საფეხბურთო ვარსკვლავების კარიერის დაწყების ისტორია და განვლილი გზა, ყოველთვის დიდ ინტერესს იწვევს.

ბევრ ცნობილ ფეხბურთელს, წარსულში საყვარელი კლუბის საშინაო არენის სარბენ ბილიკებზე გაუტარებია დრო და მათთვის მისაბაძი მოთამაშეთათვის, ბურთი არაერთხელ მიუწოდებია. იმ მომენტში, რთულია იმის წარმოდგენა, რომ რიგითი ბიჭუნა, რომელმაც ცოტა ხნის წინ, ერთ-ერთ ფეხბურთელს ბურთი მიაწოდა, დიდ ფეხბურთს ითამაშებს. ამას, როგორც წესი, წლების შემდეგ, ფოტო არქივი გვახსენებს:

ფაბიო კანავარო ნაპოლის სკოლის აღზრდილია და პირველი პროფესიონალური კლუბიც, სწორედ ნაპოლია. პატარა ფაბიო დიეგო მარადონასა და ჩირო ფერარასდროინდელ გუნდში ბურთის მომწოდებელი ბიჭი იყო.

ფოტოზე კარგად ჩანს, დიეგო მარადონა თავის თანაგუნდელებთან და 14 წლის კანავაროსთან ერთად, სკუდეტოს მოგებას ზეიმობს.

პეპ გუარდიოლა ბარსელონას სკოლის აღზრდილია და მისი პროფესიული კარიერაც, სწორედ კატალონიურ გრანდში დაიწყო. პეპმა "ბლაუგრანასთან" ერთად, როგორც ფეხბურთელის, ისე მწვრთნელის რანგში, ყველაფერი მოიგო.

მანჩესტერ სიტის ამჟამინდელი მწვრთნელი, ბარსელონაში 1990-2001 წლებში ასპარეზობდა. კატალონიური გრანდის მწვრთნელად კი, 2008 წლის ზაფხულში დაინიშნა და 2012 წლის ივნისამდე წვრთნიდა. პეპმა ბარსელონას 14 ტიტული მოაგებინა, მათ შორის, ჩემპიონთა ლიგის ორი თასი.

ფოტოზე გუარდიოლა, ვიქტორ მუნიოსთან ერთად არის. პატარა პეპი, ბარსელონას იმდროინდელ ფეხბურთელთან ერთად, 1986 წლის ჩემპიონთა თასის ფინალში გასვლას ზეიმობს.

უეინ რუნი, მშობლიური ევერტონის საშინაო მატჩებზე, ბურთის მომტან ბიჭუნად ხშირად გვევლინებოდა. მერსიასიდული დერბის ერთ-ერთ ფოტოზე, პატარა უეინი "კანფეტების" კაპიტნის წინ დგას.

რუნის დებიუტი ევერტონში 2002 წელს შედგა. მანჩესტერ იუნაიტედში გატარებული 13 სეზონის შემდეგ, "შრეკი" ერთი წლით ევერტონში დაბრუნდა. "კანფეტების" მაისურით ჩატარებულ 117 შეხვედრაში, მის ანგარიშზე 28 გოლია.

რეალის ლეგენდა რაული, 1990-92 წლებში, ატლეტიკოს საფეხბურთო სკოლაში ირიცხებოდა. ფოტოზე ესპანელი, "როხიბლანკოს" ყოფილ თავდამსხმელთან, მანოლოსთან ერთადაა.

რაულმა რეალის მაისურით 741 შეხვედრა გამართა და 323 გოლი გაიტანა. ესპანელმა მადრიდულ გრანდთან ერთად 16 ტიტული მოიგო.

უესლი სნეიდერი ამსტერდამული კლუბის აღზრდილია. ფოტოზე სნეიდერი, აიაქსისა და ნიდერლანდური ფეხბურთის ლეგენდასთან, ფრანკ რაიკარდთან ერთად არის. პატარა უესლი, საყვარელი კლუბის ბურთის მომტანი ბიჭი იყო.

სნეიდერმა აიაქსში ხუთი სეზონი გაატარა. ამსტერდამული კლუბის მაისურით ჩატარებულ 180 შეხვედრაში, მის ანგარიშზე 58 გოლია. ინტერისა და რეალის ყოფილმა ფეხბურთელმა, აიაქსთან ერთად, ერთხელ ერედივიზიონი, ხოლო ორჯერ კი ნიდერლანდების თასი მოიგო.

ხორვატიის ნაკრებისა და ლონდონის ჩელსის ნახევარმცველმა, მატეო კოვაჩიჩმა, 26 წლის ასაკში, უკვე მოასწრო ისეთ კლუბებში თამაში, როგორიც ჩელსი, ინტერი და რეალია.

ფოტოზე, პატარა მატეო, ჩემპიონთა ლიგის ერთ-ერთი შეხვედრის შემდეგ, ლივერპულის ლეგენდარული კაპიტნის, სტივენ ჯერარდის ყურადღების მიქცევას ცდილობს.

ტრენტ ალექსანდერ-არნოლდი ბოლო წლებში, ერთ-ერთი საუკეთესო მარჯვენა მცველია. ინგლისელი ლივერპულის სკოლის აღზრდილია. არნოლდმა 21 წლის ასაკში "წითლებთან" ერთად, ჩემპიონთა ლიგისა და პრემიერ ლიგის მოგება უკვე მოასწრო.

პატარა ტრენტი ფოტოზე, მერსისაიდული კლუბის ლეგენდარულ კაპიტანთან, სტივენ ჯერარდთან ერთადაა. ინგლისელი განაპირა მცველი, ბავშვობაში "ენფილდზე" ბურთის მომტანი ბიჭის როლს ხშირად ითავსებდა.

ფეხბურთელები, რომლებიც ბურთის მომტანი ბიჭები იყვნენ

უახლესი ამბები