სფფ–ს პრეზიდენტმა საქართველო – ბელარუსის დაპირისპირებაზე ისაუბრა
თარიღი კვლავ გაურკვეველია

საქართველოს ფეხბურთის ფედერაციის პრეზიდენტმა, ბელარუსთან გასამართი მატჩის შესახებ საზოგადოებრივ მაუწყებელთან ისაუბრა. როგორც ირკვევა, პანდემიის გამო გადადებული მატჩის ჩატარების თარიღი ჯერაც გაურკვეველია.

ამ ეტაპზე რთულია სავარაუდო თარიღის განსაზღვრაც, რადგან როგორც ირკვევა, თავად უეფაც ვერ ჩამოყალიბდა ამ საკითხზე და ერთიანი პოზიცია ჯერაც არ არსებობს. ისინი მაქსიმალურად ცდილობენ, რომ ჯანდაცვის საერთაშორისო ორგანიზაციის რეკომენდაციები გაითვალისწინონ.

"მოგეხსენებათ, რომ უეფამ აღამსკომი 27 მაისიდან 17 ივნისს გადადო. ეს იმას ნიშნავს, რომ ჯერ თარიღზე უეფაც არაა ჩამოყალიბებული, მაგრამ არსებობს გარკვეული გეგმა, რომლის თანახმადაც, მატჩი შემოდგომაზე, ოქტომბერში გაიმართება.

ერთა ლიგის ახალი გათამაშება შემოდგომაზე უნდა დაიწყოს და სექტემბერში, ოქტომბერსა და ნოემბერში ექვსი მატჩი უნდა გაიმართოს. თუმცა, ერთა ლიგის პირველი გათამაშების ნახევარფინალებისა და ფინალის გადადების გამო, გამოდის, რომ შემოდგომაზე ექვსი სანაკრებო მატჩის ნაცვლად, სავარაუდოდ, რვა შეხვედრის ჩატარება მოგვიწევს. ეს ჩვენთვის იდეალური არაა, რადგან ახალი გათამაშების ჯგუფში მეტოქეები უფრო დასვენებულები იქნებიან. ამიტომ უეფას ჩვენი წინადადებით მივმართეთ და ვნახოთ, რა პასუხს მივიღებთ“, – აცხადებს ლევან კობიაშვილი.

მოგეხენებათ, რომ ერთა ლიგის ნახევარფინალური მატჩი საქართველოსა და ბელარუსს შორის 26 მარტს, თბილისში უნდა გამართულიყო, თუმცა კორონავირუსის გამო, ამ შეხვედრის ჩატარება საფრთხისშემცველი იყო, რის გამოც მისი გამართვა თავდაპირველად ივნისისთვის გადაიდო. შემდეგ ახალ სავარაუდო თარიღად სექტემბერი დასახელდა, მაგრამ როგორც ირკვევა, საბოლოო გადაწყვეტილება მიღებული ჯერაც არ არის.

ასევე იხილეთ: ეროვნული ლიგის განახლების სავარაუდო თარიღი ცნობილია

წყარო: 1TV.GE

კობიაშვილმა საქართველო – ბელარუსის მატჩზე ისაუბრა

ასევე იხილეთ

უახლესი ამბები