ზინედინ ზიდანს მეორე ტაიმი არ მოეწონა
დარჩენილი შეხვედრები უმნიშვნელოვანესია

მოგეხსენებათ, რომ გუშინ, 14 ივნისს განახლებულ ლა ლიგაში 28–ე ტურის ეგიდით გამართულ მატჩში, ზინედინ ზიდანის დარიგებულმა რეალმა მასპინძლობა ეიბარს გაუწია და დამაჯერებელი ანგარიშით 3:1 დაამარცხა.

"სამეფო კლუბმა" პირველ ტაიმში მეტოქეს სამი უპასუხო გოლი გაუტანა. ფრანგი სპეციალისტი მიიჩნევს, რომ მისმა გუნდმა შეხვედრის პირველ ნახევარში კარგად ითამაშა, თუმცა მეორე მას არ მოეწონა.

ზინედინ ზიდანისთვის გუშინდელი მატჩი რეალის მთავარი მწვრთნელის რანგში რიგით მეორასე გახლდათ. საიუბილეო შეხვედრაში მოპოვებული გამარჯვება მისთვის მნიშვნელოვანი იყო, როგორც სიმბოლურად, ასევე სატურნირო ცხრილში არსებული სიტუაციიდან გამომდინარეც. ეიბართან გამარჯვება კი 132-ე აღმოჩნდა.

"უნდა აღინიშნოს, რომ მატჩის პირველი ნახევარი კარგად ჩავატარეთ, თუმცა მეორე ტაიმი გაცილებით რთული აღმოჩნდა. არ ვიცი, ეს ფიზიკური მომზადების ბრალია თუ მიზეზი სხვა რამეში უნდა ვეძებოთ.

არსებული კალენდარი მართლაც საკამოდ მჭიდროა, თუმცა ამას ვერაფერს მოვუხერხებთ. წინ კიდევ 10 შეხვედრა გველის და კარგად გვესმის, რომ დარჩენილი მატჩები ფინალის ტოლფასია.

ფეხბურთი ახლა სხვანაირია და ახალ წესებს უნდა დავემორჩილოთ. ამ მატჩში გოლი თავდამსხმელებს არ გაუტანიათ, თუმცა ამაზე სულაც არ ვღელავ, რადგან მათ გამარჯვებაში დიდი როლი ითამაშეს. ჩვენ ყველა პოზიციაზე უმაღლესი დონის ფეხბურთელები გვყავს, რომლებსაც გატანა ნებისმიერ დროს შეუძლიათ. აზარს ნამდვილად შეეძლო, რომ გოლი საკუთარ აქტივში ჩაეწერა, თუმცა მან საგოლე გადაცემის გაკეთება არჩია და მის გადაწყვეტილებას მივესალმები", – ზინედინ ზიდანის სიტყვებს გამოცემა Marca ციტირებს.

ასევე იხილეთ: რამოსი კუმანს გაუთანაბრდა

ზიდანი: "დარჩენილი მატჩები ფინალის ტოლფასია"

უახლესი ამბები