ჯენარო გატუზოს გაწვრთნილი ნაპოლი, უკანასკნელ ცხრა მატჩში არ დამარცხებულა. კლუბმა იტალიის თასის მოგებაც მოახერხა, როცა ფინალში ტურინის იუვენტუსი დაამარცხა. გატუზოსთვის მწვრთნელის რანგში ეს პირველი ტიტული გახლდათ.

გუშინ ნაპოლიმ სერია ა–ს ეგიდით სპალს უმასპინძლა და დამაჯერებელი ანგარიშით, 3–1 გაიმარჯვა. მომდევნო შეხვედრა მათ სტუმრად, ატალანტასთან ელით. გასპერინის გუნდი ბრწყინვალე ფორმაშია და ოთხეულისთვის იბრძვის.

ჯენარო გატუზომ მომავალი მეტოქე შეაქო და თავის გამოცდილებაზე ისაუბრა, რომელიც მას მწვრთნელობის პერიოდში დაუგროვდა. როგორც იტალიელი ამბობს, ის ახლა ფეხბურთს განსხვავებულად უყურებს და ისე აღარ ფიქრობს, როგორც ამას ფეხბურთელობის დროს აკეთებდა. ნეაპოელთა თავკაცის განცხადებას FOOTBALL-ITALIA ავრცელებს.

"ახლა ფეხბურთს სხვაგვარად ვხედავ და ეს სრულიად განსხვავდება იმ პერიოდისგან, როცა მე მოთამაშე ვიყავი. არც ისე დიდი ხანია, რაც სამწვრთნელო საქმიანობას ვეწევი, თუმცა მიღებული გამოცდილება მეხმარება იმაში, რომ სპორტის ამ სახეობას უფრო სიღრმისეულად ჩავწვდე. იყო მწვრთნელი, ეს უდიდესი პასუხისმგებლობაა. შენ თითოეულ მოთამაშეზე მეტი უნდა გესმოდეს.

წინ ოთხი გარდამტეხი მატჩი გველის. ატალანთასთან, რომასთან, ჯენოასთან და მილანთან. სწორედ ამ მატჩებში ნაჩვენები შედეგი განსაზღვრავს, თუ რამდენად წარმატებული სეზონი გვექნება სერია ა-ში. გასპერინის გუნდი უბრალოდ შესანიშნავ ფეხბურთს თამაშობს. მათ ნებისმიერი მეტოქის დამარცხება შეუძლიათ.

მიხარია, რომ კალეხონმა ჩვენთან დარჩენა სეზონის ბოლომდე გადაწყვიტა, რადგან ის მნიშვნელოვან სამუშაოს ასრულებს და ამით დიდი სამსახური გაგვიწია. ლოსანო? ის ვარჯიშებზე კარგად გამოიყურება და მას დაბრუნების შანსი მივეცი", – ამბობს ჯენარო გატუზო.

აქვე შეგახსენებთ, რომ ნაპოლის ჩემპიონთა ლიგის მეოთხედფინალში გასვლის შანსიც აქვს. მისი მეტოქე კატალონიის ბარსელონაა, რომელთანაც საპასუხო შეხვედრის გამართვა "კამპ ნოუზე" მოუწევთ. პირველი დაპირისპირება კი ფრედ, 1–1 დასრულდა.

გატუზო: "ახლა ფეხბურთს სხვაგვარად ვხედავ"

ჯენარო გატუზო მიღებულ გამოცდილებაზე საუბრობს

იტალიელი სპეციალისტი განვითარებას აგრძელებს

უახლესი ამბები