რამდენიმე დღის წინ, ვილიარეალის ვებ-გვერდზე სანტიაგო კასორლას მისამართით მადლიერების გამომხატველი არაერთი სიტყვა დაიწერა. ეს კი იმას ნიშნავდა, რომ ვეტერანმა ნახევარმცველმა კონტრაქტი არ გაახანგრძლივა და დატოვა კლუბი, რომელმაც მაც საფეხბურთო მინდვრებზე კარი სამჯერ გაუღო.

სანტიაგო კასორლა ვილიარეალის სტრუქტურაში 19 წლის ასაკში, 2003 წელს გამოჩნდა და ნიჭიერმა მოთამაშემ მალევე შეძლო ძირითად შემადგენლობაში ადგილის დამკვიდრება. 3 წლის შემდეგ, სანტიმ კლუბი დატოვა და ერთი სეზონი უელვაში გაატარა.

2007 წელს კასორლამ კვლავ მოირგო ყვითელი ფორმა და ამჯერად უფრო დიდი ხნით. "ელ მადრიგალზე" ესპანელმა ოთხი შესანიშნავი სეზონი გაატარა და 173 შეხვედრაში 28 გოლი გაიტანა. შემდეგ იყო მალაგა, არსენალი და ისევ "ყვითელი წყალქვეშა გემი". ტრავმებით გატანჯული ფეხბურთელი არ დანებდა, ბოლომდე იბრძოლა და ყველაფერი გააკეთა იმისათვის, რომ ფეხბურთის თამაშით კვლავაც მიეღო სიამოვნება და ეს გულშემატკივრისთვისაც გაეზიარებინა.

ყველაფერი 2013 წელს წელს დაიწყო. შვეიცარიაში, ესპანეთისა და ჩილეს ეროვნული ნაკრებების ამხანაგური მატჩის დროს, სანტიაგო კასორლა თამაშში ჩაერთო, თუმცა შეხვედრა ნახევარმცველითვის ფატალური გამოდგა. მიუხედავად იმისა, რომ სანტიმ ბოლომდე ითამაშა, ფეხბურთელმა გასახდელში ტკივილები იგრძნო - მას ტერფის მოტეხილობა აღმოაჩნდა.

კასორლას ხანგრძლივი მკურნალობის გავლა მოუწია, რის შემდეგაც ის მოედანს დაუბრუნდა. თუმცა მოუწია, რომ სხვადსხვა ტკივილგამაყუჩებლების ფონზე ეთამაშა, მაგრამ ტკივილები სულ უფრო და უფრო ძლიერდებოდა.

2015 წლის ნოემბერში, არსენალში თამაშის დროს, პრემიერ ლიგის მატჩში, სანტიმ ფეხბურთელისთვის ყველაზე მძიმე ტრავმა მიიღო - მან მუხლის ჯვარედინი მყესები გაიწყვიტა. მოთამაშეს საოპერაციო მაგიდაზე დაწოლა მოუხდა და საჭირო გახდა კიდევ ერთი ხანგრძლივი მკურნალობის გავლა. ფეხბურთელი მინდორს კიდევ ერთხელ უბრუნდება, მაგრამ არც თუ ისე დიდი ხნით.

დაახლოებით ერთი წლის შემდეგ, ჩემპიონთა ლიგის მატჩში ლუდოგორეცის წინააღმდეგ, კასორლამ მესუთ იოზილს საგოლე გადაცემა გაუკეთა, რა ეპიზოდშიც ის კიდევ ერთ ტრავმას იღებს და მოედანს იძულებით, ნაადრევად ტოვებს. სანტის კვლავ ქირურგიული ჩარევა დასჭირდა. ამჯერად, ქუსლის მყესის მიდამოებში. ოპერაციის შემდეგ, აღმოჩნდა, რომ ნაკერები არ ხორცდებოდა და ისევ საოპერაციო მაგიდა, ისევ სკალპელი. აღდგენითი ვარჯიშების დროს, ტრავმამ თავი ისევ იჩინა. ესპანელს ნაკერები გაეხსნა და... კიდევ 4 ოპერაცია. უკვე 2017 წლის გაზაფხულზე, სანტი ექიმებისგან იგებს, რომ მისთვის ფეხბურთი დამთავრებულია და ყველაზე უარესი ის იყო, რომ ფეხბურთელს, შესაძლოა, საერთოდ ვეღარ გაევლო.

ბრიტანელი სპეციალისტების არადამაიმედებელი პროგნოზების შემდეგ, კასორლა იძულებული გახდა ესპანეთში დაბრუნებული, სადაც ის ექიმ მიკელ სანჩესს დაუკავშირდა, რომელსაც ის ჯერ კიდევ ვილიარეალში თამაშის პერიოდიდან იცნობდა. ესპანელმა მედიკოსმა პრობლემას მალევე მიაგნო და აღმოაჩინა, რომ ინგლისში ჩატარებული ოპერაციის დროს, სანტის ჭრილობაში ინფექცია შეეჭრა, რომელმაც ქუსლის მყესის დაახლოებით 8 სანტიმეტრის ნაწილი შეჭამა, რასაც, შესაძლოა სისხლის მოწამვლა გამოეწვია და ამისგან თავის არიდების მიზით, საჭირო ხდებოდა ფეხის ამპუტაცია.

2017 წლის 29 მაისს, სანტიაგო კასორლა კიდევ ერთხელ წვება საოპერაციო მაგიდაზე, ამჯერად უკანასკნელად. ნაოპერაციებ ადგილას კი ფეხბურთელს კანი ხელიდან გადაუნერგეს. იმ ადგილიდან, რომელსაც სანტის ქალიშვილის სახელის სვირინგი იყო ამშვენებდა.

ოპერაციის შემდეგ, სანტიაგო საცხოვრებლად პატარა ქალაქში, სალამანკაში გადადის, სადაც ის იწყებს აღდგენით პროცესს ესპანეთის ეროვნული ნაკრების ექიმის, ხუან კარლოს ერანსის მკაცრი მეთვალყურეობის ქვეშ. ფეხბურთელი დატვირთვებს ეტაპობრივად ზრდიდა და ბოლოს, ის იღებს ნებართვას, ივარჯიშოს ბურთთან ერთად. 2018 წლის 6 ივლისს, აღდგენითი პროცესი წარმატებულად დასრულდა და კასორლას ისღა დარჩენოდა, რომ კარიერის გასაგრძელებლად ახალი კლუბი ეპოვნა.

სრული გამოჯანმრთელებიდან რამდენიმე დღეში, ფეხბურთელმა მშობლიურ ვილიარეალს მიმართა, რადგან უბრალო შემოწმება გაევლო, რასაც კასტელონის გუნდთან გაფორმებული კონტრაქტი მოჰყვა. 636 დღიანი ტრავმიანობის პერიოდი საბოლოოდ დასრულდა და 2018 წლის 18 აგვისტოს, კასორლას ხელმეორე დებიუტი შედგა. ის მინდორზე რეალ სოსიედადის წინააღმდეგ გამოჩნდა. იმ სეზონში ესპანელმა მონაწილეობა 20 გოლში მიიღო - თავად ცხრა გაიტანა და 11-იც თანაგუნდელებს გაატანინა.

სანტი კასორლამ ყველას დაუმტკიცა, რომ დანებება არავითარ შემთხვევაში არ შეიძლება და ბოლომდე ბრძლა შედეგს ყოველთვის გამოიღებს. ფეხბურთელი, რომელიც ზღვარზე იყო, რომ საერთოდ, სიარულსაც ვერ შეძლებდა, დაბრუნდა... დაბრუნდა მაღალ დონეზე და გუნდის ლიდერიც კი გახდა.

ერთადერთი, რაც ძალიან გულდასაწყვეტია, არის ის, რომ კორონავირუსის პანდემიის გამო, ევროპის ჩემპიონატი გადაიდო. ის რომ წელს ჩატარებულიყო, ვინ იცის, იქნებ სანტი "ფურია როხას" მაისურში კიდევ ერთხელ გვენახა, რისი ალბათობაც ძალიან დიდი იყო.

2020 წლის 19 ივლისს სანტი კასორლამ ვილიარეალის შემადგენლობაში ბოლო მატჩი ჩაატარა და გუნდს დაემშვიდობა. არა, მას საფეხბურთო კარიერის დასრულება და ბუცების ლურსმანზე დაკიდება არც კი უფიქრია. სანტი ფეხბურთის სათამაშოდ ყატარში გაემგზავრება, სადაც ის ესპანეთის ნაკრებში ყოფილ თანაგუნდელს, ჩავი ერნანდესს ალ სადში შეუერთდება და ბურთის გორებას თბილ ქვეყნებში გააგრძელებს.

სანტი კასორლა - 636 დღის ისტორია

სანტის, შესაძლოა, ვერასოდეს გაევლო

კასორლამ იბრძოლა და დაბრუნდა

უახლესი ამბები