა მათ გზად რასისზმი და ოჯახური პრობლემები ხვდებათ.

ფილმში შესანიშნავი სამსახიობო ქასთია შეკრებილი და ამერიკული ფეხბურთის შესახებ გადაღებულ ნამუშევრებს შორის ერთ-ერთი საუკეთესოა.

7. დაუმორჩილებლები (INVICTUS)

ლეგენდარული მსახიობები აპარატეიდის შემდგომ აფრიკას და იმ დროისთვის ამ ქვეყანაში მთავარ მოვლენას, რაგბის მსოფლიო თასს "აცოცხლებენ".

მორგან ფრიმანი, რომელიც იმ დროისთვის ახლადარჩეულ პრეზიდენტს ნელსონ მანდელას როლს ასრულებს, ცდილობს საერთო ენა გამონახოს "სპრინგბოკსის" (სამხრეთ აფრიკის რაგბის ნაკრები) კაპიტან ფრანსუა პიენაართან (მეტ დეიმონი).

ფილმში ამ ორ ადამიანს შორის ძალიან საინტერესო ბევრი დიალოგია, რომელსაც ხსენებული 1995 წლის რაგბის მსოფლიო თასი და ჩემპიონატის ისტორიული მატჩისთვის მზადება ერთვის.

6. მებრძოლი (THE FIGHTER)

ორი ოსკარის მფლობელი ფილმი, გულგრილს ვერავის დატოვებს.

ის მოგვითხრობს მოკრივე მიკი "აირიშ" უორდის ისტორიას, რომელმაც ძალიან მძიმე გზა გაიარა იმისათვის, რომ მსოფლიო ჩემპიონი გამხდარიყო.

მარკ უოლბერგი, აბსოლუტურად სახეცვლილი კრისტიან ბეილი, ემი ადამსი და დანარჩენები, შესანიშნავ სამსახიობო ქასთს ქმნიან.

5. მანიბოლი (MONEYBALL)

MLB-ის გუნდის ოქლენდ ატლეტიკსის ბეისბოლის გუნდის მენეჯერის ბილი ბინის ისტორია, რომელიც შემადგენლობას ანალიტიკოსთან ერთად ბეისბოლისთვის აბსურდად მიჩნეული მეთოდებით დააკომპელქტებს.

ისინი ცდილობენ, კომპიუტერული პროგრამის მეშვეობით თამაშის ზუსტი მათემატიკური გათვლები გააკეთონ. თუმცა გზად უამრავ პრობლემას აწყდებიან.

ბრედ პიტის და ჯონა ჰილის 6 ოსკარზე ნომინირებული ფილმი, ჩვენს სიაში დამსახურებულ ადგილს იკავებს.

4. რაში (RUSH)

ფილმი მეოცე საუკუნის 70-იანი წლების ორი საუკეთესო მრბოლელის ავსტრიელი ნიკი ლაუდას და ბრიტანელი ჯეიმს ჰანტის ისტორიაზეა, რომლებიც ერთმანეთის დასამარცხებლად ყველა ხერხს მიმართავენ.

სარბოლო ავტომობილების გამარტივებული ფორმები, სასტიკი მრბოლელები ტრეკებზე, სექსუალური გულშემატკივრები, შამპანიური გამარჯვებულისთვის ფინიშზე და საბედისწერო ავარია.

კრის ჰემსვორტი და დენიელ ბრაჰლი შესანიშნავად "გვიცოცხლებენ" იმ დროის ყველაზე ეპიკურ დაპირისპირებას.

3. ალი (ALI)

დაუმარცხებელი მოკრივე მოჰამედ ალი განსაკუთრებით აფრო ამერიკელთა დიდი გმირია, მთელი მსოფლიოს კუმირი, და ამავე დროს მე–XX საუკუნის ერთ-ერთი ბოლომდე შეუფასებელი პერსონა.

მშობლიურ ქვეყანაში სამოქალაქო უფლებებისთვის ბრძოლის დროს, როდესაც ხმაურიანი პოლიტიკური და სოციალური მოვლენები ძირსაფუძვლიანად ცვლიდნენ ხალხის მსოფლმხედველობას, ალი დამცირებულებს იცავდა და ხალხს ახალ იმედებს ჩუქნიდა. ისტორიამ ის ცოცხალ ლეგენდათ აქცია.

ლეგენდარული სპორტსმენი, ასევე ლეგენდარულმა უილ სმიტმა განასახიერა, ფილმი ორ ოსკარზეა ნომინირებული.

2. უხილავი მხარე (THE BLIND SIDE)

ნამდვილი ისტორია უსახლკარო 16 წლის ბიჭზე, რომელსაც "დიდ მაიკს" ეძახიან. მას შეძლებული მემფისელი წყვილი შეიფარებს და ამერიკული ფეხბურთის ვარსკვლავად აქცევს.

ფილმი ძალიან ემოციურია და სანდრა ბალოკის საოსკარო ნამუშევარია. თამამად შეგვიძლია ვთქვათ, რომ ის სპორტული ფილმების ისტორიაში ერთ-ერთი საუკეთესო ეკრანიზაციაა.

1. მწვრთნელი კარტერი (COACH CARTER)

ნამდვილი ამბავი, რომელშიც რიჩმონდის კოლეჯის საკალათბურთო გუნდის მწვრთნელი კენ კარტერი, ცდილობს მოთამაშეები "სწორ გზაზე" დააყენოს.

1999 წელს ის მედიის ყურადღების ცენტრში ხვდება, რადგან საუკეთესო სპორტული მიღწევების მქონე გუნდს თამაშის საშუალებას მანამ არ აძლევს, სანამ ისინი აკადემიურ მოსწრებას არ გამოასწორებენ.

სემუელ ელ ჯექსონის საოცარი შესრულება კი, ჩემი აზრით ფილმს ამ ჟანრში საუკეთესოდ აქცევს.

ტოპ 10 სპორტული ფილმი - რომელსაც პანდემიის დროს უნდა უყუროთ

უახლესი ამბები